Íslenskir uppistandsgrínistar eiga sitt varnarþing í The Secret Cellar í Lækjargötu og þaðan voru í fyrrinótt þrjár skyttur, Þórhallur Þórhallsson, Helgi Steinar Gunnlaugsson og Bjarni Baldvinsson, gerðar út í fimmtán daga túr til Alþýðulýðveldisins Kína.

„Grínað í Kína,“ sagði Þórhallur við Fréttablaðið rétt áður en hann lagði í þennan heldur óvænta leiðangur þar sem þeir félagar munu troða upp í fjórum borgum, þar á meðan „aðal stöðunum“ Peking og Sjanghæ.

„Ég er samt að vonast til þess að þeir átti sig ekki á því að sonur Grínverjans er að mæta á svæðið,“ heldur hann áfram en verandi sonur sjálfs Ladda er spaugið honum í blóð borið.

Bullar ekki á mandarín

Þórhallur segist aðspurður ekki vita betur en að áhugi sé á vestrænu uppistandi í Kína þótt vissulega stígi þremenningarnir þarna inn í framandi menningar- og málheim.

„Það virðist vera einhver hópur af fólki þarna sem fylgist með uppistandi á ensku þannig að við þurftum ekkert að læra kínversku fyrir ferðina. Ég bulla ekki á mandarínu. Ég kann ekki mandarínu,“ segir hann með vísan til mest talaða tungumáls veraldar, mandarín-kínversku.

„Við erum bara svo heppnir að Helgi Steinar bjó þarna úti þegar hann var í námi þannig að hann kann kínversku.“ Íslendingarnir verða því líklega ekki alveg eins og sauðir á framandi slóðum. „Hann er svona maðurinn sem leiðir hópinn þannig að við verðum ekki alveg í ruglinu og hann passar upp á að við étum ekki eitthvað mjög skrýtið.“

Þá er þriðji maðurinn, Bjarni „töframaður“ Baldvinsson, eigandi The Secret Cellar, sæmilega veraldarvanur fyrir utan að „það þarf að hafa eigandann góðan og hafa hann með“.

Ekki endilega ferð til fjár

Þórhallur hefur ekki komið til Kína áður og segir þessa gamanferð yfir hálfan hnöttinn hafa komið upp fyrir þremur vikum eða svo. „Ég bjóst nú ekki við því að ég ætti eftir að fara þangað, allavegana ekki með uppistand. Það er mjög spennandi.

Þetta er ekkert rosalegur fyrirvari en Helgi Steinar er með góð sambönd við klúbbana þarna úti og það var auðvelt fyrir hann að plana þetta. Hann er bara að draga okkur með.“

Þótt kínverski markaðurinn sé risastór gerir Þórhallur ekki ráð fyrir að þremenningarnir muni sækja mikið gull í greipar kerskinna Kínverja. „Þetta er aðallega bara ævintýri. Bara það að fara þangað, upplifa menninguna, hitta og sjá fólkið og hvernig það tekur í íslenskt grín. Á ensku. Og er svo ekki „selfie“ á Kínamúrnum skylda?“

Utan þjónustusvæðis

Menningarmunurinn er Þórhalli mátulega ofarlega í huga og hann ætlar ekki að taka neina óþarfa sénsa á sviðinu. „Það er búið að vara okkur við að tala ekki mikið um pólitík, sérstaklega ekki kínverska pólitík. Okkur er ráðlagt að halda okkur svolítið fjarri því. Það er að segja ef við ætlum að koma aftur heim,“ segir Þórhallur sem segist eiginlega stíga sjálfkrafa til jarðar á kínverskri grundu.

„Ég geri líka yfirleitt bara grín að sjálfum mér. Ég næ aldrei að móðga sjálfan mig og þannig ekki heldur neinn annan. Ég veit allavegana hvar ég hef mig og tek því ekkert mjög illa þegar ég er að gera grín að sjálfum mér.“

Þórhallur gerir ekki ráð fyrir tíðindaleysi af leiðangrinum á meðan þeir eru utan þjónustusvæðis samfélagsmiðla í kínverska ritskoðunarveldinu. „Facebook, Snapchat, Instagram og allt þetta er bannað í Kína þannig að við verðum bara utan þjónustusvæðis. En ef ekkert hefur heyrst í okkur eftir 21. nóvember þá kannski megið þið fara að hafa áhyggjur, tékka á okkur og hringja í Guðlaug Þór í utanríkisráðuneytinu.“