Guð­mundur Felix Grétars­son, sem gekkst undir á­græðslu á báðum hand­leggjum í janúar síðast­liðnum, birti magnað mynd­band á Face­book-síðu sinni í morgun.

Níu mánuðir eru nú liðnir síðan Guð­mundur gekkst undir að­gerðina í frönsku borginni Lyon og hefur bata­ferlið gengið vonum framar. Í mynd­bandinu segir Guð­mundur frá því sem á daga hans hefur drifið undan­farnar vikur.

„Fyrir þau ykkar sem sáuð mynd­bandið mitt í maí þá gat ég hreyft tví­höfðann lítil­lega. En núna get ég gert dá­lítið meira en það. Hann virkar nokkuð vel og styrkurinn í öxlunum, tví­höfðanum og þrí­höfðanum eykst dag frá degi,“ segir hann og bætir við að hann finni fyrir kulda og snertingu ef þrýst er á á hægri hand­legginn.

Hlutirnir hafa gengið ör­lítið hægar fyrir sig vinstra megin sem var við­búið, að sögn Guð­mundar.

„Taugarnar vinstra megin eru að vaxa og ég er kominn með taugar fram í höndina. Ég get hreyft öxlina lítil­lega en hún er fjári þung,“ segir hann og tekur fram að axlar­vöðvarnir séu frá gjafanum. Þrátt fyrir það er hann á undan á­ætlun.

En hann er á undan á­ætlun með fleiri at­riði eins og sést glögg­lega í mynd­bandinu hér að neðan.

Núna er Guð­mundur farinn að geta hreyft fingur hægri handar lítil­lega en það er eitt­hvað sem átti ekki að gerast fyrr en tveimur árum eftir að­gerðina. Guð­mundur sýnir svo á­horf­endum hvað hann getur gert og tekur upp klementínu­bát og stingur upp í sig. Eins og sést á mynd­bandinu er Guð­mundur nokkuð á­nægður með sig – enda má hann sannar­lega vera það.