Hópurinn hefur æft reglulega tvisvar í viku undir tryggri handleiðslu einkaþjálfarans Daníels Þórðarsonar, síðan vorið 2019. Daníel, eða Danni eins og hann er alla jafna kallaður, er einna þekktastur fyrir árangur sinn í hnefaleikum og hefur til dæmis unnið til verðlauna í þeirri íþrótt. Nú starfar hann sem einkaþjálfari á vegum Granda 101 og þjálfar meðal annars Sinfó-fit hópinn í upphífingum, armbeygjum, burpees, handstöðu, kappróðri, og mörgu fleiru.

Var eins og sulta

Forsprakki Sinfó-fit er víóluleikarinn Þórunn Ósk Marínósdóttir, sem hefur persónulega reynslu af því hversu mikilvægt það er að halda líkamanum í góðu formi. „Ég var fertug þegar ég eignaðist fjórða barnið og náði mér aldrei almennilega á milli meðgangna. Einn daginn skellti ég mér á skíði með elsta stráknum mínum og uppgötvaði, mér til mikillar skelfingar, að ég var orðin eins og sulta. Lappirnar titruðu undir mér. Það var þá sem ég byrjaði í lyftingum og eftir nokkur ár í þeim var mig farið að dreyma um að prófa CrossFit. Ég prófaði grunnnámskeið í CrossFit á Granda og síðan var ekki aftur snúið. Ég talaði svo mikið um þetta í vinnunni að allir héldu að ég væri einhvers konar meistari í faginu. Vinnufélagar voru farnir að sýna þessu áhuga sem varð til þess að ég viðraði hugmyndina um sérstakan sinfó-æfingahóp við Núma, sem er einn eigandi Granda 101. Nú eru um 18 prósent af Sinfóníuhljómsveit Íslands í Sinfó-fit og mest er þetta „sterka fólkið“, það er neðri strengir og hornleikarar. En að sjálfsögðu eru allir hljóðfæraleikarar sinfóníunnar hjartanlega velkomnir. Tímarnir eru þannig að allir geta tekið þátt. Við erum óendanlega þakklát fyrir að fá að nota þessa aðstöðu og hafa Danna með okkur.“

Þórunn Ósk Marínósdóttir, víóluleikari, átti þá hugmynd að hljómsveitarmeðlimir stunduðu saman líkamsrækt.
Fréttablaðið/Ernir

Útihlaupin koma sterk inn

Hópurinn mætti á fyrstu Sinfófit æfinguna á þriðjudaginn var, en lokað hefur verið í Granda101 síðan seint í mars vegna samkomubanns. Í millitíðinni hafa meðlimir reynt sitt besta til að halda sér í formi. Margir stunda útihlaup og heimaæfingar með æfingamyndböndum á YouTube. Hornleikararnir Frank Hammarin og Asbjørn Ibsen Bruun voru líka báðir duglegir að nýta sér internetið þegar kom að heimaæfingum og æfðu meðal annars með Granda101 á Instagram. „Áður en ég byrjaði í Sinfó-fit synti ég til þess að halda mér í formi. Eftir að Grandi101 og laugarnar lokuðu jók ég útihlaup, sem var skemmtileg tilbreyting. Einnig tel ég að sú staðreynd að skemmtistaðir voru lokaðir og að veitingastaðir lokuðu snemma í samkomubanninu, hafi haft jákvæð heilsufarsleg áhrif á mig,“ segir Frank.

Asbjørn hafði það fyrir reglu að ganga minnst 10.000 skref á dag í samkomubanninu. „En sannleikurinn er sá að ég er í verra formi núna heldur en fyrir samkomubann. Ég finn sérstaklega fyrir því í þverrandi styrk í efri hlutanum, sem hefur neikvæð áhrif á það hvernig ég spila á hornið. Ég get ekki beðið eftir því að komast í góða rútínu aftur.“ Fleiri taka undir þetta og nefnir Benedikte Damgaard, fiðluleikari, að hún hafi átt erfitt með að halda sér í formi, þar sem hún hafi ekki átt búnað fyrir styrktaræfingar. „Ég hljóp fyrst mikið og gerði plankaæfingar, en á sama tíma þurfti ég að minnka kröfurnar til sjálfrar mín. Það var auðveldara að fara út að hlaupa þegar ég hafði hvatninguna frá Sinfó-fit, en í samkomubanninu hef ég frekar stundað göngur og fjallgöngur.“

Kaloríur og sjálfsvorkunn

Það náðu ekki allir að halda sér á beinu brautinni í heimaæfingum og útihlaupum, og grínast sellóleikarinn Guðný Jónasdóttir með að í samkomubanninu hafi hún komið sterk inn í vín-, osta- og sjálfsvorkunnarmataræði, sem hafi orsakað töluverða þyngdaraukningu fyrst um sinn. „En svo uppfylltum við maðurinn minn úthverfaklisjuna með því að kaupa okkur þrekhjól. Þegar leikskólarnir opnuðu aftur komumst við svo meira út í hjóla- og hlaupatúra og aukaosturinn bráðnaði burt á örskotsstundu.“ Stefán Jón Bernharðsson, hornleikari, segist að sama skapi hafa brennt slatta af kaloríum í sjálfsvorkunn sem og í Bjóraþoninu mikla, en fyrir stuttu skipulagði hann stórskemmtilegt níu kílómetra bjórhlaup með nokkrum meðlimum Sinfóníuhljómsveitarinnar sem tókst þrælvel.

