Nú hafa verið settar nýjar sóttvarnareglur. Flestir hafa virt reglurnar sem ríkisstjórnin hefur ákveðið á þessum Covid-tímum.

Yfirvaldið í Rómarríki, Ágústus keisari, boðaði ekki fyrir 2000 árum að allir skyldu fara í veirupróf heldur að skrásetja skyldi alla heimsbyggðina. Fór þá hver til sinnar borgar til að láta skrásetja sig.

María og Jósef fóru til Betlehem og þar fæddist drengurinn Jesús. Börn fæðast úti um allan heim og eru aðstæður mæðranna misjafnar þegar þær fæða. Ég las að fimm börn fæddust á hverri sekúndu í heiminum öllum svo barnsfæðing er hversdagsleg nema fyrir foreldrana sem líta barnið sitt augum í fyrsta sinn og fá það í fangið. Þeirri reynslu er erfitt að lýsa með orðum.

Það er einstakt að sagan af fæðingu eins barns í Juda sem nú tilheyrir Ísrael skuli lifa mann fram af manni, vera rannsökuð af fræðimönnum í gegnum aldirnar og hafa æ síðan áhrif á líf fjölmargra einstaklinga um allan heim. Tímatal okkar miðast við fæðingu Jesú og árlega á dimmasta tíma ársins hér á landi minnumst við fæðingar hans sem síðar sagðist vera ljós heimsins. Hvað er það við þennan atburð, fæðingu þessa drengs, sem gerir hann svona þýðingarmikinn fyrir okkur í dag? Það er barnið sjálft, því í honum fæddist Guð sem maður, einn af okkur. Þannig veit Guð hvað það er að vera maður og þess vegna getum við treyst Guði og leiðsögn Guðs.

Jósef og María voru ekki konungborið fólk eða fólk af efri stigum. Þau voru alþýðufólk sem lifði sínu lífi í bænum Nasaret. Guð valdi Maríu til að ganga með hið nýja líf sem þroskaðist í líkama hennar til að fæðast fullskapað í þennan heim. Jólin eru okkur áminning um að við öll erum dýrmæt í augum Guðs og skiptir kyn, litarháttur, stétt engu máli. Guð elskar okkur öll. Jólin eru hátíð allra jarðar barna.

Ég óska þér gleði og friðar á helgri hátíð og bið þér blessunar Guðs.

Agnes M. Sigurðardóttir,

biskup Íslands