Söngkonan Olivia Newton – John berst nú við erfitt krabbamein. Í nýlegu viðtalið við áströlsku sjónvarpsstöðina Channel 7 viðurkenndi hún að hafa greinst með fjórða stigs brjóstakrabbamein í maí á síðasta ári sem hefur nú dreift sér í bein í neðra baki.

Þetta er í þriðja sinn sem hún greinist með krabbamein fyrst árið 1992 og svo aftur í öxl árið 2013 en hún hélt þeirri baráttu utan sviðsljóssins. Sögur af veikindum hennar núna kvisuðust út og því sá hún sér ekki annað fært en að staðfesta sögusagnirnar. Að þessu sinni er óvíst að hún fari með sigur af hólmi.

Þrátt fyrir veikindi og verki ætlar Olivia að halda rækilega upp á sjötugsafmælið sitt sem verður í lok september. Leikkonan er gift John Easterling stofnanda Amazon Herb Company. Hjónin búa saman á búgarði í Kaliforníu þar sem þau rækta meðal annars marijúana í lækningaskyni sem hún nýtir óspart til verkjastillingar.

Í ár eru fjörutíu ár frá því að hún birtist fyrst á hvíta tjaldinu sem Sandy í kvikmyndinni Grease einni vinsælustu kvikmynd síðustu aldar. Olivia Newton - John varð heimsfræg á einni nóttu fyrir hlutverk sitt í myndinni og óhætt að segja að hún og mótleikari hennar John Travolta, sem lék Danny Zuko, séu eitt flottasta kvikmyndapar allra tíma.

Sjá einnig: Sameinuð á 40 ára afmæli Grease