Friðrik Sigurðsson er handhafi Kærleikskúlunnar 2020. Hann er frumkvöðull í réttindabaráttu fatlaðs fólks og hefur í raun helgað líf sitt réttindabaráttunni.

Árlega velur stjórn Styrktarfélags lamaðra og fatlaðra handhafa Kærleikskúlunnar. Hún er veitt framúrskarandi fyrirmynd fyrir störf í þágu fólks með fötlun.

Friðrik Sigurðsson er þroskaþjálfi og starfaði um árabil sem framkvæmdastjóri Landssamtakanna Þroskahjálpar. Hann er einn af stofnendum hátíðarinnar List án landamæra og verndari hennar. Hann stóð einnig að stofnun Átaks, félags fólks með þroskahömlun og er heiðursfélagi í samtökunum. Friðrik átti líka hugmyndina að skemmtiþáttunum Með okkar augum. Hann kom einnig að stofnun sendiherra um samning Sameinuðu þjóðanna um réttindi fatlaðs fólks.

„ Friðrik er ötull baráttumaður og frumkvöðull í réttindabaráttu fatlaðs fólks. Hann hefur aldrei hætt baráttunni og er enn fullur af eldmóð og er sannarlega verðugur handhafi Kærleikskúlunnar," segir í tilkynningu frá Styrktarfélagi lamaðra og fatlaðra.

Kærleikskúlan eftir Erró sem kom út áirð 2003. Kúlan 2020 verður frumsýnd í kvöld.

18 árið sem Kærleikskúlan er gefin út

Liðsfélagar sjónvarpsþáttanna Með okkar augum komu Friðriki á óvart og afhentu honum fyrstu Kærleikskúluna ársins fyrir utan vinnustað hans. Kærleikskúlan verður svo frumsýnd í Vikunni hjá Gísla Marteini í kvöld og hulunni svipt af því hvaða listamaður skapaði Kærleikskúlu ársins.

Þetta er í átjánda sinn Styrktarfélags lamaðra og fatlaðra gefur út Kærleikskúluna en margir af fremstu listamönnum þjóðarinnar hafa lagt félaginu lið með því að skapa listaverk á glerkúluna. Má þar nefna Erró, Ólaf Elíasson, Rúrí, Yoko Ono, Ragnar Kjartansson og fl.

Kærleikskúlan 2020 kemur í verslanir um land allt fimmtudaginn 3. desember. Allur ágóði af sölu Kærleikskúlunnar rennur óskiptur til sumarbúðanna í Reykjadal. Þangað koma fötluð börn og ungmenni alls staðar að af landinu. „ Dvölin er börnunum og fjölskyldum þeirra afar mikilvæg en mikið er lagt upp úr því að skapa ævintýri og ógleymanlegar minningar hjá þeim gestum sem þar dvelja."

Með okkar augum hópurinn tilbúinn að færa Friðriki fyrstu Kærleikskúlu ársins. Fremri röð frá vinstri: Andri Freyr, Steinunn Ása, Elva og Katrín. Aftari röð frá vinstri: Magnús og Ásgeir
Fréttablaðið/aðsend