Femínískur útsaumur Bjargeyjar Önnu Guðbrandsdóttur hefur vakið mikla athygli meðal vina og fjölskyldumeðlima undanfarna mánuði en hún deilir myndum af verkum sínum á samfélagsmiðlum. Þar fá meðal annars þekkt slagorð á borð við „Konur lifa ekki á þakklætinu“, „En þori ég, vil ég, get ég? Já ég þori, get og vil“, „Smash the patriarchy“, „Women belong in all places where decisions are being made“ að njóta sín auk skemmtilegra orðaleikja úr þekktum dægurlagatextum á borð við „Girls just wanna have funding for scientific researsch“.

Þrátt fyrir nýfengna athygli segist Bjargey vera nýgræðingur í saumaskapnum.

„Ég byrjaði fyrir tilviljun í október á síðasta ári. Systurdætur mínar voru að sauma út jólapúða sem ég kláraði þegar þær misstu áhugann og þá fann ég hvað ég hafði gaman af saumaskapnum. Ég hafði ekki saumað út síðan í grunnskóla en oft langað til að gera eitthvað í höndunum. Þarna fann ég loks handavinnu sem hentaði mér og byrjaði á dúllulegri jólamynd en fann strax að mig langaði ekki að sauma út hefðbundnar myndir.“

Hér með greininni má sjá sýnishorn af þeim myndum sem Bjargey hefur saumað.

Fínlegt og ósvífið

Það sem Bjargeyju finnst skemmtilegt við femínískan útsaum er að blanda saman fínlegu og kvenlegu handverki við harðorð og oft frekar ósvífin slagorð.

„Þetta fyrirbæri kallast á ensku craftivisim, það er blanda handverks og aktívisma, og er skilgreint sem mjúk aðferð við að koma mikilvægum skilaboðum á framfæri.“

Hún segist hafa séð femínískar útsaumsmyndir á samfélagsmiðlum, merktar #hannyrðapönk og #feministcrossstitch, og leitaði að uppskriftum út frá þeim.

Hugmyndir úr öllum áttum

Það er misjafnt hvernig hugmyndavinnan fer fram.

„Stundum finn ég bara uppskrift með flottu slagorði og sauma það út. En svo langar mig líka að sauma á íslensku og þá hef ég leitað að slagorðum úr íslenskri kvennabaráttu. Ég hef notað munstur úr Feminist Cross-stitch sem bakgrunn og útfært slagorðin á íslensku í stað þeirra ensku. Núna er ég að skoða gömul íslensk munstur og er að vinna að mynd úr því og setningunni „Engin hornkerling vil ég vera“ úr Njálu. Svo finnst mér gaman að sauma út orðatiltæki sem vinir og fjölskylda nota og segja dagsdaglega en eru ekki endilega skrifuð niður neins staðar. Þannig verður útsaumurinn persónulegri.“

Frábærar viðtökur

Viðtökurnar hafa að sögn Bjargeyjar verið frábærar eftir að hún hóf að birta myndir af saumaskapnum á samfélagsmiðlum.

„Vinkonur og kunningjakonur fóru mjög fljótlega að spyrjast fyrir um myndir og núna hef ég varla undan. Mér finnst skemmtilegast að eiga hannyrðaskipti en ég hef bæði saumað mynd fyrir vettlingapar og mynd fyrir húfu og kraga. Þannig lifir hannyrðahagkerfið góðu lífi.“

Sjálf er Bjargey sveitastelpa að eigin sögn sem hefur búið í borginni meira en hálfa ævina.

„Ég er menntuð í líffræði og stjórnun og hef unnið í Háskóla Íslands í tíu ár. Þótt ég búi ein á ég risastóra fjölskyldu úti á landi og í útlöndum, elska að ganga á fjöll, bæði á eftir kindum og mér til ánægju og yndisauka. Ég ligg í leti á milli þess sem ég kem hlutunum í verk en ég tók meðal annars þátt í stofnun Samtaka kvenna í vísindum og aðstoðaði nýlega við að koma Hinsegin Vesturlandi á laggirnar.“