Haustin eru í sérstöku uppáhaldi hjá Ragnari Frey Ingvarssyni, sem er betur þekktur sem Læknirinn í eldhúsinu. „Ég hlakka til að snúa aftur til vinnu eftir verðskuldað sumarleyfi. Svo eru haustin tími dásamlegrar uppskeru af fersku grænmeti og nýju lambakjöti. Ég verð að játa að ég hef aldrei tekið slátur, þó ég kunni vel að meta ferskan innmat eins og soðna lifrarpylsu og steiktan blóðmör, borinn fram með heimagerðri bláberjasultu.“

Hráefnið í réttinn er bæði hollt og litfagurt. MYND/AÐSEND

Hér gefur hann uppskrift að kryddlegnum lambahjörtum sem hann hefur eldað nokkrum sinnum. „Þessi réttur varð til þegar ég var að gera uppskriftir fyrir eina af matreiðslubókunum mínum. Ég veit enn þann dag í dag ekki af hverju hún komst ekki í bókina. Það er hreinlega stundum þannig en hún er alveg nógu ljúffeng. Heit og seðjandi.“

Ragnar Freyr Ingvarsson, Læknirinn í eldhúsinu. MYND/KARL PETERSSON

Hann segir mikilvægt að elda hjörtun nægilega vel. „Hjartað er vöðvi sem inniheldur litla fitu og er heldur harður undir tönn þegar hann er of lítið eldaður. En eldaður við lágan hita í 1,5 til 2 tíma verður bitinn lungamjúkur.“

Hjörtun eru látin marinerast í chili, hvítlauki, chilidufti, paprikudufti, jómfrúarolíu, salti og pipar í að minnsta kosti klukkustund í kæli. MYND/AÐSEND

Kryddlegin hjörtu Læknisins í eldhúsinu

Fyrir fjóra

4 lambahjörtu

1 rauður chili

2 hvítlauksrif

½ tsk. cheyenne-pipar

1 tsk. þurrkuð sterk paprika

2 msk. jómfrúarolía (það má nota chilibragðbætta jómfrúarolíu)

4 msk. hveiti

4 gulrætur

1 rauðlaukur

1 sellerístöng

2 hvítlauksrif

1 msk. tómatmauk

150 ml rauðvín

500 ml lambasoð

1 tsk. Yfir holt og heiðar kryddblanda

50 g smjör

Salt og pipar

2 íslenskar rauðar paprikur

Pæklaður íslenskur chilipipar til skrauts

Hrísgrjón

Salat að eigin vali

Aðferð:

Sneiðið og skolið hjörtun undir köldu vatni og setjið í skál. Bætið smátt skornum chili ásamt hvítlauki, chilidufti, paprikudufti, jómfrúarolíu, salti og pipar og blandið vandlega saman og látið marínerast í að minnsta kosti klukkustund í kæli.

Brúnið hjörtun upp úr blöndu af smjöri og jómfrúarolíu og setjið til hliðar. Hrærið hveitið saman við.

Skerið laukinn, hvítlaukinn og selleríið smátt og steikið í olíunni, saltið og piprið. Bætið kjötinu út í pottinn og blandið vel saman. Flysjið gulræturnar og setjið heilar saman við.

Hækkið hitann undir pottinum og þegar allt kraumar rækilega skal hella víninu saman við og sjóða upp, og svo niður um helming.

Bætið lambasoðinu saman við og hitið að suðu og setjið svo inn í 160 gráðu heitan, forhitaðan ofn og látið dvelja þar í 90 mínútur.

Þegar hálftími er eftir sneiðið þið tvær paprikur niður í lengjur og hrærið saman við kássuna.

Takið pottinn úr ofninum og setjið á hlóðirnar og blandið smjörinu saman við.

Berið fram með soðnum hrísgrjónum og fersku salati úr nýju íslensku grænmeti.

Skreytið kássuna með pækluðum chili (uppskriftin verður í nýju bókinni minni) og skálið fyrir haustinu í öllum sínum ljóma!

Þegar allt kraumar rækilega er rauðvíninu hellt saman við og látið sjóða upp og svo niður um helming. MYND/AÐSEND