Sjöfn segist hafa fengið prjónaáhugann í kringum tólf ára aldurinn en móðir hennar var mikil prjónakona og hannaði meðal annars uppskriftir fyrir prjónablaðið Ýr. „Í einu kennaraverkfallinu á menntaskólaárunum fannst mér ég þurfa að hafa eitthvað að gera og datt í hug að prjóna mér peysu. En eins og mitt nánasta fólk veit þá kann ég ekki að fara eftir uppskriftum svo ég fór í garnbúðina í hverfinu, keypti garn og prjóna og spurði afgreiðslukonuna: „Hvernig prjóna ég svo peysu?“ Svo rölti ég reglulega niður í búð til að fá aðstoð við það sem ég ekki skildi.

Áður en ég vissi af var ég farin að hjálpa vinkonum að prjóna sér peysur og eftir verkfallið skipti ég yfir á hönnunar- og textílbraut í FB. Þar útskrifaðist ég með toppeinkunnir en á þeim tíma sá ég ekki fyrir mér að geta framfleytt mér sem prjónakona svo ég fór í háskólanám og kláraði uppeldis- og menntunarfræði, bæði BA- og MA-próf, og prjónarnir fóru í biðstöðu.“

Synirnir Kári Sjafnar og Ari Sjafnar eru duglegir að sitja fyrir í hönnun móður sinnar. Mynd/Aðsend

Eins og hebreska fyrir mér

Það var svo árið 2015 þegar Sjöfn gekk með sitt annað barn að hún tók prjónana aftur upp af fullum krafti. „Ég reyndi við uppskriftir, bæði á dönsku og á íslensku, en þetta er bara eins og hebreska fyrir mér. Endalausar skammstafanir og alltaf gert ráð fyrir því að maður kunni allt. Á endanum gafst ég upp og fór að prjóna upp úr höfðinu á mér.Einn daginn spurði Grétar, maðurinn minn, mig hvers vegna ég gerði ekki uppskriftir að flíkunum sem ég var að prjóna. Í fyrstu fannst mér þetta galin hugmynd enda kunni ég ekkert að skrifa uppskriftir en ákvað svo að taka þessari áskorun og prófaði að gera eina uppskrift. Hún heppnaðist vel miðað við litla sem enga þekkingu á því sviði.“

Uppskriftirnar eru nú orðnar yfir hundrað talsins og Sjöfn segir þekkinguna hafa aukist dag frá degi. „Ég smíða mínar uppskriftir að mestu leyti út frá sjálfri mér. Með tímanum sá ég hvað það var sem mér fannst vanta fyrir til dæmis óvana prjónara og það var að leiða þá í gegnum ferlið frá upphafi til enda, hafa góðar og ítarlegar útskýringar á hverju skrefi fyrir sig.“

Sjöfn segir nánast hvert einasta íslenska mannsbarn vera í heimaprjónuðum fötum þessa dagana. Mynd/Aðsend

Allir í heimaprjónuðu

Sjöfn selur uppskriftirnar í gegnum vefsíðu sína stroff.is og segir viðbrögðin hafa verið góð frá fyrsta degi. „Þegar ég byrjaði var ekki mikið framboð af svona uppskriftum og þær uppskriftir sem ég hafði prjónað eftir eða reynt að prjóna eftir voru torlesnar og flóknar í framsetningu. Mig langaði að koma með uppskriftir á mannamáli, uppskriftir sem flestir geta lesið sig í gegnum án þess að vera þaulvanir prjónarar. Viðskiptahópurinn okkar er orðinn mjög stór og aldursbilið mjög breitt.Það er sérstaklega gaman þegar maður rekst á Insta­gram-prófíla hjá þekktu og efnilegu ungu íslensku fólki sem er að pósta myndum af flíkum sem prjónaðar eru eftir mínum uppskriftum. Nýlega sá ég að okkar allra flottasta Salka Sól er farin að prjóna og prjónar eftir mínum uppskriftum. Það gleður mig mikið að sjá hversu margir prjóna eftir mig og segir mér að ég sé að gera eitthvað rétt.“

Sjöfn segir prjónaflíkur sannarlega vera að sækja í sig veðrið. „Það er nánast hvert einasta íslenska mannsbarn í heimaprjónuðum fötum. Ekki bara peysum heldur samfellum, buxum, stuttbuxum, göllum, húfum, vettlingum og fleiru. Það sama má segja um fullorðins flíkurnar og peysur á unglingana.“

