Samstarf Camillu Läckberg og Storytel leiddi hana út fyrir þægindaramma rithöfundarins þegar hún skrifaði hljóðbókina Jökull, eða Glaciär, sérstaklega fyrir veituna upp úr eigin kvikmyndahandriti.

Sænski leikarinn og rithöfundurinn Alexander Karim skrifaði hljóðbókina með Camillu, en fer auk þess með annað aðalhlutverkið í bókinni og kvikmyndinni sem Baker Karim, bróðir hans, leikstýrir.

„Þetta var ný upplifun fyrir mig og þarna byrjaði ég frekar seint á starfsævinni að vinna með öðru fólki. En mér fannst það æðislegt. Við unnum vel saman og sköpunarkrafturinn milli okkar þriggja er algerlega frábær,“ segir Camilla. Hún segist þarna hafa farið í gegnum lærdómsríkt ferli og hún hafi lært mikið um handritaskrif og kvikmyndagerð af þeim bræðrum.

Camilla og Alexander kynntust við tökur á sænska sjónvarpsþættinum Stjärnorna på slottet, eða Stjörnurnar í kastalanum, fyrir nokkrum árum og „smullu saman“, eins og hún orðar það, þegar þau ræddu skapandi skrif fyrir sjónvarp og kvikmyndir.

Jökullinn logar

Camilla segir þau Alexander hafa fengið margar hugmyndir, en þegar heimsfaraldurinn skall á og þau horfðu á Stokkhólm tæmast, byrjaði Jökullinn að loga og þeim fannst þau verða að gera bíómynd.

„Við vildum gera ástarsögu í þessum aðstæðum,“ heldur Camilla áfram og úr varð saga Önnu og Erics sem koma úr ólíkum áttum en hittast og verða ástfangin á sóttvarnahóteli þar sem öll snerting og samneyti er bannað.

„Hugmyndin varð til þegar við horfðum í kringum okkur og sáum að við höfðum skyndilega verið svipt einhverju sem við höfum alltaf gengið að sem gefnu. Að geta snert aðrar manneskjur. Það er ekki fyrr en þetta er allt í einu tekið frá okkur sem við gerum okkur grein fyrir því hversu mikilvægt þetta er.

Sagan fjallar í raun um þetta. Örvæntingarfulla þörf fólks fyrir að elska einhvern annan, finna nálægð og snertingu. Þannig að í raun snýst þetta ekki um faraldurinn heldur um mikilvægi ástarinnar. Ástin sigrar allt. Vonin er miklu mikilvægari en við gátum ímyndað okkur og það hefur áhrif að fá ekki að snerta og vera með þeim sem við elskum,“ segir Camilla, staðföst í trúnni á ástina.

Glæpir og Covid

Veirufaraldurinn er þarna bakgrunnur ástarsögu, en fyrir þig sem glæpasagnahöfund hlýtur þetta ástand ekki síður að vera freistandi efniviður fyrir slíkar bækur?

„Já, ég er auðvitað alltaf með það í huga,“ segir Camilla og gengst við því að vera glæpa­fíkill. „Ég er alltaf að lesa og horfa á eitthvað um sönn sakamál og nú þegar eru komin upp mál í Bandaríkjunum þar sem fólk hefur reynt að drepa maka sinn og kennir svo Covid um. Þannig að já, þetta opnar að sjálfsögðu á ýmsa möguleika.“

Alexander Karim og Camilla eru byrjuð að huga að næstu mynd.
Fréttablaðið/Aðsend

Camilla segir aðspurð að hana hafi ekkert munað um að stökkva frá krimmum yfir í ástarsögu. „Nei, fyrir mér er það ekkert svo framandi vegna þess að ég hef alltaf litið á mig sem sögumann frekar en glæpasagnahöfund. Það er ekki merkimiðinn sem ég hengi á sjálfa mig. Ég hef líka gert ýmislegt annað. Matreiðslubækur, barnabækur og Faye-bækurnar eru til dæmis svolítið öðruvísi en glæpasögurnar. Mér fannst þetta frábært tækifæri til þess að geta virkilega sökkt tönnunum í dásamlega ástarsögu.“

