Heima er best því þar er ég með fjölskyldunni minni og þar höfum við átt margar góðar stundir á COVID-tímum. Þar slær hjartað,“ segir Dagný Gylfadóttir, keramíker og fagurkeri með meiru.

Dagný er dóttir Gylfa Snorrasonar og Guðnýjar Jónsdóttur, þriggja barna móðir og gift Steina flugmanni.

„Ég hef búið á nokkrum stöðum um ævina. Sem barn í Svíþjóð og á Akureyri, síðan í Reykjavík og einnig á Englandi þar sem ég var í háskólanámi,“ greinir Dagný frá á fallegu heimili sínu í Grafarvoginum, þar sem listmunir skipa veglegan sess.

„Heimilið er stílhreint og mjúkir litir allsráðandi, afslappað með þægindi í fyrirrúmi,“ lýsir Dagný stílnum heima.

Eftirlætis mublan hennar í innbúinu er stofusófinn þar sem ljúft er að slaka á eftir daginn.

„Annars er dúnsængin mín sá einstaki hlutur sem er ómissandi til að mér líði eins og heima,“ segir Dagný í fallegu hjónaherberginu sem hún málaði nýlega í kósí og brúnbleikum lit.

Dagný segist hvað stoltust af ljósum sem hún hannaði úr keramiki. FRÉTTABLAÐIÐ/VALLI

Indælt að brjóta saman þvott

Dagný er mikill sælkerakokkur og afburða bakari. Hún er mjög flink í að baka franskar makkarónur og gerir það fyrir veislur.

„Ég baka makkarónur í mörgum litum og bragðtegundum og svo baka ég oft enskar skonsur með kaffinu heima. Rétturinn sem ég elda oftast fyrir heimilisfólkið er humarpasta með ýmiss konar skemmtilegu bragði, til dæmis kirsuberjatómötum og saffran,“ segir Dagný sem finnst heimilislegasta upplifunin vera við borðstofuborðið þegar fjölskyldan borðar saman kvöldmat og allir segja frá sínum degi.

„Það besta við skammdegið og árstímann núna er að kveikja á kertum og fá sér hvítvínsglas, og spjalla eða spila.“

Uppáhalds húsverk Dagnýjar er að elda veislumat, skreyta með blómum og brjóta saman þvott.

„Til að fullkomna heimilið langar mig nú mikið í nýtt málverk eftir Höddu Fjólu Reykdal og ný lesljós í hjónaherbergið, en síðast keypti ég nýtt hjónarúm úr Svefni og heilsu, og lítið kaffihliðarborð úr mattgylltum málmi úr Habitat.“

Dagný notar ýmislegt úr eigin hönnun til heimabrúks, eins og blómavasana, bolla með gulllínu og fjallabolla úr postulíni sem hún handteiknar á fjallstoppana. FRÉTTABLAÐIÐ/VALLI

Fékk hvatningu frá mömmu

Sem telpu dreymdi Dagnýju um að vinna við list og sköpun.

„Móðir mín er listræn og fór oft með okkur á söfn. Eftir bankahrunið 2008 hættu allir að byggja og ég missti vinnuna á arkitektastofu. Þá ákvað ég að drífa mig í langþráð keramiknám, en ég hafði þá verið að leira í nokkur ár á kvöldnámskeiðum. Móðir mín hvatti mig mikið til að fara í draumanámið. Það hefur gefið mér mikla gleði og ég elska að hanna hluti frá grunni. Starfið er mjög gefandi og ég hef eingöngu starfað sem keramikhönnuður frá útskrift,“ segir Dagný sem er sjálfstætt starfandi og hannar undir merkinu DayNew sem er bein þýðing á nafninu hennar.

Dagný er með vinnustofu í Íshúsi Hafnarfjarðar þar sem hægt er að kíkja til hennar flesta daga.

„Ég er afar þakklát fyrir hvað viðskiptavinir mínir taka mér vel og margir koma til mín aftur. Ég finn að íslensk keramikhönnun er alltaf að verða vinsælli. Frá því ég útskrifaðist 2014 hefur mikið breyst og Íslendingar kunna æ betur að meta íslenskt handverk.“

Nýju ljóskerin Sólrún og Sirkus. Átján ára dóttir Dagnýjar heitir Eva Sólrún og nefnist luktin í höfuðið á henni. FRÉTTABLAÐIÐ/VALLI

Afmælishátíð á Vetrarhátíð

Hugmyndir að sköpunarverkum sínum fær Dagný þegar hún leggst til hvílu á kvöldin.

„Þá hugsa ég gjarnan um ýmis skemmtileg form. Mér finnst gaman að hanna nýja hluti sem eru samt einkennandi fyrir mína hönnun og að fólk þekki vörurnar mínar og segi: „Já, ég sá að þetta var DayNew-vasi!“,“ segir Dagný sem er hvað stoltust af loftljósunum sínum og gullvösunum.

„Ég nota eigin nytjalist heilmikið til heimabrúks. Ég er með kaffibolla heima, súpuskálar, blómapotta og fullt af blómavösum, því ég elska að vera með afskorin blóm í vösum.“

Hún er gullfalleg keramiklínan frá DayNew. MYND/ÍRIS STEFÁNSDÓTTIR

Fram undan er afmælishátíð Leirlistafélagsins sem verður 40 ára í ár.

„Sýningin er hluti af Vetrarhátíð í Reykjavík sem hefst nú á fimmtudaginn 4. til 8. febrúar. Þar verða sýnd 40 ljósker leirlistamanna úr keramiki og sjálf mun ég sýna tvö ný ljósker úr snjóhvítu postulíni,“ segir Dagný full tilhlökkunar en afmælissýningin verður í Hönnunarsafni Íslands á Garðatorgi 1 í Garðabæ.

Þess má geta að Dagný er einn af eigendum keramikgallerísins Kaolin og setti í loftið nýja og fallega vefsíðu, kaolin.is, fyrir jólin, í samstarfi við KoiKoi.

Fylgist með því sem Dagný er að fást við á Facebook og Instagram. Hægt er að fá gullfallegt keramikið hennar í Kaolin á Skólavörðustíg, Hrími í Kringlunni og á fleiri stöðum.

Dagný er sælkerakokkur og bakari og gefur lesendum uppskrift af gómsætum enskum skonsum með döðlum í. FRÉTTABLAÐIÐ/VALLI

Tíu enskar skonsur

400 g hveiti

100 g brætt smjör

3 dl mjólk

4 tsk. lyftiduft

1 tsk. salt

100 g döðlur saxaðar.

Blandið þurrefnum saman í skál og hrærið saman í hrærivél. Bætið mjólk út í, svo smjörinu og látið hnoðast vel. Mótið nokkrar bollur og setjið á ofnplötu með bökunarpappír. Bakið við 250°C í forhituðum ofni og með pensluðu smjöri í 11 mínútur. Berið fram með „lemon curd“.

Glæsilegur glitrandi alparósbleikur vasi með ekta gulli. FRÉTTABLAÐIÐ/VALLI
Dagný bakar franskar makkarónur í allskyns litum og bragðútgáfum fyrir veislur. FRÉTTABLAÐIÐ/VALLI
Þegar Covid-19 skall á heimsbyggðina í fyrra bjó Dagný til fallega fjallabolla sem hún ferðaðist með um landið. Þeir eru handgerðir út postulíni og hver og einn þeirra með handteiknuðu mynstri. FRÉTTABLAÐIÐ/VALLI