Svona var það heima, við sögðum bæði...

Hvernig voru æskujólin ykkar heima, eins og segir í laginu?

Svala: Mín æskujól voru yndisleg og ég á frá þeim undurfallegar minningar. Mamma og pabbi voru og eru mikið jólafólk, það var alltaf mikið skreytt heima og stórt jólatré. Þau spiluðu mikið af æðislegri, amerískri jólatónlist með Nat King Cole, Dean Martin og fleirum, en það var aldrei nokkurn tímann spiluð jólatónlist með pabba heima. Jólatréð var sett upp á Þorláksmessu og ég man að þau pökkuðu inn gjöfunum okkar seint sama kvöld. Við Krummi áttum þá að vera farin að sofa en stundum læddumst við fram til að njósna um hvað yrði í pökkunum. Pabbi og mamma voru auðvitað fljót að fatta að við værum að læðupokast. Við höfum alltaf átt kisur og þær voru duglegar að rústa jólaskrautinu, hoppa upp í tréð og henda því niður. Það var bara orðin hefð að það gerðist. Á aðfangadag byrjaði pabbi svo snemma að elda jólamatinn og búa til sósuna, en rétt eftir hádegið þeystum við pabbi af stað eins og jólasveininn um allan bæ með jólapakka til fjölskyldunnar.

Við höfum alltaf átt kisur og þær voru duglegar að rústa jólaskrautinu, hoppa upp í tréð og henda því niður. Það var bara orðin hefð að það gerðist.

Kristján: Ég átti frábær jól í æsku. Annað hvort vorum við bara fjölskyldan, ég, foreldrar mínir og tvær systur heima á aðfangadag, eða á Ófeigsstöðum hjá ömmu Svönu með tuttugu öðrum ættingjum. Á Þorláksmessu fórum við alltaf í graut til ömmu Helgu að Lækjarhvammi. Við systkinin erum öll mjög ofvirk og því var ein hefðin að leyfa okkur að velja einn pakka fyrir matinn til að róa okkur aðeins niður. Önnur hefð var á þann veg að sá yngsti var látinn lesa á jólapakkana en það var gegn mínum vilja því ég vildi það alls ekki. Ég var eins og fyrr segir frekar ofvirkt barn og átti það til að opna pakkana fyrir alla hina og hélt ég væri að hjálpa. Svo fékk ég auðvitað í skóinn og ef ég fékk kartöflu læddist ég með hana inn í herbergi Helgu systur um nóttina, skipti á skógjöfum jólasveinsins og lét Helgu fá kartöfluna.

Kristján, sem stundum er kallaður Kleini, því hann borðaði svo margar kleinur þegar amma hans stóð í kleinubakstri, segist hafa dottið á hnéð fyrir jólin í fyrra því hann gat ekki beðið eftir að biðja um hönd Svölu sinnar. fréttablaðið/eyþór

Svona vil ég hafa í ró og næði

Snúast jólin um frið og rólega daga, eða viljið þið hafa líf og fjör, spil og boð?

Svala: Undanfarin fimmtán ár hefur verið mikil keyrsla hjá mér í aðdraganda jóla og mikið af giggum. Því hefur aðfangadagur og jólahátíðin snúist um að borða góðan mat, slappa af, sofa og hafa það kósí. Ég elska að geta verið í náttfötunum þrjá daga í röð, borða mikið og kúra.

Kristján: Hjá mér er það eiginlega bæði. Stundum eru jólin voða keyrsla og mig langar í jólaboð og hitta fólk, en svo er ég stundum til í afslöppun og tjill. Ofvirknin í mér gerir það að verkum að ég á erfitt með að gera ekki neitt. Það þarf helst alltaf að vera að gera eitthvað.

Við fundum okkar jól og útkoman er að þetta er komið frá þér og þetta kannski frá mér

Hvernig eru ykkar jól?

Svala: Jólin hjá okkur eru voða afslöppuð. Bara að vera með fjölskyldunni, borða góðan mat, spila og verja tíma saman. Okkur finnst báðum mjög gaman að gefa gjafir þannig að við leggjum okkur fram í þeim efnum. Mér finnst ekkert endilega skipta máli að fá gjafir sjálf en þeim mun betra að vera sú sem gefur.

