Hildur Rut Ingimars sælkeri og lífsstílsbloggari áTrendnet útbjó ótrúlega gómsætt taco með andaconfit með jólalegu ívafi á dögunum sem hefur slegið í gegn. Hún deilir hér með lesendum þessari dásamlegu uppskrift sem á vel við á aðventunni.

„Ég segi það aldrei nógu oft en ég elska tacos og hér kemur uppskrift að taco með andaconfit. Þetta er í fyrsta skipti sem ég útbý slíkt taco og halelúja hvað það bragðast vel,“segir Hildur Rut og segist eiga eftir að gera þetta taco aftur og aftur. Tortillurnar fylltar með rauðkálshrásalati með smá appelsínu tvisti, granateplasalsa og fetaosti. Þær eru bæði jólalegar og bragðgóðar og ótrúlega einfalt að útbúa. Þessar eiga eftir að slá í gegn í matarboðum á aðventunni.

FBL taco andaconfit 4.jpeg

Taco með andaconfit

Fyrir tvo-þrjá (mæli með þremur taco á mann)
2 andaconfit í dós
6-8 Tortillur, t.d. frá Street tacos frá Mission
Ólífuolía til steikingar

Rauðkálshrásalat
5 dl rauðkál, smátt skorið
1 dl majónes frá Heinz
1dl sýrður rjómi
3 msk. safi úr appelsínu
4-6 jalapeno sneiðar úr krukku

Granatepla salsa
1 dl fræ úr granatepli
2-3 msk. rauðlaukur, smátt skorinn
1 tómatur
Ferskt kóríander eftir smekk
2 msk .safi úr appelsínu

Toppa með fetaosti

  1. Bakið andaconfit eftir leiðbeiningum á dós og rífið það með tveimur göfflum.
  2. Skerið rauðkálið smátt.
  3. Blandið saman í skál majónesi, sýrðum rjóma, safa úr appelsínu og smátt skornu jalapeno eða blandið saman með töfrasprota.
  4. Hrærið blöndunni saman við rauðkálið.
  5. Smátt skerið rauðlauk, tómat og kóríander og blandið saman ásamt fræjum úr granatepli og safa úr appelsínu.
  6. Steikið litlu tortillurnar upp úr ólífuolíu þar til þær verða stökkar en passið samt að þær brenni ekki.
  7. Raðið svo hrásalati, önd, granatepla salsa og smá fetaosti á tortillu og njótið vel.