Harry og Meg­han stálu Insta­gram nafni Kevins

Breski öku­kennarinn Kevin Keil­ey var sviptur not­enda­nafninu sínu á Insta­gram og var not­enda­nafnið gefið Harry Breta­prins og Meg­han Mark­le sem stofnuðu á dögunum nýjan Insta­gram að­gang. Hann segist upp með sér vegna málsins en einnig pirraður, að því er fram kemur á vef BBC.

Líkt og Frétta­blaðið greindi frá í gær stofnuðu her­toga­hjónin að­ganginn í fyrra­dag en þau hafa nú fengið sitt eigið starfs­fólk sem er óháð starfs­fólki her­toga­hjónanna af Cam­brid­ge í Kensington höll, það er Willi­am Breta­prins og Kate Midd­let­on en pörin nýttu sér áður sama starfs­fólkið. Meg­han og Harry slógu met í fylgjendafjölda á fyrsta sólar­hringnum og eru nú með 3,5 milljónir fylgjenda.

Kevin hafði notað not­enda­nafnið @sus­sex­royal í rúm þrjú ár en hann er stuðnings­maður enska fót­bolta­liðsins Rea­ding og er gælu­nafn þeirra „the Royals“ eða „hinir eðal­bornu“ og býr Kevin jafn­framt í vestur Sus­sex.

Kevin segist fyrst hafa áttað sig á því að hann hafi verið sviptur not­enda­nafninu þegar hann fékk skila­boð. „Ég fékk hnyttin skila­boð frá syni mínum sem sagði „Ha ha, ég sé að not­enda­nafnið þitt er horfið,“ segir Kevin sem spurði hann hvað í ó­sköpunum hann meinti. Sonurinn sagði honum þá að kíkja á Insta­gram.

„Allt í einu var not­enda­nafnið mitt ekki lengur @sus­sex­royal heldur orðið @_sus­sex­royal_. Það hafði bara verið tekið,“ segir Kevin sem viður­kennir að hann hafi ekki haft það marga fylgj­endur og ekki birt margar færslur, en hann segist þó nota miðilinn til að bregðast við færslum og fylgjast með.

Enginn í konungs­fjöl­skyldunni hafði sam­band við Kevin áður en notendanafnið var tekið, en í til­kynningu frá Insta­gram segir að not­enda­nafninu hafi verið breytt í sam­ræmi við reglur miðilsins sem segir að miðillinn á­skili sér rétt til að breyta að­göngum sem hafa verið ó­virkir í á­kveðinn tíma.

Kevin segist í sam­tali við breska ríkis­út­varpið vera ei­lítið pirraður að miðillinn hafi ekki haft sam­band við sig en hann heldur þó nafninu á Twitter, þar sem not­enda­fjöldi hans hefur rokið upp eftir að Meg­han og Harry stálu Insta­gram not­enda­nafninu hans.

„Harry og Meg­han, ef þið viljið Twitter not­enda­nafnið mitt, þá kannski getið þið verið nógu heiðar­leg til að tala við mig?“ segir Kevin við BBC, að­spurður hvað hann myndi segja við her­toga­hjónin ef hann hefði tæki­færi til að tala við þau.