Í þættinum fór Hinrik yfir helstu trixin þegar elda á villibráð eins og hreindýr og önd og gaf góð ráð. Hinrik byrjaði snemma að taka þátt í matreiðslunni fyrir jólin og yfirtók eldhúsið mjög fljótt enda hefur hann haft ástríðu fyrir því að elda og framreiða kræsingar frá því að hann man eftir sér.

„Ég var ungur þegar ég byrjaði að hjálpa til og eiginlega bara síðan ég man eftir mér hef ég verið fyrir í eldhúsinu. Ég hef verið svona um 17 ára þegar ég tók að mér jólamatinn í fyrsta skipti, í minningunni var það alveg greinilegt að ég væri að taka hann í fyrsta skipti sjálfur,“ segir Hinrik og veit fátt skemmtilegra en að matreiða jólamatinn fyrir fjölskyldu sína.

Hinrik segir að það hafi ekki verið mikið af jólahefðum og -siðum í bernsku sinni.

„Í minningunni hefur ekki verið mikið af jólahefðum eða -siðum sem við höfum haldið, jólin hafa aðallega snúist um samveru, góðan mat og góðan félagsskap. Það eru jólin fyrir mér.“ Hann segist þó halda í matarhefðirnar sem voru í hans æsku. „Yfir jólin held ég í uppáhaldshefðirnar, auðvitað breytist eitthvað í gegnum árin og nýjar hefðir þróast en í grunninn eru sömu matarhefðir yfir hátíðarnar.“ Á áramótunum er það kalkúnninn hvort sem hann er heima eða hjá tengdaforeldrum sínum og það finnst Hinrik ómissandi.

Hinrik deilir hér með lesendum uppskriftunum að hátíðarréttunum sem hann framreiddi í þættinum Matur og heimili á dögunum sem hittu svo sannarlega í mark hjá matargestum.

Hreindýr og önd, tvíréttuð jólaveisla að hætti Hinriks Arnar.

Pönnusteikt hreindýr í hvítlauk og rósmaríni

2 stk. hreindýralundir

3 stk. hvítlauksgeirar

Smá rósmarín

100 g smjör

Salt og olía eftir smekk

Kryddið hreindýrið með salti eftir smekk og setjið út á heita pönnu með olíu.

Steikið í um 2-3 mínútur á hvorri hlið eða þar til kjötið er orðið fallega brúnað.

Bætið næst við smjöri, rósmaríni og hvítlauk út á pönnuna og haldið áfram að steikja í 2-3 mínútur og snúið lundinni reglulega.

Takið af pönnu og setjið í eldfast mót.

Notið kjarnhitamæli og eldið steikina inni í ofni á 180°C þar til að kjarnhitinn nær 42°C gráðum.

Hvílið og skerið niður.

Hunangssteikt barbarian andabringa

2 stk. andabringur

1 msk. hunang

2 msk. smjör

Salt og olía eftir smekk

Skerið rákir í fituna á andabringunni.

Hitið pönnu í miðlungs hita.

Bætið smá olíu út á pönnuna og byrjið að steikja andabringuna á fituhliðinni.

Þegar fitan á öndinni er byrjuð að bráðna má hækka hitann í botn á pönnunni.

Þá nærðu fallegri steikingu og skinnið verður stökkt.

Næst er smjöri, hunangi, rósmaríni og hvítlauk bætt við út á pönnuna og andabringan steikt á hinni hliðinni.

Gott að velta smjörinu með skeið yfir andabringuna meðan hún steikist.

Takið af pönnunni og setjið í eldfast mót.

Setjið ofn á 180°C gráður og eldið þar til kjarnhiti er kominn í 58°C gráður.

Takið út og látið hvíla í um það bil 5-6 mínútur.

Gómsæt og bragðmikil fylling með hægelduðum andalærum.

Gómsæt fylling með hægelduðum andalærum

3 stk. andalæri hægelduð

300 g svínahakk

1 stk. laukur

6 stk. sveppir

1 hvítlauksgeiri

1 bolli brauðteningar

1 bolli mjólk

Smjör eftir smekk

Kjötið af andalærum rifið niður í skál

Hakk, laukur, hvítlaukur og sveppir steikt saman á pönnu.

Andalærunum bætt út á pönnuna með smjöri.

Næst er brauðteningum og mjólk bætt saman við.

Öllu saman blandað í skál.

Bakað í 25-30 mínútur í eldföstu móti.

Brokkolísalatið hennar mömmu

1 stk. brokkolíhaus

½ rauðlaukur

200 g sýrður rjómi

200 g majónes

2 msk. þurrkuð trönuber

1 msk. hunang

Sítrónusafi eftir smekk

Salt eftir smekk

Saxið brokkolíið og rauðlaukinn smátt niður.

Blandið saman rest af hráefni við brokkolíið.

Hunangsristað rósakál með heslihnetum. Ljúffengt meðlæti.

Hunangsristað rósakál með heslihnetum

500 g rósakál

2 msk. smjör

1 msk. hunang

2 msk. ristaðar heslihnetur

Salt og olía eftir smekk

Rósakálið er soðið í 2 mínútur í potti og svo snöggkælt með klaka eða undir köldu vatni.

Næst er panna hituð vel með olíu, rósakálið sett á pönnuna og steikt.

Smjöri og hunangi bætt út á pönnuna og steikt þar til rósakálið verður karamellíserað.

Heslihneturnar eru muldar niður.

Rjómasoðnar gular baunir

2 dós gular baunir

500 ml rjómi

100 g smjör

Allt sett i pott og soðið saman þar til rjómablandan byrjar að þykkna.

Hinrik sykurbrúnar kartöflur af mikill nákvæmni og bætir út í smjöri, rjóma og kryddi.

Sykurbrúnaðar kartöflur með rósmaríni og appelsínuberki

1 kg soðnar kartöflur, skrældar

200 g sykur

100 g smjör

200 g rjómi

3 stilkar rósmarín

1 stk. appelsína

Sykur hitaður á pönnunni þar til hann brúnast vel. Rjómanum bætt út á pönnuna og rjómi og sykur soðið saman. Næst er smjörinu bætt rólega saman við og hrært vel á meðan. Saxið rósmaríntoppa og rífið börkinn af appelsínunni út í karamelluna.