Fólk

Hagnýtt nám sem opnar margar dyr

KYNNING - Í Menntaskólanum í Kópavogi er boðið upp á matsveina- og matartæknanám fyrir þá sem hafa reynslu af veitingageiranum. Námsleiðirnar eru stuttar, hagnýtar og opna margar dyr.

Einar Hreinn Ólafsson segir að matartæknanámið í MK hafi gert hann betri og fjölhæfari fagmann. MYND/ANTON BRINK

Guðlaug Ragnarsdóttir, fagstjóri matsveina- og matartæknanámsins við Menntaskólann í Kópavogi, segir að námið sé vinsælt, stutt, hagnýtt og hentugt fyrir einstaklinga sem hafa reynslu af vinnu í veitingageiranum en vilja bæta við sig menntun og verða öruggari í starfi. Kennsla fer fram á kvöldin fjóra daga vikunnar, frá klukkan 17.00 til 21.30.

Skipulag námsins

„Það er gerð ákveðin krafa til nemenda um að þeir hafi unnið í viðurkenndu eldhúsi eða við sambærileg störf áður en þeir hefja námið,“ segir Guðlaug. „Gert er ráð fyrir að einstaklingar séu að bæta við þá kunnáttu sem þeir búa þegar yfir og þeir sem eru orðnir 23 ára og hafa þriggja ára starfsreynslu geta sótt um að fara í raunfærnimat hjá Iðunni fræðslusetri.

Matsveinanámið er tvær annir og matartæknanámið er þrjár annir,“ segir Guðlaug. „Fyrstu tvær annirnar eru kenndar saman og þriðja önnin er sérhæfing matartækna. Báðar greinar gefa fagbréf.“

Fyrir hverja er námið?

„Námið býður upp á mikla möguleika í nútímasamfélagi. Það er fyrir alla sem hafa eða vilja starfa við matreiðslu og stjórnun í mötuneytum vinnustaða og skóla, í eldhúsum heilbrigðisstofnana og á fiski- og flutningaskipum,“ segir Guðlaug. „Með aukinni ferðaþjónustu hefur einnig skapast fjölbreyttari starfsvettvangur fyrir fólk með þessa menntun.

Guðlaug Ragnarsdóttir, fagstjóri matsveina- og matartæknanámsins við Menntaskólann í Kópavogi. MYND/ANTONBRINK

Námið gerir fólki kleift á að takast á við fjölbreytt verkefni á vinnustað. Á báðum námsbrautum er námið byggt upp af faggreinum eins og matreiðslu, aðferðafræði, matseðlagerð, hráefnisfræði, hreinlætis- og örverufræði og næringarfræði, svo eitthvað sé nefnt, en þetta er allt mjög hagnýtt,“ segir Guðlaug. „Námið er mjög fjölbreytt og nemendur læra að elda alls konar rétti sem henta breiðum og fjölmenningarlegum hópum. Þar erum við að tala um holla rétti, fína veislurétti og rétti frá ólíkum menningarheimum. Í matartæknanáminu læra nemendur einnig að elda fyrir einstaklinga með ofnæmi og óþol og ýmiss konar sérfæði fyrir sjúklinga.“

Mikil vinna en gefandi

Ernesta Cibulskiené er frá Litháen og útskrifast sem matsveinn 24. maí næstkomandi. Hún hefur starfað sem matráður síðastliðin fimm ár í mötuneyti Menntaskólans í Kópavogi. Ernesta hefur mikinn áhuga á matseld og dreif sig í námið eftir hvatningu frá félögum í skólanum.

„Ég sé ekki eftir því, vegna þess að námið er skemmtilegt og allt sem ég hef lært nýtist mér í starfi. Ég er öruggari og skil allt miklu betur,“ segir Ernesta. „Allar námsgreinarnar eru mikilvægar og við lærum mörg gagnleg grundvallaratriði, eins og aðferðafræði matreiðslu, að matreiða frá grunni, hráefnisfræði og að gefa réttar skammtastærðir. Í næringarfræðinni lærum við líka um næringargildi réttanna sem við eldum, sem skiptir máli þegar við setjum saman matseðil. Svo fannst mér einstaklega skemmtilegt að læra um matargerð frá mismunandi menningarheimum og eftir að ég lærði um íslenska matarhefð skil ég hana betur.

Mér fannst áfanginn sem tengist framreiðslu einstaklega nytsamur og skemmtilegur, en þar lærum við til dæmis að leggja á borð, brjóta alls konar servíettubrot og að búa til blómaskreytingar,“ segir Ernesta. „Svo eru kennararnir líka skemmtilegir og alltaf til í að hjálpa okkur nemendum, svo við lærum mikið á stuttum tíma.

