Fátt er betra en góður fiskur og hægt er að matreiða hann á marga vegu. Hér er á ferðinni guðdómlega góðir þorskhnakkar með stökkum parmesanhjúp úr smiðju Berglindar Hreiðars matar- og kökubloggara með meiru sem heldur úti síðunni Gotterí og gersemar. Hún segist vera alltof löt að vera með fisk í matinn.

„Ég skil það bara ekki þegar ég geri eitthvað undur ljúffengt eins og þessa uppskrift. Ég þarf klárlega að herða mig í fiskréttunum og reyna að hafa fisk að minnsta kosti einu sinni í viku,“ segir Berglind og ljóstrar því upp að hún sé alltof sjaldan með fisk í matinn.

FBL Tabasco-fiskur-Berglind Hreiðars 2.jpeg

Þorskhnakkar með stökkum parmesanhjúp

Fyrir um fjóra

Um 800 g þorskhnakkar

60 g panko rasp

50 g rifinn parmesan

60 g smjör við stofuhita

1 tsk. Tabasco Original Sauce

1 msk. söxuð steinselja

3 rifin hvítlauksrif

Safi úr ½ sítrónu

Salt, pipar, hvítlauksduft

  1. Skolið og þerrið fiskinn. Smyrjið eldfast mót og raðið þorskhnökkunum í mótið (ég skar hvert flak niður í 2 bita). Kryddið vel með salti og pipar.
  2. Blandið raspi, parmesan, smjöri, Tabasco, steinselju, hvítlauk og sítrónusafa saman í skál. Best er að hnoða saman í höndunum og krydda til með salti, pipar og hvítlauksdufti. Ég notaði um 1 tsk. af hvítlauksdufti og salti og eins og ½ tsk. af pipar.
  3. Setjið vel af parmesanblöndu yfir hvert fiskstykki.
  4. Bakið við 200°C í 12-15 mínútur (eftir þykkt fiskbitanna).

Ofnbakaðar kartöflur eða smælki

Um 600 g smælki

Ólífuolía

Salt, pipar og hvítlauksduft

  1. Hitið ofninn í 200°C.
  2. Skerið kartöflurnar til helminga og veltið upp úr 2-3 msk. af ólífuolíu.
  3. Kryddið með um 1.tsk af salti og hvítlauksdufti og um ½ tsk. af pipar.
  4. Bakið í um 30 mínútur eða þar til kartöflurnar mýkjast.

Smjörsteiktur aspas

1 ferskt aspasbúnt

60 g smjör

Salt, pipar og hvítlauksduft eftir smekk

  1. Bræðið smjörið við meðalháan hita og veltið aspasnum upp úr því og snúið reglulega.
  2. Kryddið eftir smekk og leyfið að malla þar til aspasinn mýkist.

Köld Tabasco sósa

1 dós sýrður rjómi (180g)

Safi af ½ sítrónu

1 tsk. salt

1 tsk. paprikuduft

1 tsk. Tabasco Original Sauce

Pískið allt saman í skál og geymið í kæli fram að notkun. Það má setja meira eða minna af Tabasco sósu í þennan rétt eftir því hversu mikið þið eruð fyrir sterkt.

Þá er gott að byrja á því að útbúa hjúpinn á fiskinn og leggja til hliðar á meðan þið undirbúið kartöflurnar og setjið þær í ofninn.

Þegar kartöflurnar eru komnar í ofninn passar vel að útbúa köldu sósuna, setja hjúpinn á fiskinn og koma aspasnum í eldun. Þegar kartöflurnar hafa verið í ofninum í um 15 mínútur má bæta fisknum við og baka hvorutveggja áfram í um 15 mínútur.

Á meðan mallar aspasinn og gott er að leggja á borðið og ganga frá því sem notað var við eldamennskuna. Berið fallega á borð og njótið.

FBL Tabasco-fiskur-Berglind Hreiðars 3.jpeg

Þegar maturinn lokkar augað bragðast hann miklu betur./Ljósmyndir Berglind Hreiðars.

*Allt hráefnið í þessa rétti fæst í Bónus.