Hér eru tvær uppskriftir sem eru sumarlegar og henta vel á grillið. Það er einfalt að grilla lax og hann verður mjög góður eldaður þannig. Síðan eru það lambakótelettur en þær geta aldrei klikkað. Bara passa að brenna þær ekki.

Grillaður lax með krydduðu núðlusalati

Mjög góð uppskrift sem vert er að prófa í góða veðrinu. Það er þægilegt að grilla lax og með þessu flotta salati verður til sumarleg og góð máltíð. Uppskriftin miðast við fjóra.

600 g laxaflak án beina og roðs

1 tsk. salt

½ tsk. nýmalaður pipar

1 msk. olía til að pensla með

Chilli-dressing

1 msk. chillimauk (sambal oelek)

2 msk. olía

Safi og börkur af einni límónu

1 dl sæt sojasósa eða hoisin-sósa

Núðlusalat

100 g eggjanúðlur

3 vorlaukar

1 mangó

Sjóðið núðlurnar eftir leiðbeiningum á umbúðum, kælið síðan undir rennandi köldu vatni. Blandið öllu saman sem á að fara í chilli-dressinguna. Skerið vorlauk og mangó. Blandið chilli-dressingu saman við núðlurnar og hrærið vorlauk og mangó saman við. Ágætt er að leyfa þessu að vera í að minnsta kosti hálftíma í ísskáp.

Skerið laxinn í um það bil 150 gramma stykki. Penslið með olíu og bragðbætið með salti og pipar. Grillið laxinn í 2-3 mínútur. Hafið þennan tíma á kröftugum hita en haldið síðan áfram á óbeinum hita undir loki, allt þangað til laxinn er fulleldaður en það fer svolítið eftir þykkt bitanna.

Berið fram með núðlusalatinu.

Kótelettur klikka ekki þegar þær eru grillaðar. Matur sem flestum líkar vel.

Lambakótelettur með grísku salati

Lambakótelettur eru alltaf góðar, sérstaklega þegar þær eru grillaðar. Hérna eru þær gerðar svolítið Miðjarðarhafslegar. Það má hugsa um sand og sól á meðan grillað er. Uppskriftin miðast við fjóra.

800 g marineraðar kótelettur

Það má nota tilbúna BBQ-sósu en það er líka hægt að gera sína eigin maríneringu. Hér er uppskrift.

1 dl jómfrúarolía

1/5 sítróna, safinn

1 kvistur ferskt rósmarín

2 hvítlauksrif

Salt og pipar

Penslið kóteletturnar og leyfið þeim að bíða í um það bil hálftíma.

Grillið kóteletturnar á háum hita í tvær mínútur á hvorri hlið. Setjið þá á óbeinan hita og grillið áfram í 3-4 mínútur með loki.

Grískt salat

2 tómatar

½ agúrka

½ rauðlaukur

Jöklasalat

1 krukka fetaostur

3 dl grísk jógúrt

½ tsk. salt

½ tsk. nýmalaður pipar

1 dl svartar, steinlausar ólífur

Skerið tómata í báta, agúrku og lauk í sneiðar. Setjið jöklasalat í skál og tómata, lauk og agúrku yfir ásamt fetaosti og ólífum.

Bragðbætið jógúrtina með salti og pipar og hafið sem sósu.

Gott er að hafa hvítlauksbrauð með réttinum.