Ernesta Cibulskiené segir að námið sé skemmtilegt, nýtist vel og hafi gert hana öruggari með sig. MYND/ANTON BRINK

Námið fer alfarið fram á íslensku, svo fyrsti mánuðurinn var erfiður fyrir mig. En það var mikil samkennd í hópnum, allir voru til í að hjálpa öllum og kennararnir voru alltaf tilbúnir til að útskýra námsefnið betur. Maður á ekki að vera hræddur við að spyrja og ég lærði mikið í íslensku samhliða náminu. Þannig að þetta er mikil vinna, en gefandi,“ sagði Ernesta, sem stefnir á að fara næst í matartæknanám.

Úthugsaðri matseðlar og meiri fagmennska

Einar Hreinn Ólafsson útskrifaðist sem matartæknir í desember. Hann hafði unnið sem matráður á leikskóla í nokkur ár áður en hann skellti sér í námið og hefur óbilandi áhuga á matreiðslu.

„Ég hef lagt mikinn metnað í hollan og góðan mat fyrir leikskólabörn sem er unninn frá grunni og ég tel næringu barna sérlega mikilvæga,“ segir Einar. „Námið var frábær viðbót og hefur nýst mér mjög vel í starfi. Mér fannst sérstaklega gagnlegt að læra um matseðlafræði, vinnuskipulag, næringarfræði og sérfæði.

Matseðlagerð er heildarskipulag næringar og það þarf að vera úthugsað, svo orku- og næringarþörf sé sinnt fyllilega. Ég nýti mér næringarútreikning sem ég lærði í næringarfræðinni til að fullvissa mig um að matseðillinn uppfylli þörf barnanna til að vaxa og dafna,“ segir Einar. „Það kom dálítið á óvart hversu orkuskertar sumar máltíðir eru og ég þarf stundum að bæta við auka meðlæti til að orkuþörf barnanna sé uppfyllt. Til dæmis fann ég út að það var ekki nóg að gefa börnunum eingöngu kjötsúpu í hádegismat, heldur var full þörf á að bæta grófu brauði við.

Matreiðsla sérfæðis er líka mjög gagnleg í mínu starfi, því fæðuóþol og ofnæmi er nokkuð algengt. Starfsnám tengt því var mjög fróðlegt og sá hluti námsins hefur algjörlega breytt aðferðum og þekkingu minni á matreiðslu fyrir fólk með mismunandi fæðuþörf,“ segir Einar. „Það er ómetanlegt að geta eldað bæði bragðgott og hollt maukfæði fyrir þá sem þurfa það og að þekkja til hráefna sem geta komið í stað annarra þegar það þarf að sleppa einhverju vegna óþols eða ofnæmis. Ég lærði líka um muninn á óþoli og ofnæmi og hversu mikilvægt er að sinna þessum þörfum vel.

Mér fannst matreiðsluaðferðir og vinnuskipulag líka afskaplega hagnýtir hlutar af náminu,“ segir Einar. „Á annasömum degi geta einfaldar aðferðir við skipulag auðveldað daginn til muna og haft úrslitaáhrif á hversu vandaður maturinn er. Gott skipulag gefur aukinn tíma til hráefnisvinnslu, sem sparar mikið til lengri tíma litið og auðveldar manni vinnuna alla daga.

Matartækninámið gerði mig að betri fagmanni,“ segir Einar. „Ég lærði faglegri vinnubrögð, fékk aukinn áhuga á fjölbreyttri matreiðslu og það auðveldaði mér starfið almennt.“

Athugasemdir

Auglýsing
Auglýsing

Tengdar fréttir

Fólk

Yngsti jóga­kennari landsins lærði á YouTu­be

Kynningar

TREO – skjót verkun við mígreni og tilfallandi verkjum

Fólk

„Sárt að hugsa að til séu vondar stjúpur“

Auglýsing

Nýjast

Lífið

Krakkar í Vatna­skógi eru ekki neyddir í sturtu

Lífið

Frægar YouTube stjörnur veðja á Ísland

Lífið

Hunger Games stjarna út úr skápnum

Menning

Andið eðli­­­­lega hlaut HBO-á­horf­enda­verð­­­­launin

Lífið

Vinsæl vegasjoppa á tæpar 40 milljónir

Lífið

Eiginkonan kynnti hann fyrir Eurovision

Auglýsing