Viktor Örn og Berglind komu fram í þættinum Matur og heimili á Hringbraut. Það var sannkölluð jólastemning yfir hátíðarkvöldverðinum sem þau framreiddu af hjartans lyst. Viktor Örn er einn metnaðarfyllsti íslenski matreiðslumaðurinn og hefur í gegnum árin prófað sig áfram með djarfar nýjungar.

Viktor eldaði úrbeinaðan lambahrygg og brá út af klassískum jólahefðum og „færði nýja sælkerasteik upp á fat“. Lykilinn að velgengni í eldamennsku segir Viktor vera spennandi meðlæti þar sem brögðin fái að njóta sín með aðalréttinum. Viktor bauð upp á dýrindis kartöflumauk, hungangsgljáðar regnbogagulrætur og rauðvínssósu með fyllta lambahryggnum.

Jólatvist úr sjávarfangi

Viktor Örn tók jafnframt snúning á forrétti sem tekur örskamma stund að framreiða. Er hér um að ræða tvist úr sjávarfangi, risarækjum og hörpuskel með skemmtilegri útfærslu.

„Framreiðsla réttanna skiptir líka miklu máli og ég legg mikið upp úr því að bera matinn fallega fram á borð, það gleður bæði auga og munn,“ segir landsliðskokkurinn Viktor Örn.

Piparmintan minnir á jólin

Berglind veit fátt skemmtilegra en að bregða á leik í eldhúsinu og elskar að baka og útbúa ljúffenga eftirrétti sem bráðna í munni. Hún er þekkt fyrir bakstur sinn og ástríðuna í eldhúsinu. Berglind tók við keflinu þegar kom að eftirréttinum.

„Pavlovur eru áttunda undur veraldar, ég get svo svarið það. Einu sinni byrjað og þú getur ekki hætt. Pavlova er hvít og falleg eins og vetrarsnjórinn og það er eitthvað við piparmintu sem minnir mann á jólin. Því finnst mér þessi uppskrift vel við hæfi. Það besta við þessa uppskrift, fyrir utan bragðið, er að það má gera hana kvöldinu áður. Á aðfangadag er svo hægt að setja hana saman í rólegheitunum. Það er eftirréttur að mínu skapi,“ segir Berglind sem er mjög slök þegar kemur að matarhefðum um jólin og leggur meiri áherslu á að fólkið hennar og hún hafi það huggulegt um jólin.

Hér deila þau með lesendum uppskriftunum af þriggja rétta hátíðakvöldverðinum.

Pönnusteiktar risarækjur með mangó og sesam-majónesi.

Pönnusteiktar risarækjur með mangó og sesam-majónesi

Fyrir 3-4

Risarækjur og hörpudiskur

2-3 risarækjur á mann

2-3 hörpuskeljar á mann

Sítróna

Olía

Salt og pipar

Mangó salsa

1 stk. ferskt mangó skorið í litla teninga

½ chillipipar fínt saxaður

2-3 msk. ferskur kóríander eða graslaukur fínt saxaður

3-4 msk. mangó chutney úr krukku

Hörpuskel og risarækja eru sett á sitt hvort grillspjótið. Olíu hellt yfir og kryddað til með salti. Hitið pönnuna vel og steikið spjótin.

Best er að elda hörpuskelina 90% af eldunartímanum á annarri hliðinni og svo snúa rétt til að loka hinum megin, þá fáum við fallega gyllta steikingu á aðra hliðina. Risarækjurnar eru steiktar í um það bil 3 mínútur á hvorri hlið.

Takið svo spjótin af pönnunni og á bakka, kreistið smá sítrónusafa yfir. Mangó salsa sett ofan á. Berið fram á fallegum disk og skreytið. Það passar mjög vel að hafa gott majónes eða aioli með.

Pestó fylltur lambahryggur með parmesan og hvítlauk.

Pestó-fylltur lambahryggur með parmesan og hvítlauk

1 stk. lambahryggur ( úrbeinaður)

5-6 msk. pestó

50 g parmesan

Olía

Salt og pipar

Fylling

Basil pestó

200 g basil

1 hvítlauksrif

45 g ólífuolía

60 g kasjúhnetur eða furuhnetur

50 g eða eftir smekk af parmesan

Hnetunum er velt upp úr olíu og léttristaðar í ofni á 180 í 6 mínútur.

Sett í blandara eða matvinnsluvél með basil, hvítlauk og olíu og maukað vel saman, rifnum parmesan bætt við í lokin, kryddað til með salti og pipar.

