Ofurkokkurinn Jamie Oliver var snöggur í snúningum síðastliðinn fimmtudag þegar hann hljóp niður mann sem gerði sig líklegan til að brjótast inn á heimili hans. Samkvæmt sjónarvottum var kokkurinn verulega æstur og keyrði manninn í götuna og hélt honum þar til lögreglan mætti á svæðið. 

Samkvæmt heimildum Daily Mail hafði undarleg hegðun mannsins vakið athygli gesta á nálægri krá fyrr um kvöldið. Að þeirra sögn var hann augljóslega undir áhrifum fíkniefna, reif sig úr að ofan og dansaði með miklum látum í kráargarðinum.

Umræddur innbrotsþjófur er þekktur fyrir sjúklega aðdáun sína á söngvaranum George Michael og sést ítrekað hanga fyrir utan heimili hans svo dögum skiptir. 

Misheppnuð innbrotstilraun á heimili fyrirsætunnar Kate Moss átti sér stað skömmu áður en ráðist var til atlögu við heimili Jamie Oliver, talið er að sami maður hafi verið að verki. Samkvæmt upplýsingum lögreglu er maðurinn laus úr haldi.