Kristján: Ég fer brátt á sjóinn en verð kominn í land nokkrum dögum fyrir jól. Þá ætla ég bara að njóta þess að vera með konunni minni og fjölskyldunni hennar yfir jólin. Fjölskyldan mín verður úti hjá Kristjönu systur minni, manni hennar og dóttur, sem búa í Plymouth á Englandi.

Þegar jólin koma eru þakklæti og ást efst í huga Svölu og Kristjáns. FRÉTTABLAÐIÐ/EYÞÓR

Þú og ég um jól, ein í alfyrsta sinn

Ykkar alfyrstu jól; voru þau eftirminnileg?

Svala: Fyrstu jólin sem ég man eftir var þegar ég var sex ára. Pabbi var rosa duglegur að taka allt upp á vídeó þegar ég var að alast upp. Ég man að ég var í blómóttu pilsi, peysu við og hvítum skóm með pinkulitlum hæl, og fannst ég svo fín og mikil skvísa. Ég elskaði Barbie og fékk eiginlega bara Barbie-dót í jólagjöf. Krummi bróðir, sem þá var fjögurra ára, var á þessu tímabili að leika sér með matinn sinn og þegar eftirrétturinn kom fannst honum voða gaman að vera með beinið úr lambakjötinu ofan í ísnum til að láta það vera eins og skrímsli ofan í ísskálinni! Þetta aðfangadagskvöld voru hjá okkur hjón og nánir vinir foreldra minna frá London og í bakgrunni ómuðu yndislegir jólatónar frá Bing Crosby og Dean Martin.

Kristján: Fyrsta jólaminningin mín er frá því ég var þriggja ára og fékk bláa krakkadráttarvél með tengivagni frá mömmu og pabba. Ég dýrkaði þennan traktor og var alltaf á honum úti um allt. Jólin sem ég fékk dráttarvélina vorum við á Ófeigsstöðum hjá ömmu Svönu og var traktorinn alltaf geymdur hjá ömmu svo ég gæti verið á honum í sveitinni. Ég held meira að segja að hann sé þar enn.

Þegar eftirrétturinn kom fannst honum voða gaman að vera með beinið úr lambakjötinu ofan í ísnum til að láta það vera eins og skrímsli ofan í ísskálinni!

Orðin svona stór en í hjarta mér finn, að stelpa lítil er sem langar heim til sín

Finnið þið löngun til að vera í faðmi stórfjölskyldunnar á aðfangadagskvöld eða viljið þið eiga ykkar eigin jól, bara tvö?

Svala: Ég bjó í áratug í Los Angeles og fannst æðislegt að eiga sum jólin þar. Auðvitað kom yfir mig mikill söknuður og þess vegna var öll fjölskyldan hjá mér á Skype yfir jólin. Eftir því sem ég eldist langar mig miklu meira að vera með fjölskyldunni minni yfir hátíðirnar. Mér finnst mikilvægt að eiga sem oftast samverustundir með þeim.

Við Kristján höfum ekki alveg ákveðið hvar við verðum um þessi jól. Við ætlum bara að sjá til. Fyrstu jólin okkar Kristjáns voru yndisleg. Við vorum hjá foreldrum mínum og Krummi bróðir og konan hans Linnea voru þar líka. Geggjaður matur og bara ótrúlega ljúft. Jól hjá foreldrum mínum eru í dag voða afslöppuð og við erum öll komin í kósífötin eftir matinn.

Kristján: Svo lengi sem ég er með þeim sem ég elska um jólin, þá er ég sáttur.

Kristján verður 30 daga á sjó áður en hann kemst í jólafrí. FRÉTTABLAÐIÐ/EYÞÓR

En hér erum við og jólin okkar.

Hvað eru jólin fyrir ykkur? Hafið þið komið ykkur upp ykkar eigin jólahefð?

Svala: Fyrir mér eru jólin fjölskyldan, góður matur og samverustundir. Þakklæti og ást. Ég er ekki með neinar hefðir. Ég meika ekki stressið sem stundum er í kringum jólin og er yfirleitt búin að kaupa jólagjafirnar í byrjun desember. Ég vil ekki eyða of miklum tíma í búðum rétt fyrir jól. Það finnst mér ekkert gaman.

Kristján: Jólin eru fjölskyldan, góður matur og að verja tíma með fólkinu sínu. Og jólapakkar; ég elska að gefa öðrum pakka.

