Þrír meðlimir hljómsveitarinnar eru fastráðnir hjá Sinfóníuhljómsveit Íslands. Það eru Julia Hantchel óbóleikari, Bryndís Þórisdóttir á fagott og Frank Hammarin hornleikari. Finn Schofield á klarínett og Björg Brjánsdóttir þverflautuleikari eru sjálfstætt starfandi tónlistarmenn og spila bæði reglulega með Sinfóníunni. „Við kynntumst öll við að spila saman og það var Julia sem átti frumkvæðið að því að stofna hljómsveitina. Hana langaði að stofna kvintett og hóaði í okkur. Þannig varð hljómsveitin til,“ segir Björg Brjánsdóttir.

Fimm áttir

Bryndís nam við Konunglega Tónlistarháskólann í Kaupmannahöfn. Hún hefur verið aukamaður hjá Dönsku útvarpshljómsveitinni og Sinfóníuhljómsveit Sjálands og spilar reglulega með hljómsveitum á borð við Hljómsveit Íslensku óperunnar og Caput.

Frank Hammarin frá Kaliforníu er með meistaragráðu frá The Peabody Institute í Baltimore. Kennari hans þar var Denise Tryon. Samhliða starfinu hefur hann spilað kammertónlist á alþjóðlegum vettvangi.

Julia Hantschel er frá Aachen í Þýskalandi. Hún stundaði nám við Musikhochschule Freiburg im Breisgau, Sibeliusarakademíuna í Helsinki og í Hochschule für Musik í Basel. Hún hefur kennt víða um heim og komið fram sem einleikari.

Finn Alexander Schofield er frá Nýja-Sjálandi. Hann er með meistaragráðu frá Tónlistarháskólanum í Zürich og master í kammermúsík við Tónlistarháskólann í Trossingen í Þýskalandi. Finn hefur spilað á námskeiðum fyrir marga af frægustu klarínettuleikurum heims.

Björg Brjánsdóttir útskrifaðist af einleikarabraut frá Tónlistarháskóla Noregs 2017. Hún er stofnandi kammersveitarinnar Elju. Hún er fastur flautuleikari tónlistarhópsins Caput og meðlimur flautuseptettsins Viibra sem hefur unnið með Björk Guðmundsdóttur frá árinu 2016.

Tveir Íslendingar, Þjóðverji, Nýsjálendingur og Bandaríkjamaður. Hvernig hefur þessi þjóðablanda áhrif á hljómsveitina?

„Ég hef í raun aldrei pælt í því að við séum frá mörgum löndum. Við tölum mest saman á ensku og það er alveg fyndið að heyra fjóra mismunandi enska hreima. Það er samt mjög skemmtilegt að við séum úr svona mörgum áttum og gefur okkur alveg örugglega mjög mikið.“

Mér skilst að kvintettinn hafi hálfgert gælunafn. Kvíðakvintettinn. Viltu útskýra þessa nafngift?

„Þetta grín spratt út frá því að nafnið okkar Hviða hljómar ansi líkt „kvíða“, sérstaklega þegar það er sagt í samræðum á ensku. Við gerum samt auðvitað okkar besta til að vinna vel á kvíða og halda í spilagleðina í flutningnum, Hviða er betri en kvíði,“ segir Björg og hlær.

Það er eitthvað mjög fallegt við það að hafa getað hist og gert músík saman þó að það væri búið að aflýsa öllum tónleikum um ófyrirséðan tíma og það gaf okkur mikið.

Bestu minningarnar tengdar hljómsveitaræfingum

„Við erum öll sammála um að kvintettinn sé mjög beintengdur Covid-19 faraldrinum, en hann var stofnaður áður en fyrsta bylgjan skall á. Við byrjuðum að æfa í febrúar 2020 fyrir fyrstu tónleikana okkar sem áttu að vera í apríl. Þetta var í fyrstu bylgjunni á tíma þegar maður hitti aldrei neinn, en við stofnuðum faraldurskúlu og hittumst til að spila saman.

