María segist vera alin upp á kristilegu heimili. „Ég undirbý og fagna komu Frelsarans, hátíð ljóssins á ýmsan hátt. Skreyti heimilið mitt og sumarbústaðinn,“ segir hún og bætir við að hún leggi mikla áherslu á að skreytingarnar séu vel gerðar og fallegar. „Ég geri jólainnkaupin tímanlega og vel að njóta frekar aðventunnar og komu jólanna í rólegheitum. Mér finnst gaman að fara á jólatónleika, nýt þess að baka, elda góðan mat og nýt félagsskapar minna nánustu,“ segir hún. „Þar sem ég er alin upp á kristnu heimili var okkur systkinunum kennt um gildi jólanna.“ María segist hafa fengið áhuga á jólaskreytingum frá móður sinni. „Mamma hafði ljós í öllum gluggum. Síðan var jólatréð skreytt á Þorláksmessu og var aldrei kveikt á því fyrr en klukkan sex á aðfangadag um leið og kirkjuklukkurnar hringdu

María leggur líka áherslu á að hafa fallegt borðskraut,

inn jólin. Það veitir mér mikla gleði að hafa fallegt og hreint í kringum mig. Ég hef það kannski svolítið í mér og hef lært að búa til ýmsar skreytingar, hvort sem það eru jóla-, haust- eða sumarskreytingar. Ég notfæri mér náttúruna í kringum bústaðinn og tíni þar ýmislegt sem nýtist í skreytingarnar,“ segir hún.

Glæsileg stofan í sumarbústaðnum hjá Maríu og Tryggva. Arinninn gerir þetta enn meira kósí. FRÉTTABLAÐIÐ/ VALLI

Fallegi bústaðurinn hennar Maríu er ekki langt frá borginni. Hún og eiginmaður hennar, Ásgeir Markús Jónsson, sem nú er látinn, keyptu bústaðinn árið 2008 af dönsku fyrirtæki, EBK, en hann kom í tveimur gámum. Tveir danskir smiðir settu hann upp fullbúinn á fjórum vikum.

Gestahúsið fær einnig að njóta sín í jólaljósum.

„Fjölskyldan notar bústaðinn árið um kring enda stutt að fara. Á aðventunni höfum við alltaf átt saman dag í bústaðnum, borðum hangikjöt með tilheyrandi meðlæti. Stundum bökum við piparkökur, spilum og hlustum á jólatónlist. Svo er farið í góða göngutúra um nágrennið,“ segir María, sem á þrjú börn, tvö tengdabörn og eitt barnabarn. Öll hafa þau ánægju af sælureitnum, eins og hún kallar bústaðinn.

María er mikill fagurkeri eins og sjá má á handverki hennar. Hún skreytir gjarnan með greni úr náttúrunni.

María segist hafa orðið þeirrar gæfu aðnjótandi að kynnast góðum manni, Tryggva Þorsteinssyni, sem hafði farið í gegnum sömu lífsreynslu og hún, að missa maka. „Tryggvi á dóttur, tengdason og barnabarn en saman skapa fjölskyldur okkar áframhaldandi minningar og samveru. Við sóttum einmitt barnabörnin, litlu stelpurnar okkar, í leikskólann um daginn og fórum í bústaðinn, drukkum heitt súkkulaði, borðuðum vöfflur, spiluðum og tókum myndir af þeim með nýju jólasveinahúfurnar sem ég prjónaði. Lífið er dásamlegt. Guð gefi Íslendingum gleðiríka aðventu og jólahátíð,“ segir María, en myndirnar lýsa best jólafegurðinni í sveitinni hennar.

Meira að segja sauna-klefinn er skreyttur. FRÉTTABLAÐIÐ/VALLI
Trén bera falleg ljós og sömuleiðis potturinn. Það er notalegt að vera í svona umhverfi á vetrarkvöldum.
Aðventukrans sem er skreyttur af Elísu í 4 árstíðum sem heillaði Maríu og skreytir nú bústaðinn.