Fólk

Góður leiðtogi í eldhúsinu

Þótt vinnudagurinn sé jafnan langur er alltaf gaman í vinnunni hjá Laufeyju Bjarnadóttur sem útskrifaðist nýlega sem matreiðslumaður frá MK. Hana dreymir um að skoða heiminn og kynnast matarhefðum annarra landa.

„Svona starf er ekki fyrir alla og sumir hreinlega gefast því upp. Ég hins vegar elska þessar vaktir því mér finnst geggjað að vera í fríi í miðri viku og fá stundum þriggja daga helgarfrí,“ segir Laufey. Fréttablaðið/Stefán

Það var aldrei inni í myndinni hjá Laufeyju Bjarnadóttur að gerast matreiðslumaður þegar hún var yngri. Hún útskrifaðist þó sem slíkur í lok síðasta mánaðar og tók nýlega við stöðu vaktstjóra á veitingastaðnum Kopar þar sem hún var á samningi sem nemandi. Hún hlakkar mikið til að takast á við verkefnin fram undan og ekki síður að kenna nýjum nemendum sem eru að stíga sín fyrstu skref í greininni.

Áhugi Laufeyjar á matreiðslu kviknaði þegar hún starfaði sem uppvaskari á Kopar veturinn 2013-2014. „Í uppvaskinu fylgdist ég alltaf með kokkunum og fannst starf þeirra mjög heillandi auk þess sem ég hjálpaði þeim stundum að skera grænmeti og vakúmpakka. Kokkarnir hvöttu mig oft til að koma á samning en ég þorði það ekki þótt mig langaði virkilega til þess. Ég hélt nefnilega að ég kynni ekkert að elda.“

Seinna meir hætti Laufey í uppvaskinu og hóf störf sem þjónustustúlka á pitsustað. „Þá komst ég að því að ég átti sannarlega frekar heima inni í eldhúsinu. Nokkru síðar hitti ég starfsfólk Kopars á starfsmannaskemmtun þar sem ég hitti m.a. Ylfu Helgadóttur, yfirmatreiðslumeistara og eiganda Kopars. Það kvöld sagði ég henni frá ósk minni um að komast á samning og tveimur dögum síðar hringdi síminn þar sem ég var beðin um að taka prufuvakt. Í kjölfarið fór ég síðan á samning hjá staðnum.“

„Í uppvaskinu fylgdist ég alltaf með kokkunum og fannst starf þeirra mjög heillandi,“ segir Laufey Bjarnadóttir. Fréttablaðið/Stefán

Færir ýmsar fórnir

Laufeyún segir námið hafa verið afar skemmtilegt og lærdómsríkt en um leið oft erfitt. „Það þarf nefnilega að sinna miklu fleiri verkefnum á veitingastað en að elda mat og þar finnst mér hreinlæti við matreiðslu skipta mjög miklu máli. Sjálf get ég ekki eldað í skítugu umhverfi enda fer fátt meira í taugarnar á mér.“

Hún segir mikinn aga þurfa til að geta unnið á kokkavöktum þar sem vinnudagurinn sé oft 12-15 klukkustundir á dag. „Svona starf er ekki fyrir alla og sumir gefast því hreinlega upp. Ég hins vegar elska þessar vaktir því mér finnst geggjað að vera í fríi í miðri viku og fá stundum þriggja daga helgarfrí. Venjulegur vinnudagur er 14 klukkustundir á virkum dögum en um helgar fer hann oft í 15 klukkustundir en mér finnst það ekkert mál.“

Fyrir vikið þarf hún að vera tilbúin til að fórna ýmsu í lífinu. „Ég hef misst af mörgum afmælum og boðum því ég var á vaktinni. Það tók tíma fyrir fólkið í kringum mig að skilja að það er ekki alltaf auðvelt að skipta á vöktum en það er að síast inn.“

Laufey með föður sínum, Bjarna Ólafssyni, við útskriftina í maí. Úr einkasafni

Gaman í vinnunni

Kopar er ekki bara vinnustaður í huga Laufeyjar heldur hefur hún eignast marga nýja vini þar. „Það var og er alltaf gaman í vinnunni með öllu skemmtilega fólkinu mínu. Ég hef unnið víða en aldrei fundið fyrir eins góðum starfsanda eins og í þessum bransa. Margir sem hafa hætt störfum hér eru enn vinir mínir þannig að Kopar er og mun alltaf vera stór partur af lífinu mínu.“

Veitingastöðum hefur fjölgað hratt undanfarin ár hér á landi og finnst Laufeyju framtíðin vera nokkuð björt fyrir hana og annað ungt fólk í greininni. „Það hafa aldrei starfað jafn margir í greininni og núna auk þess sem útskriftarhópurinn frá MK var sá stærsti í sögu námsins, eða um 35 nemendur.“

Langar að skoða heiminn

Sem fyrr segir tók Laufey nýlega við stöðu vaktstjóra á Kopar en þeirri stöðu hafði Alfreð Pétur Sigurðsson gegnt frá stofnun. „Alfreð var vaktstjóri minn í langan tíma og kenndi mér margt af því sem ég kann í dag. Ég er ótrúlega spennt fyrir nýja starfinu en ég er annar neminn af Kopar sem er ráðinn í starfið.“

Hún á sér þann draum að ferðast um heiminn sem kokkur og kynnast fleiri matreiðsluhefðum en íslenskum og læra um leið að vinna með erlend hráefni sem eru ekki þekkt hér á landi. „Mig langar mikið til Danmerkur og þá helst til Kaupmannahafnar. Þar eru margir mjög flottir veitingastaðir sem ég hef augastað á. Það eru líka fleiri lönd í myndinni en ég ætla að byrja á því að koma mér til Danmerkur og sjá svo til hvað gerist í framhaldinu.“

Það er alltaf gaman í vinnunni. Úr einkasafni

Uppáhaldsáhaldið í eldhúsinu?

