Opnunarhátíðin er nú um helgina, 10. til 12. júní og eru opnar vinnustofur, listasmiðjur og fyrirlestrar hluti af hátíðinni.

„Ég hef tekið þátt í svona listahátíðum víða um lönd svo sem í Japan, Suður-Kóreu, Frakklandi, Litáen og á Íslandi og hef kynnst þar mikið af frábærum listamönnum og hefur það lengi verið draumur minn að standa sjálf að svona listahátíð og bjóða þá þeim listamönnum sem ég hef kynnst á þessum hátíðum,“ segir Ásta Vilhelmína Guðmundsdóttir listamaður, sem ásamt Byggðasafni Árnesinga stendur að alþjóðlegu listahátíðinni Hafsjó – Oceanus á Eyrarbakka, þar sem Ásta Vilhelmína býr.

„Önnur ástæða er að gera eitthvað svona fyrir samfélagið þar sem ég bý, en ég keypti hús á Eyrarbakka fyrir fimm árum sem ég gerði svo upp og mér finnst Eyrarbakki vera tilvalinn staður til að gera eitthvað svona: Hér er svo mikil saga og nálægð við hafið og þetta er í rauninni svo töfrandi staður. Þá er skemmtilegt að leiða saman erlendu listamennina og svo þá íslensku sem eru á svæðinu.“

Hópurinn saman fyrir framan húsið.
Anil Subba frá Nepal og Sung Baeg frá Suður-Kóreu við eitt listaverkið.

Tilgangur hátíðarinnar er að efla listsköpun á svæðinu, mynda tengsl við aðra menningarheima og fá sýn annarra á samfélagið við sjávarsíðuna.

„Markmiðið er auk þess að minnka bil á milli fólks og reyna að taka í burtu fordóma sem kannski myndast ef fólk veit ekki betur eða þekkir ekki nógu vel til. Þetta er ótrúlega skemmtilegt.“

Fjórtán erlendir listamenn taka þátt í hátíðinni og sex Íslendingar. Erlendu listamennirnir eru frá Suður-Kóreu, Japan, Máritíus, Póllandi, Litáen, Indlandi, Nepal, Frakklandi, Þýskalandi, Spáni og Ítalíu.

Opnunarhátíðin er helgina 10. til 12. júní og eru opnar vinnustofur og fyrirlestrar hluti af hátíðinni.

„Það verður mikið um að vera: Innsetningar úti um allt safnið. Svo eru útilistaverk og gjörningar. Dans og tónlist. Þetta verður voðalega yndislegt allt saman.“

Anil og Piotr að vinna að hljóðgjörningi í Eggjaskúrnum.
Sung Baeg er listamaður frá Suður-Kóreu.

Sagan og hafið

Ásta Vilhelmína segir að listamennirnir hafi komið til leiks eins og óskrifað blað og séu opnir fyrir stað og stund.

„Það sem hefur verið mjög sterkt í þessum hópi er ótrúlega mikil samvinna og kærleikur og þeir hjálpast að. Þetta er mjög sérstakur tímapunktur til að hittast í þessum tilgangi vegna Covid sem er vonandi að hverfa og fólk hefur einhvern veginn verið í mikilli þörf fyrir að skapa.“

Listamennirnir vinna verk sín á staðnum og hafa skúrar og skemmur hýst vinnuaðstöðu þeirra og hefur verið nóg að gera síðan erlendu listamennirnir komu til landsins um miðjan maí.

„Þeir verða fyrir áhrifum frá umhverfinu og náttúrunni,“ segir Ásta Vilhelmína og nefnir sérstaklega fjöruna og hafið og svo söguna.

„Þess vegna heitir listahátíðin Hafsjór; það er í rauninni hafsjór af sögu, fróðleik og náttúru og bara öllu mögulegu sem fólk er í rauninni búið að drekka í sig frá því það kom.“

Hópurinn saman fyrir framan kartöflugeymsluna eftir tón- og dansgjörning.

Ásta Vilhelmína segir að það sé frábært að vera í samstarfi við Byggðasafn Árnesinga og nefnir að safnstjórinn, Lýður Pálsson, og safnvörðurinn, Linda Ásdísardóttir, hafi opnað dyrnar fyrir listamönnunum.

„Það er auðvelt að sökkva sér í söguna og fá tilfinningu fyrir lífinu og hvernig það var hérna. Það er mjög dýrmætt. Ég sé að sagan og hafið endurspeglast mjög sterkt í listaverkunum.“

Hún nefnir líka þorpsbúa.

„Það sem gerist er að maður tengist mörgum þorpsbúum og það sem mér hefur fundist vera frábært er hvað þorpið er ofsalega móttækilegt fyrir þessu. Við vorum með gjörning í gamalli kartöflugeymslu en eigendur hennar voru til í að lána okkur geymsluna. Þetta er ótrúlega flottur staður og ætlunin er að nota skemmuna fyrir uppákomur í framtíðinni skilst mér, en þetta var í fyrsta skipti sem þetta var gert og það myndaði spennandi ramma í kringum verkin. Þetta var í rauninni spuni – tónlist og dans eða Butoh, sem er upprunnin í Japan. Mér finnst það vera magnað hvað allir eru að hjálpast að og vilja gera gott. Þorpsbúar hafa lánað húsin sín eða herbergi til að hýsa listamenn. Vinnuaðstaða listamannanna hefur verið opin öllum, við viljum gjarnan fá fólk til okkar í heimsókn, og margir hafa snætt með okkur kvöldverð eða eldað fyrir okkur. Mig langar að nota tækifærið og þakka öllum sem hafa aðstoðað okkur á einhvern hátt. Skólinn kom til okkar og listamennirnir fræddu þau um verk sín, buðu upp á listasmiðjur eða performeruðu.“

Sýningin lifir síðan áfram eftir að listamennirnir yfirgefa landið, en sýningin stendur út september.

Glo Jú er dansari frá Suður-Kóreu.
Dansgjörningur í kartöflugeymslunni, Glo Jú er frá Suður-Kóru.