Alþjóðlega heimildarmyndahátíðin IceDocs var sett í fjórða sinn á Akranesi síðastliðinn miðvikudag. Fjölbreytt dagskrá hefur verið í bænum síðustu daga en hátíðinni lýkur á morgun.

Ingibjörg Halldórsdóttir, einn stofnenda hátíðarinnar, segir stemninguna í bænum góða. Tuttugu erlendir gestir eru á staðnum í tengslum við hátíðina, en hún hefur einnig verið vel sótt af heimafólki og innlendum gestum.

Stilla úr myndinni Young Plato sem fjallar um skólastjórann Kevin sem notar heimspeki við að kenna drengjum samskipti. MYND/AÐSEND

Fyrir þau sem vilja leggja leið sína upp á Skaga um helgina er af nógu að taka. Ingibjörg nefnir sérstaklega sýningu á myndinni Young Plato, sem er heimildarmynd um drengjaskóla á Norður-Írlandi, en aðalsöguhetja myndarinnar, skólastjórinn Kevin McArevey, er gestur á hátíðinni. Kevin mun svara spurningum áhorfenda að sýningu lokinni en Sólveig Jónsdóttir stýrir umræðunum.

„Kevin er norður-írskur skólastjóri í drengjaskóla þar. Hann notar heimspeki mikið í skólastarfinu til að kenna börnunum virðingu gagnvart hvert öðru og annað slíkt. Inn í heimspekina vefjast þessi átök sem hafa verið á svæðinu og hvernig er best fyrir börnin að bregðast við því ástandi. Í lýsingu myndarinnar segir að viska grísku heimspekinganna sé notuð til þess að berjast gegn fátækt, fíkniefnavanda og Írska lýðveldishernum og til þess að endurvekja von í hjarta illa leikins samfélags,“ segir Ingibjörg.

„Í myndinni er fylgst með skólastarfinu. Þetta er mjög skemmtileg mynd en hún hefur verið þessi óvænta mynd á hátíðum í ár. Mynd sem enginn bjóst við miklu af en svo hefur hún verið mjög vinsæl og hlotið fullt af verðlaunum.“

Skólastjórinn Kevin McArevey er gestur á hátíðinni og svara spurningum gesta eftir sýningu í dag. MYND/AÐSEND

Ókeypis aðgangur

Alla helgina verður hægt að horfa á áhugaverðar heimildarmyndir hvaðanæva að úr heiminum í Bíóhöllinni á Akranesi, en ókeypis er inn á allar myndirnar. Þetta er því tilvalið tækifæri fyrir heimafólk að skella sér í bíó en líka fyrir íbúa höfuðborgarsvæðisins að skella sér upp á Skaga, horfa á eina til tvær heimildarmyndir og njóta svo þess sem bærinn hefur upp á að bjóða. Kíkja á Langasand, skella sér í Guðlaugu og fá sér að borða á einum af veitingastöðum bæjarins.

Eliza Reid flutti opnunarávarp við setningu hátíðarinnar á miðvikudagskvöldið.

Fyrir barnafólk er líka margt skemmtilegt í gangi á hátíðinni, en fyrr í vikunni var haldið námskeið í heimildarmyndagerð fyrir 8-12 ára börn. Á námskeiðinu voru gerðar 10 heimildarmyndir sem verða sýndar klukkan 12.00 á Bókasafni Akraness.

„Við verðum líka með barnakarnival við Bíóhöllina á milli 12.30 og 14.00. Þar verður ratleikur. Bollywood-dansar, phenakistoscope-gerð, sem er gömul aðferð til að búa til hreyfimyndir, og margt fleira skemmtilegt. Þá verða einnig veitingar í boði,“ segir Ingibjörg.

Í kvöld verður haldið ball með Inspector Spacetime, Högna Egils og DJ Ívari Pétri og segist Ingibjörg vonast til að sem flestir mæti og dansi fram á nótt.

„Á morgun verður svo lokaathöfnin og verðlaunaafhending. Dómnefndir veita verðlaun fyrir bestu myndir hátíðarinnar og besti áhorfandinn fær áhorfendaverðlaun,“ segir hún.

Ingibjörg segir að hátíðin sé farin að festa sig í sessi sem fastur viðburður á Akranesi og heimafólkið taki henni fagnandi.

„Við erum mjög ánægð með þátttöku þeirra.“

Allar upplýsingar um dagskrána má finna á icedocs.is