Beittur og góður hnífur.

Hvert er uppáhaldskryddið og hráefnið?

Ég elska kúmin vandræðalega mikið og er óhrædd við að prufa að setja það í rétti. Annars eru uppáhaldshráefnin mín rjómi og smjör því það er aldrei nóg af því.

Er einhver réttur eða hráefni sem þú ætlar að prófa í ár?

Markmiðið er að baka meira og prufa mig áfram í eftirréttum. Ég fékk KitchenAid hrærivél í útskriftargjöf sem verður mikið notuð í tilraunastarfsemi.

Hvaða matreiðslumaður, innlendur og erlendur, er í mestu uppáhaldi?

Ég gæti talið þá endalaust upp. Ylfa Helgadóttir, meistari minn, er náttúrlega fyrirmyndin mín sem kokkur og lít ég mikið upp til hennar. Einnig lít ég mikið upp til Georgs Arnars Halldórssonar, matreiðslumanns á Óx. Hann er bara svo flottur og klár kokkur. Uppáhalds erlendi kokkurinn minn er Grant Achatz, eigandi Alinea í Chicago, sem er drauma Michelin staðurinn minn.

Hvaða snilligáfu hefur þú í eldhúsinu sem fáir vita um?

Það er eflaust eitthvað sem ég veit ekki sjálf. Ég er hins vegar góður leiðtogi og finnst góð liðsheild skipta máli og passa alltaf að hún sé til staðar.

Áttu þér uppáhaldsmatreiðsluþátt?

Það eru Chef’s Table og Hell’s Kitchen með Gordon Ramsay.

Hvað eldar þú helst þegar þú ert heima?

Súpur, því ég veit ekkert betra en góða og bragðmikla súpu.

Hvers konar mat finnst þér spennandi að prófa þegar þú borðar úti?

Ég borða mikið á veitingastöðum og panta mér yfirleitt nokkra smárétti til að deila með öðrum. Svo finnst mér mjög spennandi að velja smakkseðilinn svo hægt sé að prófa sem mest úr eldhúsinu, ég mæli svo sannarlega með því.

Grillar þú mikið og þá hvað helst?

Ég var einmitt að eignast grill og Le Creuset grillpönnu þannig að ég mun grilla mikið í sumar. Grillaðar lambakótelettur eru í miklu uppáhaldi ásamt grilluðum fiski.

Ljúffeng, litfögur og spicy vegan súpa.

Laufey gefur hér lesendum uppskrift að vegansúpu sem allir ættu að ráða við. „Sjálf elska ég súpur og um leið að gefa fólki sem er vegan að borða því það er svo þakklátt fyrir góðan mat. Ég á eina vinkonu sem heitir Eva Dröfn og er veganisti sem er klikkuð í þessa súpu.“

Spicy vegan súpa 

Fyrir 4

2 sætar kartöflur 

3 hvítlauksgeirar 

1 lítill engifer 

1 rauður chili 

5 gulrætur 

½ lítri appelsínusafi, t.d. Trópí 

1 lítri vatn 

1 krukka kókosmjólk 

1 msk. karrí 

1 tsk. túrmerik 

1 tsk. kúmin 

1 tsk. timían 

1 tsk. paprikukrydd 

½ tsk. cayenne-pipar (má sleppa) 

Salt og pipar eftir smekk

Ofan á súpuna: 

Smátt skorinn vorlaukur 

Saxaður ferskur kóríander 

Muldar salthnetur 

Límónubátar

Skerið sætar kartöflur, gulrætur, engifer, hvítlauk og chili í bita. Sjóðið vel í potti með vatni, appelsínudjús og kókosmjólk. Á meðan þetta sýður er kóríander saxaður og vorlaukur skorinn smátt. Skerið límónu í báta og myljið salthneturnar. Allt sett í sér skálar. Maukið grænmetið í pottinum með matvinnsluvél eða töfrasprota. Kryddað með karríi, kúmini, timíani, paprikukryddi, cayenne-pipar og salti og pipar. Súpan er borin fram og hver og einn fær sér kóríander, vorlauk, salthnetur og límónu ofan á eftir smekk.

Athugasemdir

Auglýsing
Auglýsing

Tengdar fréttir

Fólk

Möguleikarnir nær óþrjótandi

Fólk

Lokkandi leirtau úr Landmannalaugum

Kynningar

Hús með öllu í fyrsta sinn á Íslandi

Auglýsing

Nýjast

Ástin blómstrar eftir Bachelorinn: „Ég vildi fara heim með henni“

Eiga von á eineggja tví­burum

Afskaplega gott að syngja eftir Jón Ásgeirsson, það virkar allt

Kóngur ofurhuganna

Landsliðs­strákar skemmtu sér á Miami eftir lands­leik

Fantasían Storm­sker hlaut barna­bókar­verð­launin

Auglýsing