Hryggurinn fylltur og lokað.

Leggið hrygginn með fituhliðina á brettið. Penslið með smá olíu, kryddið með salti og pipar, takið svo fínt rifjárn og rífið hvítlauksgeira yfir kjötið. Fyllið miðjuna á hryggnum af pestóinu. Rífið ferskan parmesan yfir.

Rúllið svo upp hryggnum og bindið vel með bindigarni.

Ofninn er hitaður í 220°C, þegar kjötið fer inn í ofninn má lækka niður í 150°C-160°C. Best er að nota hitamæli og elda hrygginn upp í 52°C og láta hann svo hvíla á bretti í 10-15 mínútur.

Hunangsgljáðar gulrætur.

Hunangsgljáðar gulrætur

10 stk. íslenskar regnbogagulrætur

4 greinar rósmaríngreinar

4 msk. hunang

2 msk. olía

Dill

Salt og pipar

Byrjið á því að hita ofninn í 180°C. Gulræturnar eru þvegnar vel og endar snyrtir, svo velt upp úr olíu og hunangi, kryddaðar með salti og pipar. Síðan eru þær settar á bakka og bakaðar í 30-40 mínútur eða þar til þær eru orðnar mjúkar í gegn, stráið svo fínt söxuðu dilli yfir þær.

Kartöflumauk

500 g kartöflur (helst möndlukartöflur)

150 g niðursoðinn rjómi

100 g kalt smjör í teningum

Sjóðið kartöflurnar, skrælið þær og þrýstið í gegnum sigti til að þær maukist. Blandið þeim við heitan niðursoðinn rjómann, hitið kartöflumaukið við miðlungs hita og hrærið stanslaust með sleif á meðan í 5-10 mínútur.

Bætið svo smjörinu við og hrærið áfram þar til smjörið er uppleyst og blandað við kartöflumaukið. Kryddið til með salti. Gott er að bæta nokkrum dropum af truffluolíu saman við til að fá gott bragð.

Ómótstæðileg piparmintu-pavlova með hvítum súkkulaðirjóma.

Piparmintu-pavlova með hvítum súkkulaðirjóma

Botnar (3 stykki í þremur stærðum)

150 g eggjahvítur, geymdar við stofuhita

300 g flórsykur

1 tsk. piparmintudropar

Hvít súkkulaðimús

500 ml rjómi

300 g hvítir súkkulaðidropar

Skraut

1 poki Bismark-brjóstsykur 50 g suðusúkkulaði

Hindber eða önnur ber að eigin vali

Pavlovu-marengsbotnarnir

Setjið eggjahvíturnar í hreina og þurra hrærivélarskál. Hrærið á hæstu stillingu í 3-4 mínútur. Bætið flórsykri saman við smátt og smátt og hrærið áfram. Þegar allur flórsykurinn er kominn saman við hrærið í 5 mínútur til viðbótar. Bætið piparmintudropunum saman og á lægstu stillinguna. Hrærið í 30 sekúndur til viðbótar. Setjið smjörpappír á ofnplötur og gerið botnana þrjá. Setjið þrjár stórar skeiðar af marengsum fyrir neðsta botninn, tvær skeiðar fyrir miðju botninn og eina fyrir þá efstu. Deilið afganginum á milli og mótið marengsinn með sleikju. Látið inn í 100°C heitan ofn í 1 klukkustund og 30 mínútur. Opnið ekki ofninn á meðan marengsinn er að bakast. Þegar tíminn er liðinn slökkvið á ofninum og látið marengsinn vera í ofninum þar til ofninn er orðinn kaldur. Þetta er gott að gera kvöldinu áður.

Hvít súkkulaðimús

Setjið súkkulaðidropana í skál. Hitið rjómann að suðu í potti við vægan hita en látið ekki sjóða. Hellið yfir súkkulaðið og látið standa í 5-10 mínútur eða þar til súkkulaðið er bráðið. Blandið vel saman, setjið filmu yfir skálina og látið í ísskáp í að minnsta kosti 2 klst. eða yfir nótt. Takið þá úr kæli og þeytið í hrærivél á hæstu stillingu þar til rjóminn er þeyttur.

Setjið stærsta botninn á kökudisk. Látið súkkulaðirjóma þar yfir. Endurtakið með hina botnana. Bræðið súkkulaðið yfir vatnsbaði og kælið lítillega. Skreytið með muldum brjóstsykri, berjum, súkkulaðisósu. Svo er voðalega flott að sigta flórsykur yfir kökuna.

Njótið vel og gleðileg jól.