Sterk glæpahneigð

Þótt Camilla líti ekki sérstaklega á sig sem reyfarahöfund hneigðist hún ung til skáldaðra glæpa og hefur verið farsæl á glæpabrautinni og notið mikilla vinsælda víða um heim. Ekki síst fyrir Fjällbacka-bókaflokkinn sem kenndur er við æskuslóðir hennar í Svíþjóð, sem verða þar ítrekað vettvangur morða og annarra ódæðisverka.

„Ég hef verið heltekin af glæpasögum alveg síðan í æsku og þetta byrjaði reyndar á bók sem ég fann uppi í bókahillu hjá pabba mínum. Það var Dauðinn á Níl eftir Agöthu Christie og þegar ég var sjö eða átta ára var ég þegar búin að lesa allt eftir hana. Ég elskaði þetta þannig að engilsaxneska hefðin yfirleitt hefur verið mér mikill innblástur.“

Norrænar rökkurstemningar

Norrænn glæpaskáldskapur í sjónvarpi, kvikmyndum og bókum, stundum kenndur við Nordic Noir-bylgjuna, hefur notið mikilla og vaxandi vinsælda víða um lönd.

Camilla hefur verið frek til fjörsins í þeirri útrás, en hefur hún einhverja kenningu um hvað það er við glæpasögur frá okkar almennt friðsæla heimshluta, sem höfði svo sterkt til alþjóðlegra lesenda.

„Það er ómögulegt að segja en ég er með mína eigin kenningu og hluti af henni er að þetta hafi byrjað með Sjöwall og Wahlöö,“ segir Camilla og hlær þegar böndin berast að löndum hennar og óumdeildum brautryðjendum í skandinavískum krimmum með sögunum um lögreglumanninn Martin Beck.

„Þau mörkuðu stefnuna þegar þau tvinnuðu saman glæpasögur, samfélagsmál og pólitísk álitamál og lyftu þannig sakamálasögum á hærra plan. Margir hafi síðan viljað ná því,“ segir Camilla.

„Nú ætla ég að fá lánað hjá sænskum kollega mínum, Lizu Marklund, sem ég heyrði einu sinni segja á fyrirlestri að við fengjum ekki glæpasögur frá stríðshrjáðum löndum.

Arnaldur er góður

Vegna þess að fólkið þar er að upplifa hryllinginn allt í kringum sig og til þess að skapa sögur eins og þessar þá þarf að vera með auðan striga. Hún líkti Norðurlöndunum við þennan tóma striga. Það er frekar rólegt hérna þannig að við höfum svigrúm til þess að skapa þessar sögur.“

Í framhaldinu er vitaskuld óhjákvæmilegt að spyrja Camillu hvort hún hafi lesið eitthvað eftir íslenska krimmahöfunda og kannski eins og við mátti búast er hún vel að sér í Arnaldi Indriðasyni.

„Ég ætla nú ekki að reyna að bera nafnið fram en hann er mest áberandi og ég hef lesið mikið af bókunum hans,“ segir Camilla og gerir síðan atlögu að nafninu með ágætis árangri. „Arnaldur. Hann er ljómandi góður höfundur. Ég á líka ættingja á Íslandi og hef eytt tíma þar, þannig að ég þekki frekar vel til á Íslandi og er algerlega heilluð af því. Ég mun sennilega koma til Íslands í haust.“

Björt framtíð

Covid varðar segir Camilla: „Ég er mjög bjartsýn. Ég er búin að fá fyrri sprautuna mína af tveimur og mamma er búin að fá sínar tvær. Hún kom að heimsækja mig og fjölskylduna um helgina í fyrsta skipti í eitt og hálft ár, þannig að samfélagið er að opnast aftur hægt og rólega.“

Camilla og Alexander skrifuðu Jökul sérstaklega fyrir Storytel og hún útilokar ekki að hún og bræðurnir muni vinna meira með hljóðbókaveitunni í framtíðinni.

