Hér eru á ferðinni heimabakaðir bakaríssnúðar sem hafa slegið rækilega í gegn og erfitt er að toppa. Uppskriftin kemur úr smiðju Maríu Gomez lífsstíls- og matarbloggara með meiru sem heldur úti síðunni Paz.is. Hún kann svo sannarlega að kveikja í bragðlaukunum og útbúa dýrðlegar kræsingar með kaffinu sem erfitt er að standast. Þessa snúða verðið þið að prófa og vert er að nostra við baksturinn og hafa gaman að.

Snuðar 2

Snúðar

700 g hveiti

1 ½ tsk. salt

4 tsk. þurrger

80 g sykur

4 dl volgt vatn

1 dl jurtaolía

Fylling:

3 msk. sykur

3 msk. púðursykur

1 msk. kanill

Glassúr:

4 dl flórsykur

3 msk. kakó

100 g brætt dökkt súkkulaði

½ tsk. salt

1-2 msk. kaffi

1-2 msk. mjólk

½ tsk. vanilludropar

Snuðarnir 3

Aðferð:

Snúðar

Byrjið á að setja öll þurrefnin saman í skál og hrærið létt saman með króknum á hrærivélinni. Bætið því næst við vökvanum og hnoðið hægt í hrærivélinni fyrst og aukið svo hraðan smátt og smátt. Það þarf að hnoða deigið í heilar 5 mínútur og takið því tímann. Næst er svo að láta deigið hefast á volgum stað undir röku stykki í 30 mínútur. Þegar deigið er búið að hefast er hveiti sáldrað á borðið, og deigið tekið úr skálinni. Hrærið næst saman sykrinum og kanilnum í fyllinguna., og fletjið svo deigið út í ferning. Stráið svo fyllingunni jafnt yfir ferninginn og rúllið upp í lengju. Skerið svo lengjuna í hæfilega bita og raðið á bökunarplötu með smjörpappa. Hitið svo ofninn á 50 °C og spreyið hann að innan með volgu vatni

Spreyið svo volgu vatni á snúðana og setjið í ofninn í 45 mínútur. Gott er að spreyja vatni á þá 1-2 sinnum meðan þeir eru í ofninum, en í þessu ferli eru þeir ekki að bakast heldur eru þeir í volgum ofninum til að hefast. Þegar 45 mínútur eru liðnar eru snúðarnir teknir út og ofninn hitaður upp í 210 gráður blæstri. Bakist svo í 10-12 mínútur. Látið kólna á grind meðan glassúr er gerður en um leið og þeir komu úr ofninum penslaði ég þá með sykurvatni svo þeir yrðu alveg eins og í bakaríi. Sykurvatnið gerði ég úr 3 msk. af sykri og 4 msk. af sjóðandi heitu vatni. Mikilvægt er að pensla þá um leið og þeir koma úr ofninum, sjóðandi heita.

Glassúr

Bræðið 100 grömm af dökku súkkulaði yfir vatnsbaði og setjið til hliðar. Næst er flórsykur settur í skál og restin af þurrefnunum. Hrærið þessu saman létt með skeið og setjið svo vökvann út í. Ef glassúrinn er of þykkur setjið þá bara dropa og dropa af vatni þar til hann verður hæfilega þykkur. Þegar snúðarnir eru búnir að kólna er glassúrinn settur á og voila alles klar til að borða. Þeir eru alveg geggjað góðir með kaldri mjólk með klaka út í.