Hjónin byrja snemma að undirbúa jólin og eru iðin við að halda í hefðir og siði með nýjungum í bland. Þau voru í þættinum Matur og heimili á dögunum þar sem áhorfendur fengu innsýn í jólahefðir þeirra og -siði og fengu að fylgjast með þeim framreiða aðventudögurð en aðventan spilar stór rullu í lífi þeirra hjóna og eitt af því sem þau hafa mikla ánægju af er að bjóða upp á ljúffengan aðventudögurð fyrir nána vini og vandamenn.

Kristín sem er alla jafna kölluð Kiddý er menntaður blómaskreytir og framreiðslumeistari svo hún leggur sig fram af miklum metnaði við jólaskreytingarnar. „Við höfum ávallt unnið hlutina í samvinnu og hugum að hverju smáatriði þegar kemur að því að bera fram sælkeraveitingar og dekka upp hátíðarborð sem passar við þemað hverju sinni,“ segja hjónin Kiddý og Jói.

Glæsilegir heimagerðir síldarréttir.

Hafa verið fastheldin á matseldina um jólin

„Eins og er með svo marga, þá byrjum við frekar snemma á jólabakstri. Við bökum alls konar smákökur og annað kruðerí og svo er það auðvitað laufabrauðið. Það er stór þáttur í undirbúningi jólanna hjá okkur að gera laufabrauð, en við gerum það alveg frá grunni.

Við höfum verið mjög fastheldin á matseldina, sérstaklega um jólin, þar til nú í ár. Síðastliðin ár höfum við verið með heilmikið skötu- og saltfiskboð á Þorláksmessu, allt að 60 manns hafa komið við hjá okkur. Það féll reyndar niður í fyrra, þar sem dóttir okkar var á fæðingardeildinni og lítur ekkert allt of vel út þetta árið heldur. Aðfangadagur er alveg dásamlegur og ilmurinn úr eldhúsinu er alltaf eitthvað svo lokkandi og hátíðlegur. Við stöndum og stússum saman í eldhúsinu, skálum í púrtvíni yfir matseldinni, dekkum upp, förum gjarnan í messu á Bessastöðum og njótum svo kvöldsins.

Ómissandi að vera með síld og rúgbrauð

Hjónin eru iðin við að bjóða upp á sælkeraveitingar á aðventunni og eru að framreiða aðventudögurð fyrir gesti og fjölskylduna. „Okkur finnst mikilvægt að flækja hlutina ekki of mikið og hafa þetta ekki alltof þungt. Aðalmálið er að hitta fjölskylduna og vini. Við viljum helst byrja á súpu, og hafa svo góða blöndu af fiski, kjöti og einhvers konar eggjum, til dæmis Eggs Benedict eða hrærð egg. Þegar kemur að aðventunni eru nokkrir hlutir sem eru ómissandi eins og síld og rúgbrauð. Það er mikið af góðri síld á markaðnum, en vissulega líka hægt að útbúa sína eigin.

Okkur finnst nautatungan líka ómissandi, helst ný eða söltuð. Reyktur eða grafinn lax er líka mjög ofarlega á óskalistanum, helst villtur ef mögulegt en annars lax sem alinn er í landeldi. Það þykir okkur mjög mikilvægt, við berum aldrei fram lax sem alinn er í hinum náttúruskaðandi og mengandi sjókvíum. Það er líka mjög skemmtilegt að nota villibráð á þessum árstíma eins og grafna gæs eða hreindýr. Okkur finnst líka heita lifrarkæfan skemmtileg, mjög gott að nota bökuðu jólakæfuna frá Ali og steikja svo sveppi, beikon og jafnvel ferskar döðlur og setja ofan á, hafa þetta í eldföstu formi og setja inn í ofninn í nokkrar mínútur til að hita.

Svo er alltaf gott að enda á einhverju sætu, þá eru sörurnar hennar Kiddýjar alveg upplagðar enda gerir hún rosalega góðar sörur og bera þær fram með heitu súkkulaði með örlitlu Stroh út í. Það er svo gott að fá eitthvað sætt og heitt í kroppinn áður en maður heldur út í íslenskt aðventuveður. Stundum höfum við boðið upp á Álaborgar-ákavíti með síldinni, en með matnum bjóðum við gjarnan upp á bjór eða Moment of Silence (hvítvín) og Master of None (rauðvín) frá Suður-Afríku.

Það er árleg hefð á heimilinu að skera út laufabrauð. Fallega skreytt.

Epla- og wasabisalat

2 stk. Jonagold epli

Majónes og sýrður rjómi eftir smekk

Íslensk wasabirót, frá Nordic Wasabi eða fersk piparrót

Eplin afhýdd og rifin niður. Gott að setja í viskustykki og kreista mesta safann úr. Þetta er sett í skál og hæfilegu magni af majónesi og sýrðum rjóma bætt í. Mauka wasabirót og bæta í. Ef þið komist ekki í wasabirót, má einnig nota ferska piparrót. Gott að smakka þetta svo til, við viljum hafa salatið svolítið bragðmikið, finnst það passa vel með öllu reyktu, sérstaklega reyktum laxi.

Ýmislegt girnilegt sem boðið var upp á hjá þeim hjónum í dögurðinum.

Rauðrófusíld

1 dós sýrður rjómi (helst 36%)

2-3 msk. majónes

1½ dl. niðursoðnar rauðrófur

1½ dl. perur

2 dl. marineruð síld

Sýrði rjóminn og majónesið sett í skál. Þeir sem vilja sæta þetta örlítið geta gert það með hunangi eða hlynsírópi. Rauðrófurnar teknar úr krukkunni og þerraðar á pappír. Gott er að vera í einnota hönskum, þar sem rauðrófurnar lita mjög mikið. Því næst eru rauðrófurnar skornar í litla teninga. Perurnar afhýddar og kjarnhreinsaðar og skornar í litla bita. Síldin er þá skorin í bita og sett í skálina ásamt öllu hinu. Hræra vel saman. Sett í skál og skreytt með valhnetukjörnum og einhverju grænu. Þeir sem eru mjög hrifnir af hnetum geta sett svolítið af valhnetum í salatið og þeir ævintýragjörnu geta rifið örlítið af gráðosti út í.

Epla- og karrýsíld

1 dós sýrður rjómi (helst 36%)

2 msk. majónes

1½ dl. harðsoðin egg

2 dl. epli í bitum

2 dl. marineruð síld í bitum

2 tsk. madraskarrí

1 tsk. túrmerik

Saxaður graslaukur

Sýrði rjóminn, majónesið, karrýið og túrmerikið allt sett í skál og hrært. Skurnin tekin af eggjunum og þau skorin smátt. Eplin afhýdd og skorin í bita og síldin líka. Þetta allt sett í skálina og hrært saman. Dálitlu af graslauknum blandað saman við, en munið að eiga slatta til að setja ofan á til skreytingar.