Rós Kristjánsdóttir, mannfræðingur og gullsmíðanemi, er rómuð fyrir fágaðan, rómantískan en jafnframt þægilegan fatastíl. Hún býr ásamt unnusta sínum, Þorsteini Friðrikssyni, í fallegu húsi við Ægisíðu. Þau eignuðust soninn Kristján Mána nú fyrr á árinu. Fréttablaðið bað Rós um að deila nokkrum flottum hugmyndum að alklæðnaði með lesendum, ásamt því að svara nokkrum spurningum um hennar persónulega stíl.

Hvernig myndir þú lýsa þínum stíl?

Ég myndi lýsa honum sem kvenlegum og þægilegum.

Rós kláraði mannfræðinám árið 2016 en varð í kjölfarið heilluð að þeirri hugmynd að vera skartgripahönnuður. Hún fór fyrst í styttra námskeið í silfursmíði og líkaði vel. Nú er hún í gullsmíðanámi, en hér eru nokkrir gripir eftir Rós.

Hvert er þitt uppáhaldsfatamerki eða -hönnuður?

Það er alltaf að breytast, en akkúrat núna eru Blanche og Filippa K í uppáhaldi.

Í hvaða búð verslar þú mest hérlendis?

GK.

Áttu þér einhverja uppáhaldsflík, skó eða tösku úr eigin fataskáp?

Já, uppáhaldsflíkin mín er án efa BAHNS-peysan mín, er í henni allavega einu sinni í viku. Svo er Saint Laurent-taskan mín í miklu uppáhaldi, en Geysis-sloppurinn minn er hluturinn sem ég nota langmest, ótrúlega kósí í fæðingarorlofinu.

Skyrtan er frá Blanche. Buxurnar sem Rós klæðist er frá Andreu (Andrea by Andrea) en skórnir Tatuaggi. Fréttablaðið/Sigtryggur ari

Hvert sækir þú innblástur, í klæðavali eða í þinni eigin sköpun sem gullsmiður?

Ég reyni að fá innblástur úr öllum áttum, örugglega gerist það bara í undirmeðvitundinni, en tíska er tíska og mér finnst gaman að fylgja tískustraumum. Hvað varðar skartið er ég ennþá bara nemi og því ekki mikið að hanna sjálf, en það sem ég hef fengið að gera með frjálsar hendur er innblásið af uppáhaldsskarthönnuðum og tískustraumum.

Átt þú þér einhverjar tískufyrirmyndir?

Nei, ekkert þannig, en þær dönsku skvísur Pernille Teisbaek og Jeanette Madsen eru í uppáhaldi hvað varðar fatastíl.

Rós í peysu frá American Vintage og buxum frá Brandy Melville. Skórnir eru frá Reebok.

Finnst þér klæðaval þitt mikið hafa breyst eftir að þú varðst móðir? Leitar þú til dæmis meira í praktískari klæðnað, eða breytti það jafnvel litlu?

Já, ég leita meira í þægindi og eitthvað sem er auðvelt að þvo! Nota uppáhaldsflíkurnar minna því það eru alltaf jógúrt- eða grautarslettur á mér.

­Buxurnar eru Acne Jeans, peysan frá BAHNS og úlpan 66°Norður. Skórnir eru hinir klassísku Dr. Martens, húfan frá Filippa K og sólgleraugun frá Tom Ford.

Hvar finnst þér skemmtilegast að kaupa barnaföt?

Í Petit.

Þú starfaðir áður sem fyrirsæta, fyrir og með námi. Finnst þér sú innsýn sem þú fékkst þá í tískuheiminn hafa haft einhver áhrif á stíl þinn og tískusmekk?

Já, það var aðallega þegar ég var í kringum tvítugt en það mótaði klárlega tískuvitið að fá að prófa alls konar föt og umgangast íslenska fatahönnuði.

Rós starfaði á sínum tíma sem fyrirsæta en í dag á gullsmíðin hug hennar allan.
Fréttablaðið/Sigtryggur Ari

Á óskalistanum hjá Rós fyrir jólin:

1. Ullarteppi úr Geysi
2. Daytone Shearling inniskór
3. Aarke sódatæki Tag Heuer dömuúr, eitthvað í klassískum stíl
4. Tag Heuer dömuúr, eitthvað í klassískum stíl