„Ég held að ánægjan og trúin á þetta verkefni sé gagnkvæm. Ég finn mikla spennu og gleði í kringum þetta verkefni þannig að ef þetta mun ganga jafn vel og við vonum þá er það vissulega möguleiki.“

Fyrri verk Camillu hafa gengið mjög vel sem hljóðbækur hjá Storytel og ekki annað að sjá en bækur hennar falli vel að því formi

„Já, styrkur minn sem rithöfundar hefur alltaf legið í því að skrifa frekar einfaldan og aðgengilegan texta. Þetta er eitthvað sem bókmenntarýnar hafa látið fara í taugarnar á sér, en lesendur og hlustendur kunna vel við. Það skiptir mestu máli.“

Banvæn ást

Hljóðbókin Jökull, eftir þau Camillu Lackberg og Alexander Karim, segir frá Önnu og Eric sem fella saman hugi við nánast vonlausar aðstæður í miðjum heimsfaraldri þar sem hver snerting og allt náið samneyti getur leitt til dauða.

Alexander Karim og Elsa Engström leika Eric og Önnu sem taka ástina framyfir strangar sóttvarnareglur í kvikmynda- og hljóðbókaútgáfum Jökuls.
Fréttablaðið/Aðsend

Heimsbyggð öll er í heljargreipum og helmingur mannkyns hefur þegar orðið bráðsmitandi veirusjúkdómi að bráð. Veiran tekur sífelldum stökkbreytingum þannig að framleiðsla bóluefnis er nánast ómöguleg og allur samgangur fólks getur skapað bráða lífshættu.

Fólk úr efri lögum samfélagsins hefur leitað skjóls frá öngþveitinu á lúxushóteli í miðborg Stokkhólms. Enginn samgangur er á milli hótelgestanna sem fá allt sem þá kann að vanhaga um sent upp að dyrum.

Anna hefur eytt tveimur mánuðum á hótelinu þegar Erik skráir sig þar inn. Þrátt fyrir algert bann við slíku liggja leiðir þeirra saman fyrir mistök og ástin kviknar þannig að ekki verður aftur snúið.

Á meðan veiran fer hamförum um samfélagið og óöld ríkir utan hótelveggjanna tala Anna og Erik saman með talstöð á milli herbergja. Ástin sigrar allt en getur hún sigrað í heimi sem er að hruni kominn?

Halldóra Geirharðsdóttir og Hjörtur Jóhann Jónsson tala fyrir Önnu og Eric í íslensku útgáfunni.
Fréttablaðið/Aðsend

Hljóðbókin Jökull byggir á samnefndri sænskri kvikmynd, Glaciär, sem var frumsýnd í apríl á þessu ári og er aðgengileg á efnisveitunni Viaplay. Camilla Lackberg skrifar handrit myndarinnar sem hún og Alexander Karim lögðu síðan til grundvallar hljóðbókinni en bróðir Alexanders, Baker Karim, leikstýrir.

Alexander er ekki síður þekktur sem leikari en rithöfundur og hefur meðal annars brugðið fyrir í Zero Dark Thirty, eftir Kathryn Bigelow, og fer sjálfur með hlutverk Erics í bæði bíómyndinni og sænskri útgáfu hljóðbókarinnar.

Sænska leikkonan Elsa Engström leikur Önnu á móti Alexander en hún er líklega þekktust hér sem Erika Berger, útgefandi Millenium-tímaritsins, í sænska spennumyndaþríleiknum sem hófst með Karlar sem hata konur.

Þá lék hún Svídrottningu í hasarmyndinni Kingsman: The Golden Circle auk þess sem þau Alexander léku bæði í íslensk sænsku spennuþáttaröðinni Thin Ice, eða Ísalög, sem RÚV sýndi í fyrra.

Halldóra Geirharðsdóttir og Hjörtur Jóhann Jónsson ljá Önnu og Eric raddir sínar í íslensku útgáfunni