Ég spilaði á The Irish Pub á föstudag og laugardag og þetta var spilað þrisvar sinnum á hvoru kvöldi, eða sex sinnum á rúmum fjórum tímum, segir Ellert Sigþór Breiðfjörð Sigurðarson, trúbador með meiru. Trúbadorarnir Bóas Gunnarsson og Eiríkur Hafdal taka í sama streng. Hafa spilað lagið oftar en þá langar að muna.

Lilja Björk Jónsdóttir, sem er ein af fáum konum sem eru að trúbadorast í miðbæ Reykjavíkur, segist hlakka til að takast á við lagið og lyfta þakinu á þeim skemmtistað sem hún sé að syngja á – þegar opnunartíminn verður rýmri.

Hannes Óli biður oft um lagið í myndinni og alltaf með miklum tilþrifum.

Kunnugleg frammíköll

Þau eru öll sammála um að Hannes Óli Ágústsson, sem verður brjálaður í hvert sinn sem hann fær ekki að heyra lagið í myndinni, fangi frammíköll Íslendinga af mikilli snilld.

„Ég tengi rosalega við þennan karakter,“ segir Eiríkur. „Þetta er alltaf sami brandarinn. Einhver þykist vera reiður og öskrar eins og Hannes Óli gerir í myndinni. Spilaðu Jaja Ding Dong,“ segir Ellert.

Bóas segir að hann hafi skellt nokkrum sinnum upp úr, meðal annars þegar Hannes biður um lagið. „Hann tekur nokkrar týpur af þessum karakter og fangar þær stórkostlega. Þetta er alveg ágætis ádeila á Íslendinga á börunum.

Það eru alveg til týpur sem vilja heyra bara einn listamann, konur um fertugt eru til dæmis hrifnar af Sálinni. Standa stjarfar fyrir framan þig eftir drykkju dagsins, og eina sem þær geta sagt er: Spilaðu eitthvað með Sálinni.“

Ellert bætir við að hann hafi alveg fengið svona spaða á sig. „Það eru alveg til svona gaurar sem eru álíka slæmir og jafnvel verri, en flestir eru þó kurteisir og skemmtilegir. En maður hefur hitt þennan karakter af ýmsum stærðum og gerðum.“

Lilja þurfti að læra lagið yfirnótt.

Blóðmjólka lagið

Lilja bendir á að einfaldleiki lagsins sé þannig að allir flykkjast út á gólf til að taka sporið. Eiríkur tekur undir það. „Myndin kom út á föstudegi og ég spilaði tvö gigg það kvöld. Ég var ekki búinn að horfa fyrir giggin og það var beðið um lagið. Ég vissi ekkert hvaða lag væri verið að biðja um, þannig að ég fór heim og horfði og pikkaði lagið upp, enda einfalt lag. Það geta allir sungið með.“

Þau eru öll sammála um að lagið sé það vinsælt að trúlega verði það farið af lagalistum eftir sumarið. „Við erum að blóðmjólka lagið svolítið, þannig að eftir hálft ár verður það trúlega horfið. Ég hélt að það myndi jafnvel ýta Shallow út af borðinu, en lagið er eiginlega orðið of vinsælt. Þetta er algert æði sem hefur gripið um sig. Ég held að allir verði búnir að fá nóg eftir hálft ár – en hvað veit ég?“ segir Ellert. Bóas segir að hann vonist eftir að lagið ýti Shallow burtu. „Ég er kominn með alveg voðalegt óþol gegn Shallow, ef ég á að vera hreinskilinn.“

Þórarinn Hávarðasson og Eiríkur Hafdal.