Gamla klisjan „í kjólinn fyrir jólin“ gildir ekki um hátíðirnar í ár, því jólaflíkin 2021 er blessunarlega ekki þröngur kjóll sem þrengir að við át á reyktum steikum. Það allra heitasta þessi jól fyrir dömurnar er fallegt og áberandi pils eða buxur, parað saman við fallega peysu í yfirstærð. Það er eitthvað einstakt við það að setja saman mjög sparilegt pils við þykka og hlýja peysu. Við það myndast sérlega notalegt útlit, með sparilegu yfirbragði. Það ætti ekki að koma neinum á óvart að stóru peysurnar eru áfram í brennidepli yfir hátíðirnar, því ef faraldurinn hefur kennt okkur eitthvað þá þurfa þægindin ekki alltaf að víkja fyrir stílnum eða öfugt.

Tískuhúsin stimpluðu duglega inn þessa skemmtilegu samsetningu á tískupöllunum síðasta vor og pöruðu óspart saman falleg pils með ýmsum mynstrum og fallegri áferð og þykkar, stórar og hlýjar peysur. Djúp v-hálsmál voru þá sérlega áberandi enda afar elegant.

Þetta guðdómlega gula dress var hluti af haust- og vetrarlínu Max Mara á tískuvikunni í febrúar síðastliðnum í Mílanó.
Getty
Peysurnar koma sterkar inn yfir hátíðirnar. Fatamerkið Maryling setur módelið í skyrtu undir peysuna, sem brýtur skemmtilega upp hálsmálið.
Getty
Jason Wu sýnir hér fallega peysu í yfirstærð með einu jólalegasta pilsi sem um getur, en pilsið er fagurlega skreytt Coca Cola glerflöskum.
Getty
Mergjað pils úr haust- og vetrarlínu Louis Vuitton. Bosmamikil stígvél undirstrika yfirstærðina á skemmtilegan hátt.
Getty