Þótt Eyjafjallajökull sé ekki nema sjötti stærsti jökull landsins (39 km2) þá er hann þeirra þekktastur. Það á hann eldgosinu sem hófst 14. apríl 2010 að þakka, en það truflaði flugferðir milljóna manna um allan heim á þeim rúma mánuði sem gosið stóð. Áður hafði þessi tignarlega eldkeila gosið nokkrum litlum gosum frá landnámi; 920, 1612 og 1821. Eyjafjallajökull hefur hopað töluvert vegna loftslagshlýnunar auk þess sem gosið 2010 bræddi jökulísinn þannig að einn af fáum skriðjöklum hans, Gígjökull, nánast hvarf.

Goðasteinn myndar ísskúlptúr á veturna en á sumrin sést svartur klettaveggurinn vel úr Fljótshlíð.

Engu að síður er Eyjafjallajökull með fallegustu jöklum landsins, ekki síst vegna tveggja glæsitinda sem raða sér á barm 3 km breiðrar gígskálar efst á jöklinum.

Í vestri er Goðasteinn (1627 m) en sunnar og austar er ekki síður tilkomumikill tindur, Guðnasteinn (1639 m); báðir klæddir klakabrynju stóran hluta ársins. Aðeins norðar er hæsti tindurinn, Hámundur (1648 m), sem er minna þekktur, enda ávallt hvítklæddur og sést því síður vel en bræður hans neðan úr sveit. Til eru nokkrar útgáfur af nafngift Guðnasteins en þá skemmtilegustu má finna í þjóðsögum.

Þar segir að Guðni hafi verið einn af fjórum þrælum sem fengnir voru til að drepa húsbónda sinn Rút, en hann þótti bæði óvinsæll og ómenni. Rútur komst að tilræðinu og elti þá alla uppi og drap. Guðna vó hann efst á jöklinum við klett sem fékk nafnið Guðnastein. Nöfnum Goðasteins og Guðnasteins er oft ruglað saman, m.a. á landakortum. Ekki hjálpaði til að Sveinn Pálsson náttúrufræðingur og læknir, sem fyrstur gekk á jökulinn 16. ágúst 1793, ruglaðist á Steinunum tveimur. Það er sérlega gaman að ganga á Eyjafjallajökul og enn skemmtilegra á skíðum, enda bjóðast þarna einhverjar bestu fjallaskíðabrekkur landsins.

Gengin Skerjaleið upp á Eyjafjallajökul. Í baskýn Markarfljót og vegur inn í Þórsmörk.

Flestir ganga á jökulinn úr suðri frá Seljavöllum og tekur sú ganga daginn, líkt og þegar farin er Skerjaleið upp úr Fljótshlíð. Styttri eru leiðir af vestanverðum jöklinum enda má komast að jökulröndinni á vel búnum jeppa. Að lokum köstum við fram hugmynd til að fyrirbyggja frekari rugling á Steinunum tveimur á Eyjafjallajökli. Hún felst í því að nefna Guðnastein í höfuðið á forseta vorum, Guðna Th. Jóhannessyni, og kalla Guðnatind, en nafnið Mt. Gudni yrði ekki síður þjált á ensku.

Íslendinga vantar jú tind sem kenndur er við forseta landsins – en til samanburðar geta Bandaríkjamenn státað af fimmtán Mt. Washington. Guðnatindur er með glæsilegustu tindum landsins og myndi hæfa vinsælum forsetanum vel með útsýni yfir landið og miðin. Síðan er það engin þjóðsaga að forsetinn hefur toppað Eyjafjallajökul í einkaerindum en opinber heimsókn bíður.

Síðan er það engin þjóðsaga að forsetinn hefur toppað Eyjafjallajökul í einkaerindum en opinber heimsókn bíður. – Tómas Guðbjartsson, hjartaskurðlæknir og náttúruunnandi og Ólafur Már Björnsson auglæknir og ljósmyndari