Á vefsíðu Leiðbeiningastöðvarinnar er að finna ýmis góð ráð í sambandi við þrif og efni til að nota til þrifa. Jenný ráðleggur fólki að byrja tímanlega að þrífa fyrir jólin og taka fyrir eitt herbergi í einu. „Það er gott að skipta þrifunum niður á herbergi og gera hvert herbergi vel áður en byrjað er á því næsta, þá þarf ekki að vera að hlaupa um allt hús í einni stórri hreingerningu rétt fyrir jól,“ segir Jenný.

Hún segir þó enga þörf vera á stórhreingerningu og þrífa alla veggi og loft í myrkrinu í desember. „Við ráðleggjum fólki mun frekar að þrífa bara það mikilvægasta eins og baðherbergið og eldhúsið. Það sér enginn hvort veggir eða loft hafa verið þrifin. Það er miklu sniðugra að gera það á vorin. Það ætti enginn að keyra sig í kaf í hreingerningum í desember. Þá er best að hafa það bara huggulegt og kveikja á kertum. Það getur verið gott að deila stórhreingerningum yfir árið. Til dæmis deila verkum á mánuðina, en það fer auðvitað eftir því hversu oft fólk telur þörf á þrifum. Það er auðvitað misjafn umgangur á hverju heimili fyrir sig,“ segir Jenný. Hún segir þó gott að þrífa vel ísskápinn og eldhússkápana fyrir jól svo þeir séu hreinir áður en þeir eru fylltir af jólamat.

Jenný Jóakimsdóttir hjá Leiðbeiningastöð heimilanna gefur góð ráð fyrir jólahreingerninguna.

Leiðbeiningastöð heimilanna mælir með því að fólki kaupi svansvottuð hreingerningarefni. Svansvottunin er norrænt umhverfismerki sem gerir strangar kröfur um lágmörkun umhverfisáhrifa. Merkið er auðveldlega hægt að sjá á umbúðunum. „Mild sápa og vatn er best við flest dagleg þrif. En svo er líka hægt að nota 100% náttúruleg efni eins og edik og matarsóda. Edik er gott að nota á glugga og á baðherbergi en það má ekki nota það á allt. Það má til dæmis alls ekki nota það á lakk eða marmara og granít því edikið er ætandi,“ segir Jenný. „En það er fínt á baðkar og klósett og alls staðar þar sem er glerungur.“

Jenný segir að matarsódann megi nota á fleiri fleti þar sem hann er basískur en ekki nægilega til að vera ertandi og því er hann frábær kostur til að nýta á margan hátt við þrifin á heimilinu. „Það er til dæmis gott að nota matarsóda til að þrífa ísskápinn. Þar er ekki sniðugt að nota sápu því matvælin eru svo fljót að draga í sig lykt. Þú blandar bara smá matarsóda út í vatn og nuddar svo með tusku. Matarsódinn er ágætis skrúbbefni.“

Einfaldar aðferðir við að þrífa gull og silfur

Fyrir jólin draga margir fram gull- og silfurmuni, borðbúnað eða annað skraut sem oft hefur fallið á. Hreinsiefni fyrir gull og silfur eru oft ekkert sérlega umhverfisvæn eða góð fyrir húðina. En Jenný er með umhverfisvæna lausn til að fægja silfrið. Það sem þarf er:

1 tsk. lyftiduft

1 tsk. matarsódi

2,5 dl kalt vatn

„Þú sýður kalda vatnið, bætir þurrefnunum út í og lætur rjúka. Svo er silfrið sett ofan í löginn, látið liggja í smástund og svo bara þurrkað með mjúkum klút,“ segir Jenný.

„Gullið er best að þvo og fægja með því að sjóða kalt vatn og setja smá uppþvottalög saman við og láta gripina liggja í blöndunni í um klukkustund, óhreinindin leysast upp út í vatnið og þá er hægt að bursta þá með mjúkum bursta. Svo skolað með köldu vatni og fægt með mjúkum klút.“