Einn vinsælasti matarbloggari landsins Berglind Hreiðarsdóttir sem heldur úti síðunni gotteri.is gaf á dögunum út bókina; Saumaklúbburinn. Bókin inniheldur 140 girnilegar uppskriftir og því var tilvalið að fá Berglindi til að gefa lesendum nokkrar girnilegar uppskriftir til að gera vel við sig um helgina.

Berglind Hreiðarsdóttir gaf á dögunum út bókina, Saumaklúbburinn. Fréttablaðið/Anton Brink

Pestósnúðar

Deig

500 g hveiti

1 pk. þurrger (11,8 g)

1 msk. sykur

2 tsk. salt

300 ml volgt vatn

40 ml ólífuolía

Fylling

250 g Sacla „Sun-Dried Tomato Pesto“

230 g rifinn ostur ( jöfn blanda af Cheddar og Gouda)

1 msk. Oregano krydd/Timian

  1. Setjið öll þurrefnin í skál og blandið saman.
  2. Hellið vatni og ólífuolíu saman við og hnoðið með króknum í hrærivélinni í um 5 mínútur (eða í höndunum, þá má hnoða aðeins lengur).
  3. Penslið skál með ólífuolíu og veltið deiginu upp úr svo það hjúpist olíu allan hringinn, plastið og leyfið að hefast í um 90 mínútur.
  4. Fletjið næst út á hveitistráðum fleti í um 40 x 50 cm ferhyrning.
  5. Smyrjið vel af pestó yfir allt, stráið ostinum yfir og kryddið.
  6. Rúllið upp frá lengri hliðinni og skiptið niður í 12 jafna snúða.
  7. Smyrjið eldfast mót og raðið snúðunum jafnt í það, plastið og leyfið að hefast aftur í um 30 mínútur.
  8. Hitið ofninn í 180°C og bakið snúðana eftir hefun í um 30-35 mínútur.