Sirrý og eiginmaður hennar, Kristján Franklín Magnús, héldu nýlega upp á 30 ára brúðkaupsafmæli. Hún segir að þau hafi alla tíð verið mjög meðvituð um það að vera góð hvort við annað, standa saman og tala mikið saman. „Það þarf ekki að vera mikið tilstand eða flottheit í hjónabandinu en það er nauðsynlegt að hafa tíma saman,“ segir hún.

Núna þegar fáir fara til útlanda er fólk duglegt að gera eitthvað saman hér heima. Sirrý segir að það sé einmitt það sem þau hjónin gera. „Jú, það er nú eitt af því góða við þetta annars erfiða ástand að fólk fer núna miklu styttri leið til að upplifa og njóta lífsins. Það þarf ekkert að fljúga. Rétt utan við borgina og bæina eru staðir sem bjóða upp á hvíld og rómantík – og oft á tilboðsverði. Ég og maðurinn minn nýttum okkur til dæmis tilboð Fosshótela í sumar og haust. Við áttum frábæra dvöl á flottum hótelum í Stykkishólmi, við Jökulsárlón og víðar. Einnig nýttum við okkur tilboð í Húsafelli og vorum þar í golfi, giljaböðum, fjallgöngum og sundi. Það var frábært,“ segir hún.

„Mér hefur fundist best að hafa einhverja hreyfingu, einhverja áskorun áður en maður fer að njóta hvíldar og dekurs. Göngur, golf og útivist af ýmsu tagi er nauðsynleg áður en farið er í heitar laugar og góðan kvöldverð,“ bætir Sirrý við og þegar hún er spurð hvort það þurfti að vera tilefni, svarar hún.

„Það fer eftir efnum og aðstæðum fólks hverju sinni. En nei í raun finnst mér mikilvægt að hugsa um það að lifa fallega hvern dag. Til dæmis að vera saman á sunnudagsmorgnum með eitthvað nýbakað úr bakaríinu, blöðin og gott kaffi. Blóm og fallega lagt á borð. Mér finnst þetta hreinlega mikilvægur hluti af daglegu lífi. Ég þekki nokkra sem ætluðu að gera svo margt saman seinna en það kom svo aldrei að því, því miður,“ segir hún, en vel má minna fólk á að njóta þess að lifa í núinu.

Sirrý hefur verið dugleg að njóta Íslands í sumar og heimsótt marga frábæra staði auk þess að nýta sér tilboð hótelanna.

Þegar Sirrý er spurð hvert út á land henni finnist mest gaman að fara á hún erfitt með að gera upp á milli nokkurra staða. „Ég get nú ekki valið eitthvað eitt sem er skemmtilegast. En mér fannst til dæmis alveg frábært síðasta vetur að aka bara upp í Hvalfjörð og gista á Hótel Glym eina helgi. Margt að skoða – fossinn, fjörðurinn og hafið og svo lúxusinn á hótelinu, heitir pottar með útsýni yfir sjóinn og góður matur. Það er stutt að fara en algjörlega æðislegt,“ svarar hún og er ákveðin í að ferðast meira innanlands í haust og vetur.

Þar sem Sirrý starfar við Háskólann á Bifröst er hún oft í snertingu við undurfagra náttúru. Frá skólanum eru fallegar gönguleiðir og á haustin er gaman að skoða ótrúlega haustliti í náttúrunni. „Þegar ég verð með vinnuhelgar í byrjun vetrar förum við konurnar saman í göngutúra, borðum góðan mat og njótum sveitalífsins í bland við námið. Síðan fæ ég kannski manninn minn til að koma upp eftir að vinnuhelgi lokinni og fara með mér í mat á Hraunsnefi eða Varmalandi, gönguferðir að Glanna og Paradísarlaut, í Jafnaskarðsskóginn og það er bara mjög rómantískt að ganga og spjalla saman við Hreðavatn. Það er fallegt þarna í hrauninu allan ársins hring. Pör geta farið saman eða í vinahóp, bæði er skemmtilegt. Það þarf ekki að fara langt eða skipuleggja eitthvað flókið ef hjartað og rétta manneskjan er með í för,“ segir hún.

Sirrý hefur verið að þjálfa fólk í öruggri tjáningu, kynningum, viðtölum og samskiptum við fjölmiðla enda sjálf gamalreynd fjölmiðlakona. „Ég kenni þetta líka við Háskólann á Bifröst og hef gert í mörg ár ásamt því að halda fyrirlestra. Þá hef ég nýlega tekið við sem verkefnastjóri í „Mætti kvenna – stofnun fyrirtækja“ sem ég er alveg heilluð af. Það er ellefu vikna fjarnám með öflugum vinnuhelgum við Háskólann á Bifröst. Við förum af stað með námskeiðið 23. október svo þetta er mjög ofarlega í huga mínum núna,“ segir hún, en Sirrý er að senda frá sér nýja bók, „Þegar karlar stranda – og leiðin í land“, í samvinnu við VIRK og bókaútgáfuna Veröld. Fyrri bók Sirrýjar sem hún vann með VIRK heitir „Þegar kona brotnar – og leiðin út í lífið á ný.“

Það má með sanni segja að það sé spennandi vetur fram undan hjá henni og alltaf nóg að gera.