Það er eitthvað mjög fallegt við það að hafa getað hist og gert músík saman þó að það væri búið að aflýsa öllum tónleikum um ófyrirséðan tíma og það gaf okkur mikið. Tónleikarnir í apríl breyttust í stafræna tónleikaheimsendingu tónleikaraðarinnar „Heima í Hörpu“ frá Eldborg. Æfingar með kvintettinum eru einar af mínum bestu minningum frá Covid-tímanum,“ segir Björg.

Hvernig hefur gengið að halda tónleika og æfa á faraldurstímum?

„Þetta hefur verið ævintýralegt eins og hjá mörgum. Fyrstu tónleikar 2020 urðu að streymistónleikum. Næstu tónleikum frestuðum við tvisvar og héldum þá loks í Dómkirkjunni í febrúar 2021 við góðar undirtektir.

Við þurftum svo að fresta tónleikum á vegum tónleikaraðarinnar Tíbrár í Salnum í Kópavogi um daginn vegna sóttkvíar hjá tveimur meðlimum. Þeir tónleikar verða á dagskrá núna á þriðjudaginn 16. nóvember í Salnum. Á dagskrá verður fáheyrð blásaratónlist með frönsku ívafi. Þarna eru fjölbreytt verk eftir Jaques Ibert, Maurice Ravel, Jean Françaix og Francis Poulenc. Þetta verður heilmikil frönsk veisla og með okkur kemur fram píanóleikarinn Mathias Halvorsen sem flytur með okkur frábæran sextett Poulenc fyrir píanó og blásarakvintett.“

Stundum eru andstæðurnar áhugaverðastar og stundum er skemmtilegast að hafa rauðan þráð í gegnum efnisskrána. Það má segja að bæði eigi við um efnisskrána á þriðjudaginn: verkin eru öll frönsk en gjörólík á sinn hátt.

Klæjar í fingurna

Kvintettinn segir Björg leitast við að taka fyrir þungavigtarverk blásarakvintetts-tónbókmenntanna og á sama tíma finna minna spiluð verk sem eru vel verð áheyrnar. „Verk sem eru krefjandi og dýnamísk fyrir alla spilara og tala til okkar sem heild.

Við vorum svo heppin að fá risastóran bunka frá Blásarakvintett Reykjavíkur og nýttum Covid-rólegheitin í að spila í gegnum fjöldann allan af verkum. Þannig uppgötvuðum við alls konar verk sem við þekktum ekki fyrir. Svo er auðvitað kúnstin að púsla saman verkum þannig að þau myndi fallega heild. Stundum eru andstæðurnar áhugaverðastar og stundum er skemmtilegast að hafa rauðan þráð í gegnum efnisskrána. Það má segja að bæði eigi við um efnisskrána á þriðjudaginn: verkin eru öll frönsk en gjörólík á sinn hátt.

Við erum búin að vera að æfa þessa dagskrá fyrir Tíbrá síðan í ágúst og klæjar í fingurna að fá að flytja þessa fallegu tónlist. Við erum komin í góða þjálfun að færa til og aðlaga okkur síbreytilegum aðstæðum, en vonumst að sjálfsögðu til þess að geta haldið tónleikana á þriðjudaginn með glæsibrag,“ segir Björg. Hægt er að næla sér í miða á vefsíðu Salarins: salurinn.kopavogur.is.

Hvað er svo á döfinni?

„Við höfum fengið mörg spennandi verkefni í vetur. Við munum meðal annars fara í skólaheimsóknir að spila Pétur og úlfinn fyrir kvintett og sögumann. Flautan er þá fuglinn, klarinettið er kötturinn, óbóið er öndin, hornið er úlfurinn og fagottið túlkar afann. Pétur er sá eini sem er ekki skrifaður með sérstakt hljóðfæri, en hans persónu er skellt inn í ýmis önnur hljóðfæri. Þá verðum við með tónleika í Hörpu þann 13. desember með ólíkri efnisskrá frá Tíbrártónleikunum,“ segir Björg að lokum. ■