Guðjón Davíð Karlsson, leikari segir einelti sér mjög hugleikið og á sína eigin reynslu af því. Í þættinum Mannamáli á Hringbraut segir hann frá því að sem prestsonur í Austurbæjarskóli hafi sumir látið hann finna fyrir því.

„Þetta fór svolítið fyrir brjóstið á eldri strákum sem þurftu svoldið að láta mig heyra það og það var auðvitað ekkert skemmtilegt en það sem var kannski gott í mínu tilviki var að ég var í ótrúlega góðum bekk alltaf, átti alltaf mjög góða vini því ég held að það sé skelfilegt að lenda í einelti af bekkjarfélögum sínum í sínu nánasta örugga umhverfi. Þetta voru bara eldri vitleysingar og ég náði að hugsa hvað þeim hlyti að líða illa að þrufa að níðast á einhverju barni,“ segir Gói.

Gói mætti í Mannamál til Sigmundar Ernis
Mynd/Hringbraut

„En þetta var auðvitað ótrúlega erfitt, ég fór ekkert heim og sagði frá því mér fannst það svo leiðinlegt fyrir pabba að upplifa að þetta væri honum að kenna.“

Um hversu grátt hann hafi verið leikinn af stóru strákunum segir Gói: „Það var setið fyrir mér og ég laminn og þeir voru alltaf með þetta grín, að einhvern tímann var ég kýldur upp við vegg og settur hnífur upp við hálsinn á mér og sögðu „biddu fyrir þér núna prestadjöfull,“ og svo skutu þeir út blaðinu og þá var það bara greiða inni í hnífskaftinu. Þegar bara greiða skaust út þá hæddust þeir að mér og voru svona: „Ó, hann er sonur guðs!“

Hann segist mjög hugsi yfir eineltinu. „Og maður hugsar meira um þetta eftir að maður eignast börn sjálfur.“

Að leggja kannanir fyrir fólk virðist vera helsta lausnin í skólakerfinu þegar kemur að meinsemd eins og einelti, vill Gói meina.

Kannanir leysa ekkert

„Ég held að stóra vandamálið sé hvað skólakerfið varðar er að okkar lausnir á vandanum er að leggja kannanir fyrir fólk um hvernig það upplifir hitt og þetta. Og þetta gerir ekki neitt, þetta stoppar ekki einelti. Niðurstöður eins og: Tvö prósent nemenda skólans hafa sjaldan eða aldrei upplifað einelti gerir ekkert. „Sjaldan“ er bara of mikið.“

Alltaf Gói

Um nafnið sitt sem er næst því að vera eins og vörumerki eins manns, segir hann: „Ég heiti bara Gói og ég var meira að segja lesinn upp í grunnskóla sem Gói, alla skólagönguna,“ segir Guðjón Davíð „nafnið hefur bara fylgt mér alltaf, ég held að Lalla systir mín beri ábyrgð á því, hún gat ekki sagt Guðjón og ég bara þakka henni fyrir það, segi bara takk kærlega Lalla, segir Gói léttur í bragði.“

Gói leikur í Nashyrningunum um sem frumsýnt var fyrir skömmu á stóra sviðinu í Þjóðleikhúsinu.

Viðtalið við Góa í Mannamáli má sjá hér á vefsíðu Hringbrautar