Breska leikkonan Claire Foy segist hafa verið gríðarlega svekkt og í uppnámi þegar hún komst að því hversu mikið hærri laun meðleikari hennar Matt Smith var á í Netflix þáttunum The Crown sem fjalla um líf og störf bresku konungsfjölskyldunnar.
Leikkonan ræðir málin í ítarlegu viðtali við Guardian. Hún fór með hlutverk Elísabetar Bretlandsdrottningar í fyrstu tveimur seríunum af The Crown og lék Matt Smith Filippus hertogann af Edinborg.
Nokkuð óhætt er að fullyrða að hlutverk Claire hafi verið stærsta hlutverkið í seríunum og brá henni fyrir í nánast hverri einustu senu sem Elísabet. Fréttir bárust svo af því árið 2018 að Matt Smith hefði fengið töluvert hærri laun en Foy.
Claire segist ekki hafa haft hugmynd um það að Matt Smith væri á hærri launum en hún, heldur hafi hún komist að því á sama tíma og allir aðrir árið 2018.
„Ég var ekki í sjokki. Ég var í mjög miklu áfalli. Ekki búhú, grátandi áfalli. En ég var í mjög miklu áfalli. Ég held ég hafi eki leyft mér að tjá reiði mína,“ segir leikkonan.
Hún segist elska leiklistariðnaðinn. Hann sé fullur af allskonar frábæru fólki. „En stundum verðuru vitni að einhverju, eða heyrir eitthvað, eða sérð eitthvað eða eitthvað gerist fyrir þig og þú hugsar bara: „Ó guð hvað er ég að gera? Af hverju er ég að gera þetta? Ætti ég að vera hluti af þessu? Mér fannst þetta mjög erfitt.“
Claire segir marga hafa hvatt sig til að tjá sig um þessi mál opinberlega. Hún hafi hinsvegar ekki haft áhuga á því og ekki viljað láta reynslu sína af því að leika í þáttunum snúast alfarið um þetta.
„Ég held að margir hafi viljað að ég segði að þetta væri í góðu lagi. Ég meina, ég held ekki að ég ætti að vera hreinskilin með suma hluti, því ég er ekki viss um að það myndi hjálpa neitt. Það myndi bara bæta olíu á eldinn. Við erum enn að tala um þetta öllum þessum árum síðar.“
