Þegar skammdegið nálgast kallar hugurinn oft á mat sem huggar og umvefur sálina. Oftar en ekki eru þeir réttir orkumiklir, þungir og stundum hitaeiningaríkir en það er ekkert mál og alls ekki síðra að elda kósímat sem er hollur, bragðgóður og með beina tengingu í náttúru og uppskeru heimsins.

Hér gefast tveir heilnæmir og ljúffengir réttir sem kæta bæði munn og maga þeirra sem njóta. Þeir kalla á smávegis nostur yfir eldamennskunni en hvað er það á milli vina þegar ekkert er að gera annað en að hafa það huggulegt saman í haustvindum og kertaljósum? Það er svo upplagt að taka saman skrafl eða tafl eftir matinn, eða þá Ólsen, Ólsen og slönguspil við krakkana.

Fylltar sætar kartöflur

Sætar kartöflur eru einstaklega hollar og góðar. Þær eru trefjamiklar og innihalda nauðsynleg vítamín og steinefni, eins og A-vítamín, B6-vítamín og magnesíum.

4 sætar kartöflur af miðlungsstærð

1 dós svartar baunir eða nýrnabaunir

¼ bolli maísbaunir

¼ bolli fetaostur

¼ bolli grilluð rauð paprika

3 msk. góð ólífuolía

3 msk. steinselja eða kóríander, smátt saxað

Salt og pipar

Aðferð:

Stingið nokkur göt á sætu kartöflurnar með litlum hnífi og bakið í ofni við 180°C þar til orðnar mjúkar. Blandið saman svörtum baunum, fetaosti, grillaðri papriku, ólífuolíu, steinselju, salti og pipar. Skerið því næst kartöflurnar í tvennt og skrapið kartöflukjötið úr hverjum helming. Setjið í pott og hrærið smjöri og púðursykri saman við. Fyllið þá kartöfluhýðin með svolitlu af kartöflumúsinni ásamt gómsætri baunablöndunni og bakið í ofni við 180°C í 10 mínútur. Toppið með sýrðum rjóma, til dæmis með graslauk eða habanero.

Hvað er heimilislegra en ilmur af bökuðum eplum með kanil og möndlum?

Bökuð epli með kanilosti og möndlum

Þessi ljúfi og holli eftirréttur fyllir heimilið af unaðslegri angan og kórónar notalegan málsverð á haustkvöldi.

3 epli, skorin í tvennt og kjarnhreinsuð

½ bolli saxaðar möndlur

1 og ½ bolli vatn

1 og ½ msk. smjör, skorið í 6 þunna bita (kaldir)

Kanill

250 g mascarpone-ostur

1 og ½ msk. hlynsíróp

½ tsk. kanill

½ tsk. vanilludropar

¼ tsk. múskat

Aðferð:

Hitið ofn í 180°C. Raðið eplahelmingunum í eldfast mót með sárið upp, setjið smjör í kjarnaholuna og stráið svolitlum kanil og söxuðum möndlum yfir eplin. Hellið vatninu í mótið og breiðið yfir með álpappír. Bakið í 30 mínútur. Á meðan á bakstrinum stendur er góður tími að setja mascarpone-ost, hlynsíróp, kanilduft, vanilludropa og múskat í skál og hræra varlega saman. Takið eplin úr ofninum og berið fram volg með 1 til 2 matskeiðum af mascarpone-ostablöndunni.