Það er smá bras að leggja maís í bleyti og hreinsa hann en allan daginn þess virði. Þessa dagana er til að mynda hægt að kaupa ferskan maí í nokkrum matvöruverslunum og við mælum með að þið prófið að grilla slíkan. Hér er alveg dásamleg uppskrift af grilluðum maís úr smiðju Berglindar Hreiðars hjá Gotterí og gersemar sem þið eigið eftir að missa ykkur yfir.

„Góður maís er eitt það besta sem við fáum. Þegar við bjuggum í Bandaríkjunum keyptum við alltaf ferskan maís í hýðinu, létum hann liggja í bleyti fyrir eldun og hreinsuðum allt utan af honum. Eftir að maður byrjar að borða ferskan maís þá er nefnilega ekki aftur snúið skal ég segja ykkur, þetta er hreinlega ekki það sama og frosinn maís,“ segir Berglind sem veit fátt skemmtilegra en nýjar útfærslur á gómsætum réttum.

Grillaður maís með rjómaostasmyrju

Grillaður maís með rjómaostasmyrju

Fyrir 6 stykki

6 stk. ferskur maís

230 g Philadelphia rjómaostur með lauk og graslauk

30 g rifinn parmesan ostur

1 msk. lime safi

1 tsk. Tabasco sósa

½ tsk. hvítlauksduft

½ tsk. paprikuduft

¼ tsk. chilli flögur

Salt og pipar eftir smekk

Smá smjör til að pensla yfir maísinn

Ferskur kóríander til að strá yfir í lokin.

Sjóðið maísinn og hitið grillið í botn. Hrærið öllu öðru saman nema kóríander og smjöri.

Takið maísinn upp úr pottinum þegar hann er tilbúinn, makið á hann vel af smjöri og smyrjið með þunnu lagi af rjómaostasmyrjunni. Grillið í stutta stund á öllum hliðum. Toppið síðan með vel af rjómaostasmyrju, parmesan og smá chilliflögum ef þið þorið. Chilliflögurnar rífa í.