Var hætt að fá í bakið

Flestir eru sammála um að þeir hafi saknað Sinfó-fit í samkomubanninu enda gerði líkamsræktin þeim mjög gott. „Ég er miklu sterkari með Sinfó-fit. Aukinn styrkur í efri hluta líkamans hefur minnkað liðverki og önnur vandamál sem ég hef glímt við,“ segir Guðný. Benedikte segist ekki hafa stundað styrktaræfingar áður en hún byrjaði í Sinfó-fit. „Ég var haldin fordómum gagnvart CrossFit og skráði mig í byrjun til þess að kynnast samstarfsfélögum mínum. Það kom mér á óvart hvað þetta var skemmtilegt og á fyrstu æfingunni uppgötvaði ég fjölda vöðvahópa sem ég vissi ekki að kroppurinn byggi yfir. Manni finnst maður mun léttari eftir nokkurra mánaða æfingaprógramm og beitir sér mun betur við að ganga og lyfta hlutum. Ég var líka alveg hætt að fá í bakið við langar setur í vinnunni.“

Julia Hantschel, óbóleikari, segist hafa hreyft sig mikið áður en hún byrjaði í Sinfó-fit. „Ég hljóp reglulega, synti, fór í ræktina en var hætt að bæta mig. Eftir að ég byrjaði í Sinfó-fit fannst mér eins og ég hefði opnað fyrir nýjar víddir í hlaupaþjálfuninni. Þol og hraði jukust eftir fáeina tíma, þrátt fyrir endalausar harðsperrur. Með því að nota nýja vöðvahópa gat ég gert fleiri æfingar. Auk þess hefur aukinn styrkur í efri hluta líkamans bætt líkamsstöðuna og komið í veg fyrir höfuðverki, sem ég var vön að finna fyrir á hljómsveitaræfingum. Í samkomubanninu hef ég nýtt aukatíma í útihlaup og nú er ég að æfa mig fyrir Reykjavíkurmaraþonið í ágúst. En hlaupið er einmanalegt og ég var virkilega farin að hlakka til þess að æfa með hópnum aftur.“

Asbjørn bætir við að samstarfið í hljómsveitinni sé almennt nánara en á flestum vinnustöðum. „Sinfófit stuðlar að enn betri liðsheild, sem hvetur okkur til þess að gera meiri kröfur til okkar sjálfra og stíga út fyrir þægindarammann. Þetta gerir okkur fær um að standa okkur enn betur á tónleikum.“ Hávarður Tryggvason, bassaleikari, tekur undir þetta og bætir við að æfingarnar hafi gert sér gott. „Það er mikilvægt að styrkja efri líkamann en félagslegi þátturinn er ekki síður mikilvægur og hópeflið dregur mann áfram þegar letin ætlar að hafa mann undir.“

Hlakkar minna til harðsperranna á morgun

Eftir fyrstu æfinguna síðasta þriðjudag voru hljóðfæraleikararnir eðlilega þreyttir, en glaðir að vera byrjaðir aftur í reglubundinni hreyfingu. Stemninguna í salnum segja þau hafa verið frábæra. „Við vorum eins og kálfar að vori,“ segir Hávarður og Frank bætir við: „Við finnum fyrir hverri einustu pítsusneið og bjórglasi sem við höfum innbyrgt síðustu sjö vikurnar. En svona í alvöru talað þá líður mér furðulega vel. Fyrsta æfingin var ekki jafnerfið og þær sem voru fyrir lokanirnar, en það er frábær tilfinning að vera byrjaður aftur. Maður gleymir því fljótt hvað félagslegi þátturinn er mikilvægur. Hann hjálpar manni að reyna meira á sig og gerir æfinguna einfaldlega skemmtilegri.“

Guðný tekur undir: „Þetta var æði. Ég er dauðuppgefin, þó svo tíminn hafi kannski ekki verið jafn erfiður og vanalega. Þetta tók fljótt af og allir voru í geggjuðum diskófíling. En ég hlakka aðeins minna til harðsperranna á morgun.“ Hávarður játar þó að honum hafi þótt tíminn frekar erfiður: „Ég hélt ég væri í betra formi eftir hjólaferðir, skokk og fjallgöngur. CrossFit reynir allt öðruvísi á mann og það var löngu tímabært að taka upp þráðinn. Tilfinningin eftir tímann er frábær.“ Þórunn tekur undir orð Hávarðar og bætir við: „Maður finnur það sérstaklega vel núna hvað það er hvetjandi að hafa félagsskapinn.“