Díana Bretaprinsessa var þekkt sem prinsessa fólksins og vann ötullega að alls kyns mannúðar- og góðgerðamálum. Fyrir vikið heimsótti hún alls kyns fólk í opinberum störfum og eyddi oft tíma með börnum. Hún var þekkt fyrir að ná góðum tengslum við þá sem hún heimsótti og klæðaburður hennar var hluti af ástæðunni fyrir því að hún náði vel fólks. Fjallað var um þetta á vef Marie Claire.

Díana tók þá ákvörðun að hlýða ekki konunglegum reglum um að nota hanska, sem var umdeilt á sínum tíma. Það gerði hún vegna þess að hún vildi halda í hendur þeirra sem hún heimsótti og vera í beinni snertingu við fólk sem hún heilsaði með handabandi, samkvæmt Eleri Lynn, sýningarstjóra sýningarinnar Diana: Her Fashion Story. Á þessum tíma trúðu sumir því að það væri mögulega hægt að smitast af alnæmi með því að taka í hendina á alnæmissjúklingum, en Díana hjálpaði til við að útrýma þeirri goðsögn.

Mörg barnanna á barnaheimilinu í Sao Paulo voru smituð af HIV eða með alnæmi. Sumir trúðu að það væri hægt að smitast með snertingu, en Díana hjálpaði til við að útrýma þeirri goðsögn. mynd/GETTY

Hún hætti líka að ganga með hatta, þó að þeir væru taldir viðeigandi fyrir formlegar heimsóknir, vegna þess að hún gat ekki kúrt með börnum með hatt á höfðinu.

Elskaði umhyggjukjól sinn

Díana hafði alltaf mikla ást á börnum og hún eyddi miklum tíma í að heimsækja spítala og staði fyrir fólk í neyð. Þá passaði hún upp á að vera alltaf í björtum litum.

Hönnuðurinn David Sassoon, sem var vinur Díönu, segir að þetta hafði allt byrjað með kjól sem hún kallaði umhyggjukjólinn sinn. Það var kjóll með blómamynstri sem hún var í þegar hún fór til Lagos í Nígeríu, Sao Paulo í Brasilíu og þegar hún heimsótti líknardeild fyrir alnæmissjúklinga í London.

Í samtali við The Telegraph sagði Sassoon að það hefði verið tilviljun sem réði því að hún var í þessum kjól þegar hún heimsótti spítala og börn virtust safnast að henni og vera hrifin af honum. „Ef þú ert eins og prinsessan af Wales, sem elskaði börn, þá viltu ekki mjög formlegan klæðnað fyrir spítalaheimsókn,“ sagði hann. „Þú velur mjög óformlegan kjól í björtum litum, eins og þessi kjóll var. Það vakti aðdáun meðal ungra barna.“

Hér er Díana prinsessa að heimsækja sjúklinga á líknardeild Móður Teresu í Kalkútta á Indlandi. Hún kaus fallegan, bleikan kjól fyrir þessa heimsókn.

Þar sem börn löðuðust að hönnuninni ákvað Díana að halda áfram að vera í björtum litum til að gleðja þau og gera heimsóknirnar ekki eins formlegar.

Sassoon bætti við að Díana hefði haldið áfram að nota kjólinn, þrátt fyrir að aðrir væru ekki hrifnir. „Hún sagði: „fólk er alltaf að segja mér að vera ekki í honum, en ég elska þennan kjól, umhyggjukjólinn minn“.

Díana var auðvitað fyrsti meðlimur konungsfjölskyldunnar til að brjóta allar reglurnar.“