Streymiveitan HBO Max mun verja um níu milljarða króna til þess að taka upp næstu þáttaröð sjónvarpsþáttanna True Detective á Íslandi. Verður þetta stærsta kvikmyndverkefni í sögu Íslands og mun standa yfir í níu mánuði.

Þetta kemur fram í fréttatilkynningu á heimasíðu stjórnarráðsins, þar sem greint er frá því að Lilja Dögg Alfreðsdóttir, menningar- og viðskiptaráðherra, hafi leitt sendinefnd með Íslandsstofu og Útflutningsskrifstofu íslenskrar tónlistar til að funda með fulltrúum kvikmyndavera. Tilgangurinn er að hvetja til erlendrar fjárfestingar í skapandi greinum á Íslandi, að því er kemur fram í tilkynningu stjórnarráðsins.

„Verkefnið True Detective er stærsta erlenda fjárfesting á sviði menningar í Íslandssögunni. Með skýrri sýn og margþáttuðum aðgerðum er okkur að takast að gera landið okkar að mjög álitlegum samstarfskosti í heimi kvikmyndanna. Alþjóðleg kvikmyndafyrirtæki eru tilbúin til þess að fjárfesta í stærri verkefnum til lengri tíma en þau gerðu. Það er gríðarlegur sigur fyrir íslenska menningu og efnahagslíf og staðfesting þess að það sem stjórnvöld eru að gera skiptir máli.“

Þótt upptökurnar fari fram á Íslandi gerist saga fjórðu þáttaraðar True Detective í Alaska. Stórleikkonan Jodie Foster fer með aðalhlutverkið í þáttunum.

Drepið er á því í tilkynningunni að Lilja hafi veitt Deadline, The Location Guide og Hollywood Reporter viðtöl.

„Ég finn fyrir miklum meðbyr hér í Los Angeles með þeim aðgerðum sem við höfum verið að hrinda í framkvæmd á undanförnum misserum til þess að efla skapandi greinar á Íslandi,“ er haft eftir Lilju.