Jú, við erum trúlofuð en við erum ekkert að flýta okkur að giftast.

Okkar fyrstu jólum við aldrei gleymum, eins og dýran fjársjóð þær myndir geymum

Á það við um ykkur? Þið trúlofuðust á aðventunni í fyrra. Er kannski jólabrúðkaup í vændum?

Svala: Já, fyrstu jólin okkar voru æðisleg og fullkomin í alla staði. Og jú, við erum trúlofuð en við erum ekkert að flýta okkur að giftast. Við erum bara að taka okkar tíma og svo gerist það þegar tíminn er réttur.

Kristján: Fyrstu jólin okkar Svölu voru mín fyrstu með annarri fjölskyldu en minni eigin. Mér fannst það æðislegt. Ótrúlega góður matur og góður félagsskapur. Jú, ég datt á hnéð á aðventunni í fyrra og það var bara vegna þess að ég gat ekki beðið.

Svala elskar að kúra og hafa það sem mest kósí um jólin. FRÉTTABLAÐIÐ/EYÞÓR
Fréttablaðið/Eyþór

Við tvö og allt er nýtt, og annað en var, í okkar heimi orðin svona stór.

Hvernig hafa jólin breyst eftir að ástin bankaði upp á; er allt orðið nýtt og annað en var?

Svala: Þegar maður er ástfanginn þá verða jólin mjög rómantísk og krúttleg. Það að fá að eyða jólum með sínum sálufélaga er dýrmætt og fallegt.

Kristján: Með Svölu breyttust jólin frá því að vera falleg í það verða enn fallegri og dýrmætari.

Svo verður einhver seinna til að segja frá, hvað allt var hljótt þetta kvöld. Við horfðum hvort í annars augu, áttum veröld nýja, bara undrandi börn, ástin er blíð um jól.

Eru jólin í ykkar huga rómantískur tími? Skerpast tilfinningar á milli fólks um jól og eru minningar jólanna hjartfólgnari en ella?

Svala: Já, jólin eru tíminn til að styrkja fjölskyldu- og vinabönd. Fyrir mér eru þau tími til að vera þakklátur fyrir það sem maður hefur og ég verð alltaf smá væmin á þessum árstíma. Samt er ég í dag ekkert mesta jólabarnið, þó svo að ég hafi verið það sem krakki. Ég vil umfram allt vera með fólkinu sem er mér kærast og knúsa það mikið. Öll jól eru mikilvæg þó svo að þau séu aldrei eins. Þeim fylgja jú öllum minningar sem fylgja manni út lífið og gera líf manns ríkara.

Kristján: Jólin hafa þannig áhrif á mig að ég verð væminn og smá dramadrottning. Ég var alltaf yngstur í krakkahópnum, og fékk þá mestu athyglina, þannig að Svala þarf að díla við það að sýna mér mikla athygli og ást yfir jólin. Mér finnst jólin vera rómantískur tími og það hefur þau áhrif á mig að ég verð svaka rómó á þessum árstíma.

Ég var alltaf yngstur í krakkahópnum, og fékk þá mestu athyglina, þannig að Svala þarf að díla við það að sýna mér mikla athygli og ást yfir jólin.

Hvað er efst á óskalistanum fyrir þessi jól?

Svala: Ég er svo skrýtin með gjafir. Ég vil aldrei fá neinar gjafir því mér finnst mig aldrei skorta neitt. Mér finnst sælla að gefa en að þiggja. Kristján gaf mér ótrúlega fallegar gjafir í fyrra og ég hef bara aldrei fengið svona mikið af jólagjöfum frá kærasta áður. Ég var í smá sjokki því þetta var svo mikið og flott. Ég hefði verið svaka sátt með fallegt ilmkerti. Ég elska ilmkerti og þeir sem þekkja mig vita að það er alltaf fullkomin gjöf fyrir mig.

Kristján: Mér finnst óþægilegt að taka við gjöfum frá öðrum en er þeim mun meira í því að gefa öðrum pakka.

Kristján gaf mér ótrúlega fallegar gjafir í fyrra og ég hef bara aldrei fengið svona mikið af jólagjöfum frá kærasta áður. Ég var í smá sjokki því þetta var svo mikið og flott.

