Ævar segist vera jólabarn, en að hann reyni að hafa hemil á því þangað til á aðventunni.

„Ég leyfi mér ekki að detta í stuðið fyrr en á aðventu,“ segir hann. „Í morgun kveikti ég til dæmis á bílnum og það var óvart stillt á jólastöð og þá varð smá panik. Ég vil ekki verða þreyttur á stemningunni of snemma. Kannski þýðir það samt að ég sé ekki alvöru jólabarn, mig grunar að þau fagni jólatónlist töluvert fyrr en ég.“

Ævar hefur ekki mikið af jólahefðum því hann hefur venjulega lítinn tíma fyrir þær.

„Fyrir mig snúast jólin mikið um vinnutörn því síðustu árin hef ég alltaf verið með bók í jólabókaflóðinu, þannig að alveg fram á aðfangadag er maður á fullu við hluti tengda því; fylgja bókinni eftir, árita, skjótast hingað og þangað með eintök og svo framvegis. En svo bætist auðvitað allt hefðbundna jóladútlið við,“ segir Ævar. „Þetta eru að vísu áttundu jólin í röð sem ég er með bók, svo þetta stúss er eiginlega orðið hluti af hefðinni.

En við fjölskyldan erum líka með litlar hefðir sem við höldum í á milli ára. Oftast kaupum við jólatréð okkar á Jólamarkaði Skógræktarfélags Reykjavíkur í Heiðmörk, við kíkjum alltaf til foreldra minna úti í sveit milli jóla og nýárs og síðan strákurinn okkar fæddist höfum við konan mín haldið jólin okkar heima, bara við þrjú. Jólatónleikar Baggalúts eru líka hluti af jólaundirbúningnum og það stendur að sjálfsögðu líka til núna.

Ég held samt að aðalþemað þessi jólin verði að huga að sóttvörnum, fara varlega, vera ekki að þvælast að óþörfu, panta allt sem maður getur mögulega pantað á netinu og horfa á eitthvað skemmtilegt heima,“ segir Ævar.

Ævar horfir alltaf á Christmas Vacation um jólin.

Sækir í þessar gömlu góðu

„Ég er mikill kvikmyndaáhugamaður og bæði horfi ég mikið á kvikmyndir og hlusta á hlaðvörp tengd kvikmyndum og því sem gerist bak við tjöldin,“ segir Ævar. „Ég hef mikinn áhuga á fólki sem skapar og finnst áhugavert hvernig bækur, kvikmyndir og þættir verða til.“

Það eru nokkrar myndir sem Ævar horfir reglulega á um jól.

„Ég horfi alltaf á Christmas Vacation. Það er númer eitt, tvö og þrjú. Hún er líka svo dásamleg að maður er alltaf að sjá eitthvað nýtt í henni,“ segir hann. „Í henni er líka eitt flottasta leiklistaraugnablik sögunnar þegar Chevy Chase er uppi í stiga utan á húsinu sínu að hengja upp ljósaseríu, er kominn öfugu megin við stigann og getur ekki ákveðið hvernig hann eigi að ná taki á honum til að komast aftur á réttan kjöl. Ótrúlega mennskt og satt augnablik, óaðfinnanlega leikið.

Margar af þeim myndum sem maður sækir í yfir hátíðirnar eru myndirnar sem maður sá þegar maður var yngri, eins og Home Alone og Nightmare Before Christmas,“ segir Ævar. „Elf er reyndar mynd sem ég kom að seinna en mér finnst samt mjög skemmtileg. Svo er það Die Hard. Fólk rífst um hvort það sé jólamynd eða ekki en mér er alveg sama, mér finnst afar kósí að horfa á hana um jólin.

Svo eru líka myndir sem maður tengir aðallega við að vera í fríi og að geta gefið sér tíma til að horfa. Þá koma Lord of the Rings og Harry Potter myndirnar sterkar inn,“ segir Ævar. „Ef útreikningar mínir reynast réttir er komið að Potter þessi jólin. Svo er maður auðvitað alltaf að leita að nýjum kvikmyndabálki til að sökkva sér í.

Apollo 13 er líka mynd sem við horfum oft á um jólin. Það er eitthvað við hana sem er mjög kósý og jólalegt, finnst mér,“ segir Ævar. „Það eru einhverjir töfrar í þeirri mynd.“

Ævar býst við að rifja upp kynnin við Harry Potter um þessi jól.
The Rock verður oft fyrir valinu milli jóla og nýárs.

Hasar og huggulegheit

„Svo er líka ein mynd sem við horfum stundum á milli jóla og nýárs, en það er hin stórkostlega The Rock,“ segir Ævar. „Leikararnir, söguþráðurinn, tónlistin - það er allt frábært við hana. Ætli það sé ekki þannig að fyrir jól tekur maður jólalegustu myndirnar, svo taka LOTR eða Potter við og svo þegar áramótin eru handan við hornið fer maður meira í hasarinn.

Maður leitar samt líka í kósý myndir um jólin og Ghostbusters og Groundhog Day. Þetta eru myndir sem maður hefur séð endalaust oft en getur einhvern veginn alltaf horft á einu sinni enn. Já, og ef The Grinch með Jim Carrey er í sjónvarpinu sest ég líka niður og horfi á að minnsta kosti 15 mínútur og hristi hausinn yfir því hvernig Carrey fer eiginlega að þessu,“ segir Ævar.

,,Stundum finnst mér líka huggulegt að horfa á sérstaka jólaþætti úr sjónvarpsseríum eins og That 70‘s Show, Friends, Brooklyn 99 eða Scrubs,“ segir Ævar.

Ævar segist almennt vera lítið fyrir nýjar jólamyndir.

„Ég sæki allavega mest í það sem ég horfði á þegar ég var yngri. Maður er alltaf að leita að þessari gömlu góðu tilfinningu. Það er eins með jólalögin, maður hlustar alltaf á sömu gömlu jólalögin. Nýju venjast, en það tekur alltaf smá tíma,“ segir Ævar. „Sama gildir um nýjar jólamyndir, það tekur alltaf nokkur ár að taka þær í sátt. Á listanum fyrir þessi jólin er teiknimyndin Klaus á Netflix sem er nokkurra ára gömul og ég veit fyrir víst að á að vera stórkostleg. Ég hlakka til að kíkja á hana.“

Ævar fær aldrei nóg af Groundhog Day.

Ný bók og glæpasería

Það er annars nóg um að vera hjá Ævari þessa dagana.

„Ég er með bók fyrir jólin sem heitir Þín eigin ráðgáta og er hluti af „Þín eigin“ bókaröðinni. Henni hefur verið tekið gríðarlega vel og er enn sem komið er ein af vinsælustu bókunum í flóðinu þetta árið,“ segir hann. „Svo er ég að leika í Svörtu söndum, nýrri glæpaseríu frá Baldvin Z og Glassriver, sem verður frumsýnd á Stöð 2 milli jóla og nýárs. Það verður gaman að fylgjast með viðbrögðunum við henni. Ég er náttúrulega leikari í grunninn, en þar sem ég hef verið að skrifa svo mikið síðastliðin ár hefur sá vöðvi ekki verið mikið notaður. Við tókum þættina upp í sumar og ég er ekki frá því að Baldvin sé einn besti leikstjóri sem ég hef unnið með. Hann er algjör leikarahvíslari.“