Samkvæmt upplýsingum frá vefsíðu breska heilbrigðiskerfisins NHS er mælt með að stunda miðlungs erfiða hreyfingu í að minnsta kosti 150 mínútur á viku til að halda heilsu. Smá hreyfing er samt betri en engin. Jafnvel 10 mínútna rösk ganga getur hjálpað fólki að hreinsa hugann og slaka á. Hreyfing hefur áhrif á boðefni í heilanum eins og serótónín, dópamín og noradrenalín. Talið er líklegt að aukin virkni þessara boðefna dragi úr þunglyndi en þunglyndislyf hafa einmitt áhrif á þessi boðefni. Rannsóknir hafa sýnt að fyrir suma getur hreyfing haft jafn góð áhrif á þunglyndi og lyf. En fyrir fólk með alvarlegt þunglyndi verður þó að taka lyf samhliða aukinni hreyfingu.

Þegar fólk glímir við þunglyndi og orkuleysi getur verið erfitt að koma sér af stað í hreyfingu. Þunglyndi getur valdið svefntruflunum, breyttri matarlyst, verkjum í líkama og auknu næmi fyrir sársauka sem allt getur átt þátt í að virkja letjandi á sjúklinginn til að stunda hreyfingu. Þá er mikilvægt að velja hreyfingu sem sjúklingnum finnst skemmtileg. Fyrir þau sem treysta sér getur verið sniðugt að skrá sig á námskeið á líkamsræktarstöð eða taka þátt í hópíþrótt með öðru fólki. En einnig er hægt að bæta hreyfingu inn í daglegt líf með því að hjóla eða ganga í stað þess að nota bíl eða almenningssamgöngur.

Þegar fólk glímir við þunglyndi getur verið erfitt að komast í gang.

Stuðningur fagaðila

Oft þarf fólk þó stuðning fagaðila til að komast í gang og þá er til dæmis hægt að leita til heimilislæknis og biðja hann um að skrifa upp á hreyfiseðil. Þá er sjúklingnum vísað til sjúkraþjálfara sem hefur aðsetur á heilsugæslustöð sjúklingsins og sett eru upp markmið og hreyfiáætlun út frá getu sjúklingsins.

Það er misjafnt hversu langan tíma það tekur að finna fyrir jákvæðum áhrifum hreyfingar á þunglyndi. En samkvæmt dr. Michael Craig Miller, prófessors í geðlækningum við Harvard-háskóla, tekur yfirleitt nokkrar vikur fyrir áhrifin að koma fram. Hann bendir á að hreyfing sé ekki skyndilausn við þunglyndi heldur langtíma meðferð. Þess vegna er mjög mikilvægt fyrir sjúklinginn að velja sér hreyfingu sem hann treystir sér til að halda áfram að stunda til langframa.

Minni áhrif á konur

Nýleg rannsókn sem framkvæmd var af vísindamönnum við Háskólann í Michigan sýndi að áhrif hreyfingar á þunglyndi hefur þó ekki sömu áhrif á karla og konur. 1.100 manns, karlar og konur, sem stunduðu nám við Peking-háskóla í Kína voru rannsökuð. Rannsakendur bjuggust við að finna tengsl milli hreyfingar og þunglyndis hjá öllum þátttakendum en miðlungs til erfið hreyfing hafði einungis jákvæð áhrif á þá karlkyns þátttakendur í rannsókninni sem sýnu einkenni þunglyndis. Rannsakendurnir telja að það að fleiri konur þjáist af alvarlegu þunglyndi geti skýrt þessar niðurstöður en hreyfing hefur ekki verið talin hafa eins jákvæð áhrif á alvarlegt þunglyndi. Rannsakendurnir segjast þurfa að gera fleiri rannsóknir til að fá skýringu á þessum niðurstöðum.