Margrét og Móheiður eru miklar jólastemningarkonur sem elska ekkert síður undirbúning og aðdraganda jólanna en jólin sjálf. Allur desember er í raun hátíð í þeirra huga. Mæðgurnar höfðu oft talað um að gaman væri að safna sama saman hugmyndum, sem snúa að jólunum og undirbúningi þeirra, í bók og núna á aðventunni leit bókin Desember dagsins ljós.

„Við dóttir mín unnum bókina saman með Gunnari Sverrissyni ljósmyndara og Höllu Báru Gestsdóttur innanhússhönnuði. Þau hafa áður gefið út bækur um heimilið og bústaðinn og þessi bók passar inn í þann flokk,“ segir Margrét.

„Þegar Halla gaf út bókina sína, Heimilið, í fyrra þá fékk hún að mynda heimilið okkar. Þá sögðum við henni að við hefðum stundum velt þessari hugmynd fyrir okkur. Þau Halla og Gunnar gripu hugmyndina á lofti og hringdu í okkur nokkrum dögum seinna og spurðu hvort okkur væri alvara með þessari hugmynd. Við sögðum: Já! Og bókin varð að veruleika.“

Mæðgurnar skreyta lerkitré sem þær sækja nokkrum vikum fyrir jól. Tréð fær á sig nálar og grænkar í hitanum.

Mæðgurnar unnu að bókinni í rúmlega ár með þeim Höllu Báru og Gunnari svo jólin hafa staðið óvenju lengi yfir hjá þeim undanfarið ár.

„Við byrjuðum í nóvember í fyrra. Svo vorum við að taka myndir í janúar og mars og þær síðustu tókum við þegar það var 23 stigi hiti hér á Akureyri í ágúst. Þá vorum við að mynda uppskriftirnar og pakka inn jólapökkum og fleira,“ segir Margrét.

Vegna vinnu við gerð bókarinnar var jólaskrautið á heimili mæðgnanna uppi óvenjulega lengi.

„Við vorum ekkert mikið að segja frá þessu verkefni og fólk var stundum svolítið hissa á svipinn þegar það hringdi dyrabjöllunni og ég opnaði og fólkið sá stól fullan af jólapökkum eða jólaskreytingu á borðstofuborðinu,“ segir Margrét hlæjandi.

„En við nutum þess svo sannarlega að gera þetta,“ bætir hún við.

Enskar skonsur með marmelaði sem eru í uppáhaldi hjá Margréti og Móheiði.
Nánast allt postulín í bókinni er eftir Margréti sjálfa.

Uppskriftir sem hafa fylgt fjölskyldunni í gegnum árin

Bókin inniheldur ýmsar uppskriftir að kökum og mat sem þær mæðgur gera oft fyrir jólin. Margrét segir uppskriftirnar koma héðan og þaðan. Sumar hafa fylgt fjölskyldunni lengi og aðrar hafa þær kannski fengið úr blaði fyrir langalöngu.

„Eins og gengur þá höfum við gert uppskriftirnar að okkar í áranna rás. Ég er þannig að um leið og ég fæ uppskrift þá byrja ég að breyta henni. Ég hugsa kannski: Ég ætti frekar að setja þetta út í, eða þetta. Ég held það sé algengt með uppskriftir, þær þvælast um og breytast eftir smekk fólks,“ segir Margrét.

Mæðgurnar hafa ýmsar fastar hefðir um jólin og ein þeirra er einmitt að baka.

„Það eru svona litlir hlutir sem okkur finnst nauðsynlegt að gera. Það er til dæmis uppskrift að Lúsíubollum í bókinni sem við reynum alltaf að gera. En svo er það þannig að ef eitthvað gengur ekki upp þann daginn þá gerum við það bara seinna,“ segir Margrét.

„Ég segi til dæmis frá því í formálanum að bókinni að einu sinni náðum við ekki að baka mömmukökur fyrir jólin svo við bökuðum þær bara á jóladag. Það var alveg yndisleg stund. Það eru engar reglur um hvað þarf að gera og hvernig. Hver og einn þarf bara að finna hvað hentar honum, svo maður sleppi sér ekki í einhverju tilbúnu jólastressi.“

Mæðgurnar eiga nokkur lítil gervijólatré sem þær setja í blómapotta. Trén fara út í garð þegar líður á desember.

Þykir vænt um gamla skrautið

Margrét segir að tilgangur bókarinnar sé að leyfa fólki að gægjast á gluggann hjá þeim mæðgum og sjá hvernig þær undirbúa jólin og að vonandi geti einhver sótt innblástur til þeirra.

„Við erum ekki að eltast við tískustrauma. Við elskum að nota mikið sama dótið og stundum bætist eitthvað nýtt við. Við erum ekki þannig týpur að ein jólin á allt að vera svart og silfur og þá fylgjum við því,“ segir Margrét.

„Okkur finnst vænt um gamla jóladótið og minningarnar sem fylgja því. Bókin er því ekki að sýna bara hvað er í tísku í ár heldur á þetta að vera klassísk bók. Ég held að jólin séu þannig hjá mörgum. Eins og segir í jólalagi með Valdimari og Bríeti: Jólin eru endurtekning. Okkur finnst endurtekningin notaleg. Í mínum huga eru jólin stemning, maður fer inn í eitthvert ákveðið hugarástand. Einhverja ró.“

Margrét er starfandi leirlistakona og nánast allt keramikið í bókinni er eftir hana, bæði diskar skálar og föt.

„Bókin tengist mikið inn á okkar heimili, það eru myndir af gamla jólaskrautinu okkar í bókinni og myndir af minni leirlist. Öll leirverkin á myndunum gefa þessu heildrænan svip,“ útskýrir Margrét og bætir við að fyrir áhugasama sé hægt að kaupa bókina í galleríinu hennar á Akureyri.

„Hún fæst líka í Eymundsson, Epal og á heimasíðu Home & Delicious sem gefur bókina út.“