Ragnar fæddist í Reykjavík árið 1934, sonur hjónanna Bjarna Einars Böðvarssonar, hljómsveitarstjóra og dægurlagasöngkonunnar Láru Ingibjargar Magnúdóttur sem einnig söng með Dómkirkjukórnum í áratugi.

Eftirlifandi eiginkona Ragnars er Helle Birthe Bjarnason. Sonur þeirra er Henrý Lárus en Ragnar átti einnig tvö börn úr fyrra hjónabandi, þau Bjarna Ómar og Kristjönu.

Raggi Bjarna hóf ferilinn í tónlist sem trommuleikari. Þegar hann var 16 ára söng hann fyrst inn á plötu ásamt Sigurði Ólafssyni og var í raun og sann söngvari tveggja alda en hann var með hljóðnemann á lofti og hangandi hendi nánast fram á síðasta dag. Lét síðast að sér kveða á sviði í Hörpu í 1. September í fyrra þegar vinir hans og samstarfsfólk hélt hátíðartónleika til heiðurs hinum 85 ára gömlum.

Salka Sól Eyfeld söng- og leikkona

Ég kynntist Ragga mjög óvænt þar sem við vorum bókuð í sömu veislu og beðin um að taka lag saman og ég nýfarin að hefja minn söngferil. Við höfðum aldrei hist og ég fór úti bíl til hans og við renndum í lagið. Upphófst ótrúleg vinátta sem entist því miður of stutt en við náðum þó nokkrum árum saman, ótal giggum, gerðum lag saman og fórum á mörg trúnó.

Hér er þetta fyrsta gigg sem við áttum saman. Rétt áður sátum við saman út í bíl að æfa okkur og Raggi var alveg með það á hreinu að ég væri rétt að verða tvítug og hélt það svo alla tíð.

Valdimar Víðisson, skólastjóri

Það eru fáir einstaklingar sem hafa haft jafnmikil áhrif á mig og Raggi Bjarna. Ég var bara barn þegar ég varð aðdáandi og það fannst vinum mínum skrýtið enda var Sálin hans jóns míns, Nirvana, U2 og fl. aðal hljómsveitirnar. En ég stóð fastur á mínu enda var Raggi ekki bara frábær söngvari, hann var yndisleg manneskja. Ég ákvað að senda honum bréf og láta hann vita af því að það væri rauðhærður strákur í Bolungarvík sem væri aðdáandi og spurði hvort hann gæti sent mér plötu þar sem lög Ragga voru ekki fáanleg í búðum á þessum tíma. Raggi svaraði mér og er bréfið frá honum rammað inn heima hjá mér. Hann sendi mér einnig mynd af Sumargleðinni og áritaða plötu.

Ég hef farið á alla tónleika sem hann hefur haldið, hvort sem það eru stórtónleikar eða lágstemmdir tónleikar í kirkjunni á Eyrabakka. Þar sem ég er tvígiftur þá að sjálfsögðu kom Raggi og söng í báðum brúðkaupunum. Sagði við mig eftir seinna brúðkaupið að hann ætlaði sko ekki að koma í þriðja sinn.

Raggi gaf mér svo mikið. Hann gaf þjóðinni svo mikið. Einstakur maður.

Blessuð sé minning Ragnars Bjarnasonar.

Ragnar Bjarnason og Erpur Eyvindarson

Erpur Eyvindarson, tónlistarmaður

Við erum að kveðja svo ótrúlega skemmtilegan og hjartahlýjan kall, fyrirmynd, stórkostlegan skemmtikraft sem deildi með mér sviði í fínasta galagleðskap, uppi á borðum á skemmtistöðum og allt þar á milli. Listamaður var hann, lag hans við ljóð Steins Steinars, „Barn“, gefur manni gæsahúð bara við að minnast á það. Ég er svo þakklátur fyrir að hafa spilað svona mikið með honum seinustu árin, það er ekki langt síðan við djöfluðumst seinast á sviði. Hann gladdi okkur fram á seinustu augnablik ævi sinnar. Ég vil ekki syrgja heldur gleðjast yfir því hvað hann átti langt, fjörugt og gott líf sem einstakur gleðigjafi og frábær manneskja. Frá mínum bæjardyrum séð er hann ekkert farinn, býst alveg eins við að fá símtal frá honum á eftir: “Sæll elsku venur minn, hvenær eigum við að fýra upp í næstu vitleysu?”

Skemmtikraftarnir Ragnar Bjarnason, Ellý og Þuríður Sigurðardóttir.
Raggi í góðum fílíng að rifja upp gamla takta með aldavinum úr hinni dáðu Sumargleði.
Sígildur Raggi Bjarna með Milljónamæringunum, Bogomil Font, Ladda og Bjarna Arasyni.