Sjöfn ásamt unnusta sínum Grétari Karli en í dag starfa þau bæði alfarið við fyrirtæki sitt Stroff.is. Fréttablaðið/Anton Brink

Langur vinnudagur

Litla hugmyndin er nú orðin að fyrirtæki sem Sjöfn rekur ásamt unnusta sínum Grétari Karli og eru þau bæði í fullu starfi við reksturinn. „Í netversluninni seljum við prjónauppskriftir, hágæða garn, prjóna, dúska, eina prjónabók og leðurmerki til að skreyta flíkurnar og sendum um allt land og Norðurlöndin á hagstæðu verði. Íslenska síðan fær núna í kringum 30 til 40 þúsund heimsóknir mánaðarlega.Ég sé alfarið um að hanna, prjóna, skrifa uppskriftir og taka myndir. Grétar sér um fjármálin, auglýsingarnar, samskipti við lager og allt annað sem fellur til. Það er oftast mikið að gera hjá okkur og vinnudagurinn endar oft ekki fyrr en löngu eftir miðnætti. Hér er líka unnið allar helgar milli þess sem við skiptum á bleium, leikum við börnin og sinnum vinum og fjölskyldu,“ en börnin eru þrjú og sá yngsti aðeins ellefu mánaða.„Við reynum að draga mörkin við svefnherbergið, það er að segja að þegar við erum komin upp í rúm sé vinnudegi lokið en stöndum nú samt ekki alltaf við það og erum að svara tölvupóstum eftir að við leggjumst á koddann,“ viðurkennir Sjöfn.

Þýða á önnur tungumál

Þau Sjöfn og Grétar opnuðu snemma í ferlinu einnig netverslun á dönsku og létu þýða allar uppskriftirnar. „Því miður erum við ekki með virkan þýðanda eins og er, en erum að ganga frá samkomulagi við eina góða svo danska síðan fer aftur á fullt von bráðar. Þýðandi þarf nefnilega að hafa bæði tungumálin á hreinu sem og prjóna-lingóið, eða prjónískuna eins og við köllum þetta hér heima. Við erum líka spennt fyrir því að þýða yfir á þýsku og norsku en þar sem við erum með einn 11 mánaða gorm heima og erum bara tvö í þessu þá er tíminn af skornum skammti. Við komum til með að hjóla í þetta þegar Kári litli byrjar á leikskóla.“

Það er nóg að gera á heimilinu enda Kári, yngri sonurinn aðeins 11 mánaða og ekki kominn á leikskóla en þegar af því verður ætla þau Sjöfn og Grétar sér enn stærri hluti. Mynd/Aðsend

Kennir algjörum byrjendum

Eins og fyrr segir hefur barnafatnaðurinn slegið í gegn og nýverið bættust fullorðins peysur við en Sjöfn vildi ná til þeirra sem ekki eru að prjóna á börn. „Ég finn oft peysur í búðum sem eru fullkomnar í sídd en of víðar eða með fullkomið mynstur en of stuttar og þar fram eftir götunum. Núna hanna ég það snið sem mig langar í og veit að fellur vel í kramið hjá mínum fylgjendum.“ Nýverið bætti Sjöfn einnig við prjónanámskeiðum. „Með mér í því er Andrea Ida Jónsdóttir, leikari, áhrifavaldur og viðburðastjóri. Við erum með námskeið fyrir algjöra byrjendur þar sem við kennum grunninn í prjóni, að fitja upp, prjóna slétt og brugðið, fella af, lesa uppskrift og mæla prjónfestu. Svo höfum við verið með húfunámskeið og tvö peysunámskeið en þá tökum við ákveðnar peysur fyrir og lærum að prjóna eftir þeim uppskriftum.Þetta hefur gengið rosalega vel og nemendur verið yfir höfuð mjög ánægðir með námskeiðin,“ segir Sjöfn að lokum en það er svo sannarlega ýmislegt á prjónunum á næstunni hjá þeim hjúum.

Sjöfn hefur nýverið bætt við í uppskriftarflóruna fullorðins peysum enda ekki allir að prjóna á börn. Mynd/Aðsend