Stjórn Skokkhóps Hauka sér um skipulagningu hlaupsins undir formennsku Rannveigar Hafberg. Hlaupið byrjar á Ásvöllum í Hafnarfirði, þaðan liggur leiðin upp að og kringum Hvaleyravatn, og um náttúruperlur í upplandi Hafnarfjarðar. „Við erum venjulega með tónlistaratriði og fleiri skemmtiatriði í kringum hlaupið og það gerir stemninguna enn skemmtilegri að fólk hefur verið duglegt að koma, bæði til að hvetja eða hlaupa. Við erum alltaf löngu búin að panta rosalega gott veður, sem hefur tekist hingað til. Það verður að sjálfsögðu gott veður í ár, ég lofa því bara hér og nú,“ segir Anton.

Myndir frá Hvítasunnuhlaupinu 2018.

Í ár ákvað stjórnin okkar að aðeins 500 manns kæmust í hlaupið að hámarki og Anton hvetur fólk að drífa sig í að skrá sig þar sem þegar eru margir búnir að því. Hlaupið er vinsælt hjá erlendum hlaupurum jafnt sem helstu hlaupurum landsins, enda er gefinn ITRA-punktur fyrir þá sem klára 22 kílómetra leiðina. „Til að komast í sum, stór hlaup erlendis, þarftu að vinna þér inn ákveðið marga ITRA-punkta. Þetta hlaup gefur einn punkt, en það eru þrjár vegalengdir sem hægt er að hlaupa í Hvítasunnuhlaupinu, 14 kílómetra hlaup, 17 og hálfs kílómetra og svo 22 kílómetra hlaupið. Menn geta valið sér vegalengd við hæfi.“ Annars er hlaupið góð æfing fyrir til dæmis þá sem ætla að hlaupa Laugavegshlaupið þann 13. júlí í ár. „Flestir sem fara í Laugavegshlaupið hlaupa í Hvítasunnuhlaupinu til að undirbúa sig, en Hvítasunnuhlaupið bíður upp á hækkun og lækkun, malarstíga og grasstíga, mjóa stíga, breiða stíga og allt þar á milli.“

Myndir frá Hvítasunnuhlaupinu 2018. myndir/Ragnhildur Aðalsteinsdóttir.

„Hluti ágóða Hvítasunnuhlaupsins ár hvert rennur til styrktar Skógræktarfélags Hafnarfjarðar, en þau sem standa fyrir henni hafa notað upphæðina í viðhald og endurnýjun á göngustígum, sem nýtist síðan öllum náttúruhlaupurum, enda er svæðið gríðarlega vinsælt svæði til æfinga,“ segir Hreiðar Júlíusson, hlaupaþjálfari og stjórnarmaður í Skokkhópi Hauka.

Anton segir að það sé stefnt að því að gera hlaupið vistvænt, í ár verður til dæmis ekki boðið upp á einnota drykkjarmál á drykkjarstöðum. „Öllum sem taka þátt í hlaupinu verður gefið margnota glas sem er hægt að brjóta saman. Menn verða að vera með drykkjarmálin sín ef þeir ætla að fá vatn á drykkjarstöðum. Þetta fyrirkomulag er aðeins byrjað erlendis, en Hvítasunnuhlaupið er líklega fyrsta hlaupið á Íslandi til að framkvæma þetta.“ Skipuleggjendur Laugavegshlaupsins tilkynntu að þeir myndu hafa sama fyrirkomulag.

Eftir hlaupið verður svo boðið upp á veitingar, heita súpu og Hleðslu, og verðlaun verða afhent. „Hlaupið er haldið í samstarfi við Sportís, í verðlaun eru alls konar vörur frá þeim eins og hlaupaskór til dæmis, ásamt fjölda vinninga frá öðrum góðum styrktaraðilum“ segir Anton. Þá er bæði möguleiki á að vinna verðlaun fyrir árangur í hlaupinu og að vinna útdráttarvinninga fyrir þátttöku.