Til hvers hlakkið þið mest á jólunum?

Svala: Ég er voða mikil kósístemningstýpa og elska að horfa á bíómyndir í náttfötunum, lesa góða bók, kveikja á kertum og vera heima hjá mér. Kristján fer á sjóinn eftir nokkra daga og verður í heilan mánuð úti á sjó, en hann kemur í land fáeinum dögum fyrir jól og ég er strax orðin spennt að fá hann heim og vera með honum yfir hátíðirnar.

Kristján: Elf bíómyndin! Ég hlakka til að geta horft á Elf nokkrum sinnum án þess að skammast mín.

Kristján segist ekki enn hafa verið bókaður á svið með Jólagestum Björgvins, en grínast með að hann bíði við símann. FRÉTTABLAÐIÐ/EYÞÓR

Hvað kemur ykkur í jólaskap?

Svala: Jólaskapið kemur þegar byrjar að snjóa. Sérstaklega þegar snjó kyngir niður, allt verður svo undurhljótt úti og maður finnur frið við það eitt að horfa á snjókorn falla. Svo er eitt lag sem kemur mér alltaf í jólaskap, það er Driving home for Christmas með Chris Rea. Ég upplifi alltaf mikla nostalgíu við að heyra það og það minnir mig á jólin þegar ég var lítil stelpa. Jólin eru svo mikið fyrir börnin og ef maður fær bara smá krakkafíling og nostalgíu er ég dottin í jólagírinn.

Kristján: Það kemur mér í jólaskap að sjá fólk í jólasveinabúningum gefa krökkum mandarínur.

Bakið þið til jólanna og eruð skreytiglöð?

Svala: Nei, ég baka ekki fyrir jólin, en ég elska að borða jólasmákökur, tertur og góðgæti sem aðrir baka. Ég er alls ekki skreytiglöð og hef aldrei verið það. Ég á samt alveg nokkra jólahluti sem ég set alltaf upp en það er allt voða minimalískt í skreytingum hjá mér.

Kristján: Hart nei.

Hjá mér eru það 30 dagar umkringdum sveittum hásetum úti á sjó, að telja niður dagana þangað til ég kem heim til Svölu minnar.

Hvað er fram undan í aðdraganda jólanna?

Svala: Ég verð að gigga eins og vanalega. Ég var rosa mikið bókuð í nóvember og desember en svo voru reglur hertar á ný og mikið af þeim giggum hefur verið aflýst. Sem er alveg ótrúlega leiðinlegt. Við í bransanum höfum nánast verið atvinnulaus í að verða tvö ár og það tekur mikið á að geta ekki unnið við það sem maður hefur starfað við í tvo áratugi. Ég verð á Jólagestum Björgvins þann 18. desember í Laugardagshöllinni og líka á mjög krúttlegum tónleikum sem heita Litlu jólin í Bæjarbíói á Þorláksmessu. Í desember verða fleiri minni gigg og maður vonar bara að það haldi sér og einhverjar afléttingar verði. Á sama tíma skil ég hundrað prósent að þetta er nauðsynlegt inngrip þegar svona mikið álag er á spítölunum og virði það. En ég hef líka þá trú að það sé mjög mikilvægt fyrir fólk að komast á tónleika og vera innan um annað fólk. Það hreinlega bjargar geðheilsunni að geta farið í leikhús og á tónleika, listsýningar og slíkt. Ég er sem betur fer mjög góð í því að vera æðrulaus og líta á björtu hliðarnar og það hjálpar mér þegar ástandið er svona. Á nýárinu er svo ný tónlist á leiðinni frá mér, í kjölfar nýja lagsins, Birtunnar brú, og myndbandsins við það sem ég gaf út í september.

Kristján: Hjá mér eru það 30 dagar umkringdur sveittum hásetum úti á sjó, að telja niður dagana þangað til ég kem heim til Svölu minnar.

Verður þú óvæntur gestur og tekur lagið með Svölu á Jólagestum Björgvins, Kristján?

Kristján: Ég hef allavega ekki verið bókaður, en ég bíð við símann.

Fylgist með Svölu og Kristjáni á Instagram: @svalakali og @k.l.e.i.n.i

Þetta viðtal birtist fyrst í Jólablaði Fréttablaðsins föstudaginn 19. nóvember 2021.