Húsið hefur einstakan karakter og það er með sorg í hjarta sem þau hjónin eru að selja. „Við elskum hvern fermetra í þessu húsi og þessum garði. Við fluttum hingað 1992 og þarna höfum við alið upp tvo drengi, yndislegan hund og ótal fugla. Ungu mennirnir eru uppkomnir og þetta er orðið of stórt hús fyrir okkur tvö,“ segir Jóhanna M. Thorlacius.

Garðurinn vekur athygli með hellulagðri verönd á baklóð til suðurs.

Húsið er 225,9 fermetrar að stærð, þar með talin 45 fermetra vinnustofa sem hefur verið breytt í stúdíóíbúð, ásamt 12 fermetra óskráðu verkstæði í bakgarði. Arkitekt hússins er Albína Thordarson og stendur húsið við rólega götu, í sannkallaðri sveit í borg. Það er sex herbergja, með þrjú svefnherbergi og þrjár stofur auk stúdíóíbúðarinnar.

Fyrir utan sólskála er fallegur gróður; heitur pottur og tjörn.

„Við höfum alltaf sinnt öllu viðhaldi jafnóðum og húsið er í mjög góðu standi. Garðurinn er stór og mikill og nú erum við að nálgast sextugt. Þetta eru viss tímamót og næstu árin verða öðruvísi. Nú ætlum við að draga saman seglin og huga í meira mæli að andlegum málum; njóta lista og menningar, ástunda íhugun, útiveru og fleira,“ segir Jóhanna Margrét.

Mikil veðursæld er á lóðinni sem er 1.054,2 fermetrar að flatarmáli.

Garðurinn vekur athygli með hellulagðri verönd á baklóð til suðurs með útgengi frá stórum sólskála. Þar er fallegur gróður; heitur pottur og tjörn í bakgarði og mikil veðursæld er á lóðinni sem er 1.054,2 fermetrar að stærð. Innkeyrslur eru beggja vegna hússins, alls 3-4 bílastæði. Falleg og vönduð hraunhleðsla er á lóðarmörkum. Snjóbræðslukerfi er undir hellulagðri innkeyrslu við aðalinngang en náttúruleg steinlögn hinum megin. Virkilega fallegur gróður er á lóðinni sem hefur verið vel hirt í gegnum árin.

Páfagaukabúrið vekur mikla athygli enda ansi stórt. „Það er unaðslegt að hlusta á þá frá morgni til kvölds.“

Staðsetningin er frábær með fallegum gönguleiðin að Varmá, Reykjalundi, Helgafelli, Hafravatni og öðrum náttúruperlum. Barnvæn staðsetning þar sem stutt er í leikskólann Reykjakot og Krikaskóla.

Hvert sem litið er má finna fallega staði í húsinu.

Opið hús verður sunnudaginn 12. maí klukkan 14.00-14.30.