Hjá Systrasamlaginu er hægt er að fá lífrænt og hollt góðgæti eins og gæða kaffi, te, heilsudrykki, samlokur og kökur, svo fátt sé nefnt. Þarna er matur og munúð í forgrunni og mörg vel geymd leyndarmál þegar kemur að því að fá sér heita og ljúffenga drykki sem eru góðir fyrir sálina.

Leggja áherslu á eiturefnalausan lífsstíl

Í þættinum Matur & heimili heimsóttum við systurnar Jóhönnu og Guðrúnu Kristjánsdætur sem eru stofnendur og eigendur Systrasamlagsins og frumkvöðlar í rekstri kaffihúsa af þessari gerð. „Þegar við systurnar settum Systrasamlagið á laggirnar var það byggt á þeirri hugsjón að víkka út hugmyndina um heilsubúð og færa nær almenningi. Hafa andann ávallt með í efninu,“ segja þær systur Jóhanna og Guðrún. Þær tóku strax þá stefnu að bjóða ekki eingöngu upp á holla og góða fæðu, lífrænt kaffi og drykki heldur líka sölu á fallegum, lífrænum jógafatnaði og vörum og kakóinu sem enginn stenst. „Við leggjum áherslu á eiturefnalausan lífsstíl og það á við allar okkar vörur,“ segja þær systur og teljast þær til frumkvöðla á þessu sviði.

Gullin túrmerik latte er mikill hollustudrykkur sem hentar vel í vetrarkulda.

Drykkurinn sem laðar fram góða skapið í vetrarkulda

Við fengum þær systur til að deila með okkur uppskriftinni af einum af vinsælasta heita drykknum sem nærir líkama og sál. „Gullinn túrmerik latte er sá drykkur sem kemur flestum í opna skjöldu en þar eru ólík brögð leidd saman með himneskri útkomu,“ segir Guðrún og nefnir jafnframt að þeir sem smakki þennan drykk komi aftur og aftur og taki ástfóstri við drykkinn. „Gaman er líka að segja frá því að þessi drykkur þolir vel eitt kaffiskot fyrir þá sem vilja taka allt í hægum skrefum.“ Hér er uppskriftin komin.

Gullinn túrmerik latte

1 tsk. lífrænt túrmerik duft

½ tsk. lífrænt kakóduft

¼ tsk. lífrænar kardimommur

Nokkur korn pippali (svarti langi piparinn) eða svartur pipar

½ tsk. kakósmjör (má líka vera kókosolía eða önnur bragðgóð olía)

150 ml jurtamjólk

Blandið öllum kryddunum vel saman. Setjið í pott ásamt um það bil 150 ml af jurtamjólk og flóið, það er að segja hitið að suðu. Líka hægt að nota flóara á kaffivél, ef þið eigið.

Ef þið eruð með góða jurtamjólk, við mælum með möndlumjólk, sem er sæt frá náttúrunnar hendi, er óþarfi að nota sætu. Annars er eðal að bæta við góðu hunangi. Olían er mikilvæg því hún gefur þessum eðaldrykk alveg sérstaka mýkt.

Njótið í huggulegheitum.