Fataframleiðendurnir 66°Norður og GANNI kynntu framhald á samstarfi fyrirtækjanna á tískuvikunni í Kaupmannahöfn í febrúar fyrr á þessu ári. Áður höfðu fyrirtækin gefið út samstarfslínu sem kom út í mars. Aðspurð út í það hvernig samstarfið við þetta ört vaxandi danska merki kom til, svarar Rakel; „Eigendur GANNI, Ditte og Nikolaj, eru aðdáendur merkisins og höfðu notað fatnaðinn í útivist og skíðaferðir, þannig að það má segja að þetta hafi fyrst byrjað þar. Þau hittu svo forstjóra okkar á einum tímapunkti og viðræður og hugmyndir að samstarfi byrjuðu að fæðast. Það sem GANNI fannst spennandi er þessi mikla saga sem 66°Norður á og sérþekkingin sem við höfum á hönnun og framleiðslu á tæknilegum fatnaði sem finnst ekki annars í tískuheiminum.“

Andstæður merkjanna heilluðu

„GANNI er mjög þekkt danskt tískumerki sem einblínir á kvenlegar línur og kemur því úr annarri átt en við þannig andstæða merkjanna heillaði okkur,“ segir Rakel. „Mér finnst merkin ótrúlega ólík þar sem kúnni GANNI eru ungar konur sem eru í kjólum með allskonar áberandi prenti en 66°Norður hannar tæknilegan fatnað fyrir alla aldurshópa. En það sem þau eiga sameiginlegt er ákveðinn Scandi-stíll enda eru bæði merkin staðsett á Norðurlöndunum.“

MNO_GANNI_LOOK_16.jpg

Fóru út fyrir boxið með ævintýralega flík

Hvernig fer svo hönnunarferlið fram þegar tvö ólík merki í sitthvoru landinu leiða saman hesta sína? „Ferlið á þessari línu byrjaði fyrir ári síðan þegar Shila, sem er aðstoðar listrænn stjórnandi hjá Ganni heimsótti höfuðstöðvar 66°Norður hér í Garðabænum og við vörðum tveimur dögum í hugmyndavinnu. Við byggðum nánast alla stílana á okkar sniðum, sem við uppfærðum nema einn skyrtukjóll, sem er byggður á kjól frá GANNI. Hann er einangraður með Powerfill fillingu og opinn í bakið. Þannig var gaman að nýta tækifærið og fara aðeins út fyrir okkar box og tvinna saman merkin tvö í aðeins ævintýralegri flík þó hún sé ekki eins praktísk og aðrar.“

MNO_GANNI_LOOK_18.jpg

Póstar, símtöl, Skype og Facetime

Rakel segir það ekki hafa staðið þeim fyrir þrifum í ferlinu að vera staðsett í sitthvoru landinu. „Við erum vön framleiðslu landa á milli þar sem okkar eigin verksmiðja er staðsett í Lettlandi þannig samstarfið gekk vel og byggist á póstum, símtölum, Skype og Facetime. Við gerðum tvær til þrjár prótótýpur fyrir hverja flík til að passa að bæði snið og framleiðsla mæti okkar gæðastöðlum. Það var þó ekki laust við smá stress þegar það rétt náðist að senda lokaprufurnar til Danmerkur fyrir tískusýningu GANNI, aðeins nokkrum dögum fyrir sýninguna sem var í lok janúar.“

MNO_GANNI_LOOK_21.jpg

Erum alltaf að fylgjast með í kringum okkur

Fyrsta samstarf merkjanna tveggja var kynnt síðasta vor og fékk mikla athygli í tískupressunni erlendis. „Það fyllir mig miklu stolti að vinna hjá fyrirtæki sem stendur fyrir gæði og ævintýramennsku og er ekki hrætt við að fara ótroðnar slóðir.“ Aðspurð hvort framhald verði á samstarfinu segir Rakel það ekki í farvatninu á næstu misserum en mikil ánægja sé með þessar tvær línu sem hannaðar voru í sameiningu. „Við erum alltaf að fylgjast með í kringum okkur, hvort sem það eru ungir íslenskir hönnuðir sem eru að byrja eða reyndari fatamerki erlendis. Það eru allskonar spennandi viðræður í gangi en ekkert sem má segja frá,“ segir Rakel að lokum en það verður spennandi að fylgjast með næstu skrefum.