Ágústa Eva og Gunni Hilmars í Sycamore Tree hafa valið sinni fjórðu plötu nafnið Colors en hún hefur verið í vinnslu um árabil og Gunni hikar ekki við að tala um hana sem þeirra stærstu hingað til.

„Þetta er allavega það verk sem við höfum eytt mestum tíma í og erum búin að vera að vinna það lengi í henni að við gáfum út tvær aðrar á meðan. Og það er bara staðreynd,“ segir Gunni og hlær.

„Ég er alveg rosalega stoltur af þessari,“ segir Gunni sem hefur síðustu daga verið að hlusta á Colors, eins og þau Ágústa Eva vilja senda hana frá sér, sem heild.

„Þess vegna viljum við droppa henni allri samtímis og höfum ekki verið að gefa út neinar smáskífur fyrst því okkur finnst hún vera eitt heildstætt verk. Sem er líka spennandi,“ segir Gunni sannfærandi.

Vilja koma á óvart

„Mig minnir að við höfum byrjað að semja lögin á plötuna 2019,“ heldur Gunni áfram og bendir á að þau reyni að halda sig við eina heildarhugmynd á hverri plötu og leggi mikið upp úr því að endurtaka sig ekki. „Við viljum helst koma þeim sem hlusta á okkur á óvart í hvert skipti sem við gerum eitthvað nýtt.“

Gunni segir þau til dæmis hafa verið að vinna með ákveðinn hljóðheim á fyrstu plötunni. Næsta plata hafi verið kántrískotin og sú þriðja órafmögnuð. „Og síðan kemur þessi sem er mjög melankólísk, mjög falleg, svolítið dramatísk með strengjum.“

Þá sé búið að liggja yfir útsetningunum, „enda vildum við hafa hljóminn frekar stóran án þess að ofhlaða og skilja bara eftir það sem skiptir mestu máli. Þannig að það verður mjög gaman að heyra viðbrögð frá fólki því sumt virkar frekar bert utan frá þótt hljóðheimurinn sé engu að síður stór og mikið af smáatriðum.“

Gunni bætir síðan mátulega dularfullur við að í lok plötunnar gefi þau ákveðna vísbendingu um hvaða stefna verði tekin á næstu plötu. Síðustu hljómarnir í síðasta laginu gefa þeim sem nenna að hlusta hugmynd um hvert við ætlum að fara næst.“

Litríkur happafengur

Örlögin í bland við tilviljanir og ef til vill smá heppni höguðu því þannig að Gunni og Ágústa fengu ofurpródúserinn Rick Nowels til þess að ganga frá plötunni en hann hefur á síðustu þremur áratugum eða svo unnið með ekki ómerkara spáfólki en Madonnu, James Blake, Dua Lipa, Adele, Stevie Nicks, Sia og sjálfri Lönu Del Rey.

„Hann er bara búinn að koma að öllum tónlistarsenum síðustu áratuga. Ég er búinn að fylgjast með honum lengi og hann hefur pródúserað nokkrar af mínum uppáhalds plötum,“ segir Gunni.

„Hann náttúrlega pródúseraði til dæmis allar nema eina af þeim plötum sem Lana Del Rey hefur gefið út og sá hljóðheimur er kannski næstur okkur myndi ég segja. Ef þú ert kannski búinn að hlusta mikið á hana og hlustar á þessa plötu þá heyrist alveg hvaða lit hann kemur með inn í. Við gáfum honum algerlega frjálsar hendur og vorum ekkert að rífast við hann.“

Laug sig í kaffi í LA

Gunni komst eftir krókaleiðum og klíkuskap í tölvupóstsamband við Rick eftir að hann skrifaði athugasemd við eitt laga Sycamore Tree á netinu. „Ég sendi honum tölvupóst og hann kannaðist við kommentið þannig að ég sagðist akkúrat vera í Los Angeles eftir tvo daga, sem var náttúrlega haugalygi, og hvort hann væri til í kaffibolla með mér.“

Rick tók dræmt í þetta og sagðist ekki hafa tíma í jafnlítil verkefni og þetta en sagði Gunna þó að koma í kaffi. „Þannig að ég fór á fullt að leita mér að flugi svo ég gæti verið kominn til hans 48 tímum seinna.“

Það tókst, þeir drukku kaffið og spjölluðu fram eftir degi og úr varð að Rick bauð Gunna að senda nokkur demó og hann myndi síðan sjá til. „Og ef hann myndi gera þetta þá yrði það bara fyrir ánægjuna.“

Þau Ágústa unnu þá aðeins meira í því sem var komið hjá þeim og sendu tíu grunna, sem voru meginuppistaða plötunnar, til Los Angeles og Rick sló til. „Hann var mjög hrifinn og nálgaðist þetta bara með hjartanu og maður heyrir það alveg,“ segir Gunni og bætir við að ferlið hafi verið hægt en mjög skemmtilegt.

Allt undir í Fríkirkjunni

„Við unnum í öðru á meðan og erum búin að klára efnið á næstu plötu og förum beint í hana strax eftir útgáfutónleikana.“ Þeir tónleikar verða í Fríkirkjunni föstudagskvöldið 7. október en hlustunar­partí verður daginn áður á Petersen svítunni.

Gunni segir að allt verði undir á tónleikunum og öllu tjaldað til þegar platan verður flutt í heild ásamt strengjasveit og kór. „Við spilum plötuna nákvæmlega eins og hún kemur fyrir og síðan gott partí af einhverju „best of“ þannig að fólk fær mikið fyrir aurinn þarna.“

Miðar eru seldir á Tix.is og þeir sem kaupa í forsölu fá einnig aðgang að hlustunarpartíinu á fimmtudeginum 6. þar sem platan verður spiluð í fyrsta sinn eftir að Gunni og Ágústa Eva hafa talað aðeins um hana og gerð hennar.