Á sumardaginn fyrsta, 22. apríl, hefst Jazzhátíð Garðabæjar en þetta er í 15 skipti sem hátíðin er haldin en að þessu sinni verða streymistónleikar án gesta frá Tónlistarskóla Garðabæjar.

Fyrstu tónleikarnir fara fram þann 22. apríl klukkan 20:00 og verður streymt beint frá fésbókarsíðu Garðabæjar. Fram koma Sálgæslan og gestir hennar en það eru Sigurður Flosason sem leikur á saxófón, Þórir Baldursson á Hammondorgel, Andrés Þór Gunnlaugsson á gítar og á trommur Einar Scheving. Með sveitinni syngja þau Andrea Gylfadóttir, KK, Jógvan Hansen og Rebekka Blöndal. Flutt verða lög og textar Sigurðar Flosasonar af plötunni Blásýru sem kom út fyrir síðustu jól en Sigurður hlaut um síðustu helgi Íslensku tónlistarverðlaunin fyrir tónlistina á plötunni.

Föstudagskvöldið 23. apríl kl. 20 leikur Kvintett Jóels Pálssonar lög af plötunni Horn sem kom út fyrir 10 árum en Jóel var tilnefndur til Tónlistarverðlauna Norðurlandaráðs fyrir verk sín á plötunni.

Á laugardeginum, 24. apríl fara fram tvennir tónleikar, aðrir kl. 15 en hinir kl. 20 og þar með lýkur Jazzhátíð Garðabæjar 2021. Á tónleikunum sem verður streymt kl. 15 verður leikinn nútímalegur jazz sem er undir áhrifum frá austrænni heimstónlist en það eru Sigmar Þór Matthíasson kontrabassaleikari og Haukur Gröndal klarinettuleikari, Ásgeir Ásgeirsson sem leikur á oud, Ingi Bjarni Skúlason á píanó auk Matthíasar Hemstock trommuleikara sem koma fram.

Lokatónleikarnir kl. 20 þann 24. apríl eru með sveitinni ADHD en það eru bræðurnir Óskar og Ómar Guðjónssynir sem leika ásamt Tómasi Jónssyni á Hammond orgel og Magnúsi Tryggvasyni Eliassen á trommur.

Óhætt er að búast við glæsilegri og fjölbreyttri dagskrá sem fólk getur notið í rólegheitum heima en hátíðin féll niður í fyrra. Listrænn stjórnandi hátíðarinnar er Sigurður Flosason.

Fréttin hefur verið uppfærð.